Tanobada Amo Sivarai Idauidau
Cocaine Drag Beibi Edia Davana
Gavamani ena ripoti ta ia hahedinaraia, United States dekenai, rogorogo hahinedia momo be cocaine drag idia ania. New Scientist magasin ese ia hahedinaraia lagani ta ta iboudiai lalonai beibi 92,000 ia lao 240,000 be sinana edia bogana lalonai idia noho neganai drag ese idia hadikaia vadaeni. United States ena gavamani ese ia hahedinaraia lagani 1990 sibona lalonai unai bamona beibi 158,400 idia vara. Cocaine drag ese beibi pusena dekenai ia vareai diba ia hadikaia totona be hekwarahi lasi, bona saiens taudia be hari idia lalo-parara edena bamona beibi do ia hadikaia diba. Stadi ta ese ia davaria cocaine drag beibi be nega daudau hospital dekenai idia noho badina idia vara neganai idia metau lasi dainai, bona idia 100 100 amo 50 50 be intensive care lalonai idia atoa badina hekwakwanai ma haida idia davaria dainai. Hospital ena naria karana dainai davana be hida? Lagani ta ta iboudiai lalonai 504 milion dola bamona idia halusia!
Ruma Bese Edia Mauri Europe Dekenai
France taudia edia buka ta, ladana Euroscopie, ese ia hahedinaraia lagani 20 ia lao vadaeni lalodiai Europe dekenai headava hadokoa karana be nega toi amo ia bada daekau (unai be 171,000 amo ia bada daekau 530,000 dekenai). Unai buka ese ia hahedinaraia lagani 1960 amo ia lao lagani 1980 lalonai, United Kingdom dekenai headava hadokoa karana be nega 6 amo ia bada daekau. Denmark dekenai, headava rua rua amo tamona tamona be idia hadokoa—United States dekenai danu be unai bamona. France magasin, L’Express, be unai buka ena hereva kahana dekenai ia hereva, ia gwau: “Ena be Europe taudia idia gwau edia [ruma bese] be gau badana edia mauri lalonai, to hari ia dika ia lao.”
Ia Giroa Mai Ia Mase Totona
Nega ta idia laloa moose ena animal be North America ena kahana Maine, New Hampshire, bona Vermount dekenai idia mase ore gwauraia. To lagani 10 idia lao vadaeni lalodiai moose edia namba ia bada ia lao, unai dainai hari motuka bona unai animal idia bampa momo. Moose idia bada neganai edia metau be reana 450 ia lao 725 kilogram bamona, bona idia gini neganai edia lata pagana dekenai be reana 2.10 mita bamona. Edia kwarana be motuka ena diari atai ai idia noho dainai, ena diari ese edia matana ia hahururua lasi dainai, motuka taria tauna ese unai animal be dala dekenai idia itaia haraga diba lasi. Animal ia diba momo tauna Howard C. Nowell, ia gwau: “Moose oi bampa neganai gau ta oi itaia lasi ela bona ena aena oi botaia bona motuka ena vaira galasina dekenai ia moru.” Lagani 1990 ai, Maine dekenai motuka 500 bona moose idia bampa heheni. Hekwakwanai ma ta be ita diba lasi moose be dahaka do idia karaia. Motuka maragina ta ia taria tauna ta ia laloa ena motuka ena kibi ia haregeregea neganai moose do ia gari. Moose ia gari lasi, to ia badu bona unai motuka ia hahebubua bona ia doria lao au badadia idia tubu gabuna dekenai.
Tuari Kohudia Hoihoilaia Karana Ia Maragi Ia Lao, A?
United Nations ena Disarmament Newsletter ia gwau, tuari kohudia hoihoilaia karana dekenai sivarai namona ia noho. Stockholm ena International Peace Research Institute dekenai idia davaria “tanobada ibounai ena tuari kohudia hoihoilaia karana be lagani 1990 ai 35 pesen amo ia diho, to 1989 ia be bada sisina, unai be lagani 1985 bamona ena namba amo ia diho momokani.” To, The Bulletin of the Atomic Scientists magasin be vanegai sibona politikol taudia edia hereva tuari kohudia hamaragidia