Gabu Daudau ai Lau Gwauhamata, Dirava Do Lau Hesiai Henia
MEDU bamona ia diho aisi bona sinou ese aiemai vairana ia botaia. Lai parakaparaka momokani be hari ia toa badabada noho. Aiemai motuka taria taudia idia ura lasi motuka amo do ai heau noho. “Ibounai motuka amo umui diho bona umui raka!” Unai hereva be mai badu danu ia boiboi dainai, ai ibounai mai gari danu ai raka. Unai dainai kilomita ginigabedia toi bamona ai raka ai noho kampana Siberia dekenai—ai lalohisihisi, ai ura aiemai tano korikori dekenai ai giroa, bona ai keru.
Ai ibounai be taunimanima 150 bamona—bona ai ibounai be Germany dibura taudia bona Russia taudia edia ami taudia 6 ese ai idia itaia tao noho. Lai be ia toa badabada dainai ena siahu ese kahirakahira ai ia hamorua tano dekenai. Laini dekenai ai raka bona aiemai vairana dekenai tau namba 5 be ai itaia namonamo diba lasi. Nega ta ta lalonai, lai ena siahu ia ore bona unai dainai aiemai vairana dekenai ai moru!
Gabeai, kampa dekenai ai ginidae, ai hesiku bada momokani. Siberia dekenai, unai hanuaboi ai, keru be zero Celcius ena amo ia diho 51 degrees neganai, Dirava lau gwauhamata henia, lau gwau, bema lau giroa lao Germany dekenai dala do lau tahua iena hesiai gaukara do lau karaia totona.
Hekwakwanai Haida Tuari Negana Lalonai
Lau be lagani 1928 lalonai lau vara Berlin, Germany dekenai. Lauegu mauri lagani be 10 neganai, Hitler Youth oreana lalonai lau vareai. Unai murinai, lauegu sinana ia ura dubu ena memba ai lau idia hamomokania, unai dainai lau ia siaia lao tomadiho hadibaia ena klas dekenai lau vareai totona. Dubu ena memba ai lau idia hamomokania dina rua vairanai neganai, lauegu sinana ia mase. Lau sibona lau noho dainai nega momo lau lalohisihisi bona lauegu diba hegeregerenai lau guriguri, lauegu hekwakwanai gaudia be Dirava dekenai lau gurigurilaidia.
Tanobada Ibounai Tuarina Iharuana be ia bada herea momokani, bona Berlin dekenai peleini be hanuaboi bona dina dekenai bomu idia hamorua. Hisihisi karaia dalana be peleini momo be nega tamona idia hanai bona lahi idia havaraia bomu idia hamorua, nega momo unai be lahi havaraia ielo poisini bomu. Bena taunimanima—nega momo unai be sina bona natudia—be lahi idia habodoa totona edia hunia ruma amo idia raka lasi neganai, ma peleini momo idia mai bona nega tamona bomu badadia mai edia hapoua siahu gaudia idia negea.
Paraka negana ta dekenai, Royal Air Force taudia ese bomu haida idia hegaegaelaia idia be tano dekenai idia moru neganai idia pou lasi, to 7 o’clock, December 24 neganai idia pou totona. Idia diba ruma bese iboudiai be do idia hebou Kirisimasi ena dina vairana dekenai. Lauegu lalona dekenai lau henanadai, lau gwau: ‘Dahaka dainai Dirava ese unai bamona kara dika ia hadokoa lasi?’
Lagani 1944 lalonai, ami dekenai lau vareai. To lauegu tauanina goada tahua ripoti ginigabena ese ia hahedinaraia lau hegeregere lasi ami gaukara lau karaia totona, unai dainai idia gwau hua 6 murinai do lau giroa lao be namo. March, 1945 ai, lau idia boiria ami ena opesi dekenai do lau lao itadia totona, to lau ura lasi lau lao.
Hekwakwanai Idia Hamatamaia
May, 1945 ai, Tanobada Ibounai Tuarina Iharuana ia ore. Russia edia ami taudia ese aiemai gabu Berlin dekenai idia abia bona idia hahonua; lauegu tamana be tuari ena dibura tauna dainai idia abia lao. Hua gabedia lalonai, ai be unai ami taudia edia gaukara ai karaia, edia muramura faktori badadia edia masini bona ma kohu haida ai haboudia bona ai siaidia lao Russia dekenai. Unai dala amo Russia taudia haida lau dibadia. Lau hoa badina idia be ai bamona, idia laloa edia heatu ese edia ruhaia mauri namona do ia havaraia bona tanobada namona do ia havaraia.
Lagani 1945, August ena dina namba 9 ai, 2 o’clock adorahi bamona, motuka ta be aiemai ruma vairanai ia ginidae. Russia ena ami taudia rua bona unuseniai ia noho tauna ta idia raka lasi, bena lauegu ladana idia diba murinai, motuka lalonai lau idia doria vareai bona lau idia abia lao. Memero matamatadia momo be unai dina dekenai ami taudia ese idia abia lao danu. Unai murinai ai ibounai idia abia lao taoni kahirakahira gabuna ta dekenai. Idia laloa ai momo be Werwolf ena orea taudia, unai dainai ai idia samania, to ai ibounai be unai orea ena ladana nega ta ai kamonai lasi.
Mero matamata ta be ami taudia dekenai ia gwau, memero matamata haida edia noho gabuna lau diba. To lau gwau lau diba lasi, unai dainai lau bona lau ia samania merona matamata be ia dibura masemase bona ia paripari dibura rumana dekenai ai idia taoa vareai. Lau sibona be unai keru masemase dibura gabuna dekenai lau noho—lauegu mata ranudia idia diho, lau tui diho bona Dirava dekenai lau guriguri. Guriguri karana be nega ibounai lau ia durua. Unai hanuaboi dekenai dibura ruma amo lau idia halasia, bona lau idia abia giroa lao neganai memero ma haida idia noho gabuna dekenai, unai memero momo ese lau idia hanamoa, badina ena be dibura ruma dekenai lau lao, to moale toana lau hahedinaraia.
Pura ta eiava rua murinai, ai raka lao Cöpenick ena taoni dekenai, unai taoni be daudau lasi. Unuseniai ai idia hamaoroa tano aukana dekenai do ai helai. Medu ia diho hamatamaia. Unai murinai memero be grup 5 5 amo idia boiria ruma dekenai idia vareai. Ruma lalonai idia vareai memerodia be mai hisihisi danu idia boiboi badabada bona edia boiboi regena ai kamonaia diba, mai rara danu idia raka lasi ruma amo, edia piripou be imana amo idia dogoatao. Edia belta be ami taudia ese idia abia, edia piripou ena pitopito idia kokia dainai bema imana amo idia dogoatao lasi neganai piripou be do ia moru. Aiemai grup memero idia raka vareai neganai ai diba dika bada do ai davaria.
Lau be belta lau karaia lasi, to lauegu pagana amo idia kwatua gaudia lau karaia. Ami tauna ese ia itaia neganai, lauegu piripou amo ia kokia bona lauegu vairana be unai gaudia amo ia botaia noho. Lauegu vairana be unai ami tauna ese ia botaia noho lalonai, ami taudia ma rua ese edia aena bona edia imana amo lau idia botaia danu. Lauegu uduna bona udu-baubau amo rara bada ia diho noho. Bema ami taudia haida ese lau idia abia oho lasi, reana lau mase vadaeni.
Dibura ruma dekenai ai idia atoa lou, bona daba ta ta iboudiai dekenai, nega tamona sibona ai be mei rumana dekenai ai lao diba. Miniti rua sibona idia henia mei rumana do ai gaukaralaia totona. Bema ta be miniti rua ia hanaia ami taudia ese do idia doria diho taunimanima edia tage gabuna dekenai. Mero ta be ami taudia ese idia doria diho unai tage gabuna dekenai, bena madi ia maloa mase.
Lauegu Noho Ia Namo Ia Lao
Dina hani murinai, motuka ta dekenai ai ibounai idia udaia bona ai idia abia lao kampa ta Hohen-Schönhausen dekenai. Ai memero matamata ibounai be 60 bamona, bona emai mauri laganidia be 13 amo ia lao 17 bamona, taunimanima badadia 2,000 bamona be ai danu idia abia lao. Poland dibura taudia be supu aniani henia gaukarana idia karaia, bona hanaihanai ai matamata taudia dekenai idia henia guna.
Lagani 1945, September 11, daba momokani ta dekenai, ai ibounai ai raka lao Sachsenhausen ena dibura kampa dekenai, ena daudau be kilomita 50 bamona. Ai raka lao lalonai, idia mase taudia be hosi amo idia veria maua dekenai idia taodia vareai, bona edia tauanina idia manoka momokani dainai idia raka diba lasi taudia danu. Adorahi ai, medu ia diho hamatamaia. Hanuaboi momokani lalonai, ai ginidae kampa maragina ta ena vareai gabuna dekenai, aiemai tauanina idia paripari, ai keru momokani, bona ai hesiku bada. Murinai dina dekenai, ai raka lao kampa badana dekenai. Taunimanima 200 200 be ami ese idia karaia dibura rumadia ta ta dekenai idia atodia.
Sachsenhausen ena gabu kahirakahira dekenai, taoni ta ladana Velten ia noho, unai taoni dekenai aniani haboua ruma badana ta ia noho. Unuseniai dibura taudia ese uiti bona aniani haida be train dekenai idia udaia bona Russia dekenai idia abia lao. Nega daudau lalonai unuseniai lau gaukara, bona unai murinai lau idia abia hidi gabu idauidau dekenai lau idia siaia leta eiava ma gau haida lau abia lao totona. Lauegu gaukara be tauanina edia goada tahua edia ripoti Russia kampa amo lau abia lao laboratori dekenai, unai gabu be ia daudau sisina. Unai gaukara lau moalelaia!
Leta bona gau haida ia abia lao ma merona ta bona Russia ena doketa durua tauna ta bona lau be ruma tamona ta dekenai ai noho. Dina ta ta ibounai dekenai hetaru dabua namodia bona ai ura bilankesi momo ai dekenai idia henia. Aiemai aniani be namo herea, bona aiemai ura hegeregerena gabu ta ta dekenai ai lao diba. Unai dainai unai hesiai mero bona lau be Sachsenhausen dibura kampa ena tano, Nazi taudia ese idia gaukaralaia kampana, dekenai ai lao itaia totona.
Kampa unai kahana dekenai ai lao, poisini amo taunimanima idia hamasea daiutudia bona edia mase tauanidia idia gabua gabudia ai vadivadi henidia. Nazi taudia ese idia karaia karadia be lau abia dae diba lasi bamona. Lau hoa bada herea momokani. Ena be lau idia kara dika henia bada lasi, to Germany taudia handred momo be dina ta ta ibounai lalonai idia mase noho. Edia mase tauanidia be hosi ese idia veria maua dekenai idia udaia bona uda dekenai mase taudia edia tauanina idia negea gabuna dekenai idia laohaia.
Dina ta ai, ai ese bilakibodi ta ai davaria, bona unai bilakibodi dekenai Hitler ena negai dibura kampa ai idia noho dibura taudia idauidau edia lista idia torea. Unai lista dekenai idia torea taudia haida be Iehova ena Witness taudia. Unai negai lau diba lasi nega ta ai Iehova ena Witness tauna ta ai do lau lao.
Ma Dika Bada Haida Lau Davaria
Lau moalelaia gabuna dekenai lau noho daudau lasi. Ami ena tau badana ta ese lau ia nanadaia, ia ura diba dahaka dainai muramura haida lau henaodia. Ena be lau hamaoroa gau ta lau henaoa lasi, to ia kamonai lasi, unai dainai lau idia atoa vareai dibura ruma dekenai bona sibona lau noho. Unai daiutu maragi dekenai aniani sisina sibona lau idia henia, bona ena be ia be paraka negana to bilankesi ta lau dekenai idia henia lasi. Bena dina 11 murinai dibura ruma amo lau idia ruhaia.
Lau idia lokaia dibura rumana amo lau raka lasi neganai, lau hoa badina unuseniai ia gaukara ami mero matamatana ese lau ia abia dae mai moale danu. Guna ia be lau ia ura henia lasi momokani. To hari, iena imana amo lau ia rosia bona ena be Germany gado ia kikilaia namonamo lasi, to lau ia hamaoroa iena tama bona sina be Gestapo taudia ese idia hamasedia bona ia be Germany dibura kampa dekenai ia noho. Ia gwau ia diba lau be kerere ta lau karaia lasi.
Unai nega sisina murinai, aiemai tauanina idia do goada sisina dibura taudia be ai idia hamaoroa do ai lao gabu haida dekenai do ai gaukara totona. Lagani 1946, January 30 dekenai, ai ibounai be train dekenai ai guia; train lalonai ai idia atoa haida be atai kahana dekenai idia helai bona haida be idia henunai idia noho totona. Train ena daiutu ta ta dekenai dibura taudia 40 40 idia guia, unai anina be idia helai hekahihekahi momokani. Hanuaboi dekenai ai mahuta namonamo lasi, badina bema ta ia giroa neganai ai ibounai ai giroa danu.
Ai lao henia gabuna idauidau ai herevalaia, to unai hereva ibounai be kerere. Ai lao gabuna ginigunana dekenai, ma kampa amo dibura taudia 500 ma haida idia guia ai danu. Unai murinai dina ta ta ibounai aniani sisina ai abia, hegeregere, paraoa aukana bona kakorona bona gwarume maragimaragi, bona supu sisina ai dekenai idia henia. Dina haida dekenai be ti kapusi maragina ta lalonai ai idia henia. Haida be idia ranu mase momokani dainai, train ena haba dekenai ia noho aisi be edia malana amo idia demaria. Moscow ena gabu kahirakahira dekenai ai ginidae neganai, ai digudigu bona aiemai kwarana dekenai idia noho utu be utu hamasea muramura amo idia hagoevaia. Reana unai dina dekenai lau be bakete ranu ta lau inua.
Siberia Dekenai Ai Lao!
Lagani 1947, March 6 dekenai, Prokopyevsk, Siberia dekenai ai ginidae. Unai siti dekenai idia noho taudia be Russia ena gabu idauidau amo idia mai taudia. Sinou be gabu ibounai dekenai ia noho, bona gabu haida dekenai ena dobu be magu atai momokani dekenai ia noho. Dibura rumadia edia kahana be tano henunai idia karaia, unai amo paraka ena keru ia koua sisina. Unuseniai ai noho neganai, inai sivarai ena hereva ginigunana lau gwauraia gau dikadia momo be ai davaria.
Lagani ginigunana Siberia dekenai ai noho be auka momokani. Kampa dekenai idia noho taudia ese kukuri ranu gorere idia davaria. Taunimanima momo idia mase. Lau danu lau gorere bada momokani, unai dainai lau laloa do lau mase. Kampa dekenai ai noho ena namo ta be dina ibounai paraoa ai abia, to Prokopyevsk dekenai idia noho Russia taudia momo be paraka dekenai hora momo laini dekenai idia gini edia aniani idia abia totona, to nega momo laini dekenai idia naria noho lalonai aniani be ia ore, bona aniani idia abia lasi.
Lagani 1949 ena tubutubu gaudia edia raurau idia moru negana lalonai, ami edia kota gaukara karaia taudia haida be Moscow amo idia mai aiemai hereva gunadia idia tahua lou bona dahaka do idia karaia ai dekenai idia gwauraia totona. Ena tano ia ura henia dikadika ami ofisa tau matamata ta ese lau ia henanadai henia to ia be Germany taudia ia ura henidia lasi. Lau moale bada badina lau be dibura ruma dekenai lau idia atoa lasi. Dibura ruma dekenai idia atoa lasi taudia be Stalinsk dekenai idia abia lao, hari unai gabu ladana be Novokuznetsk, unuseniai paua siteisini haginia gaukarana ai dekenai idia henia.
Egu Hanua Dekenai Lau Giroa Vadaeni!
Lagani 1950, March ena hua lalonai, Germany dekenai ai idia siaia lou, bona April 28 dekenai, lauegu ruma bese danu ai hedavari lou. Ena be lauegu hanua dekenai lau giroa lao dainai lau moale bada, to lauegu hekwakwanai be idia ore lasi. Guna Hitler Youth ena orea dekenai lau vareai dainai, East Germany ena komiunis tau badadia idia laloa lau be Nazi taudia danu lau gaukara hebou, bona aniani sisina bona dabua haida sibona lau dekenai idia henia. Unai dainai, pura toi murinai, East Berlin lau rakatania bona West Berlin dekenai lau lao.
To, lauegu gwauhamata lau laloaboio lasi, unai gwauhamata be bema Germany dekenai lau giroa lao neganai, dala haida do lau tahua Dirava ena hesiai gaukara do lau karaia totona. Nega momo dubu ena vairana dekenai sibona lau gini, to dubu ena lalonai lau vareai diba lasi. Tomadiho dekenai lau hesiku vadaeni, unai dainai, lau laloa Dirava do lau guriguri henia noho sibona, lau noinoi henia dala ta lau dekenai ia hahedinaraia iena hesiai gaukara lau karaia totona.
Gabeai Tilly lau adavaia, bona natuna mero ta ai havaraia, ladana be Bernd. Lagani 1955 tubutubu gaudia idia vara lou neganai, lauegu gaukara turana ta, ia be Iehova ena Witness tauna ta, ese lau dekenai Dirava ia herevalaia. To Germany ai rakatania haraga dainai ia ida ai hedavari lou lasi. Guna lau be revareva lau torea lau ura gwaumaoro lau abia Australia dekenai do lau noho totona. Ai rakatania haraga ena badina be telegram ai abia bona idia gwau Australia dekenai do ai noho diba, bona namona be ai hegaegae dina toi murinai bouti amo Bremerhaven ai rakatania Australia dekenai do ai lao totona.
Tano, bona Mauri Matamatana
Unai murinai Adelaide dekenai ai noho. Unuseniai Germany gado dekenai ia hereva Witness tauna ta be lagani 1957 lalonai ai ia vadivadi henia. Ai moale bada momokani! Daudau lasi murinai, Bible stadi ai karaia hanaihanai bona ai goada ai lao. To hereva momokani be inai, ena be Tilly bona lau be unai hekwakwanai ibounai ai hanaia, aiemai lalohadai badana be unai dagedage ibounai amo ruhaia nege mauri namona ai davaria. Hari ai mai Australia ena dina siahu gabuna dekenai, manu bamona ruhaia mauri namona dekenai ai noho. To daudau lasi murinai iniseniai dagedage daladia ai davaria danu, hegeregere, moni gaukara dalana ena hekwakwanai bona mauri ena hekwarahi gaudia be momo.
Ai moale bada badina unai dika gaudia ibounai edia badina ai diba. Bible ia gwau: “Satani ese tanobada taudia ibounai ia gunalaia noho.” (1 Ioane 5:19) Unai dainai, herevana edena tano dekenai ita noho to hekwakwanai do idia noho. Ai moale bada danu badina hanaihanai lau gurigurilaia herevana ena anina lau diba, unai be: “Oiemu Basileia do ia mai.” Gabeai ai lalo-parara Dirava ena Basileia be gavamani momokanina ta, ia be guba gauna, bona lagani 1914 lalonai Iesu Keriso be unai Basileia ena Pavapava ai ia lao. Danu ai moale badina ai diba Dirava ena Basileia be ia gaukara vadaeni—Satana bona ena demoni be guba amo ia kokidia, bona nega kahirakahira hisihisi badana lalonai, tanobada amo kara dika ibounai do ia haorea momokani!—Mataio 6:9, 10; Apokalupo 12:12.
Lau gwau: “Vadaeni, gauna be inai.” Hari lau diba edena bamona lauegu gwauhamata Dirava dekenai do lau hagugurua. Unai dainai, lagani 1960, January 30 dekenai, lau gwauhamata Iehova dekenai bona lau bapatiso, unai amo lauegu gwauhamata Dirava dekenai lau hagugurua hamatamaia; Tilly danu be lau ida Keristen gwauhamata ia karaia.
Unai nega amo ema bona hari, lagani 30 mai kahana ia lao vadaeni, Dirava ena hesiai gaukara ai karaia noho lalonai, hahenamo momo ai davaria. Hari Bernd be mai ena ruma bese, bona danu Keristen kongregesen ta dekenai elda gaukara ia karaia noho. Ai be lagani 1975 lalonai aiemai ruma ai hoihoilaia bona unai dala amo aiemai laolao dalana ia koua lasi bona Witness taudia ese sivarai namona idia harorolaia momo lasi gabudia dekenai hesiai gaukara ai karaia. Bona lagani 1984 lalonai, Iehova ena Witness taudia edia Adelaide Assembly Hall naria gaukarana lau abia dae.
Lauegu adavana bona lau ai moale bada herea, badina daudau gabuna Siberia dekenai guna lagani 40 bona ma haida lau noho neganai, Dirava dekenai lau gwauhamatalaia herevana lau hamomokania. Mai manau danu ai abidadama, Dirava ese ia torea Hereva Lada-isidia ena hereva be nega momo ia momokani ai dekenai, ia gwau: “Oiemu raka dalana ibounai dekenai, ia oi laloa, bena ia ese oiemu dala ibounai do ia hamaoromaorodia.” (Hereva Lada-isidia 3:6)—Gerd Fechner ese hari sivarai ia gwauraia.
[Picture on page 23]
Lau bona lauegu adavana Tilly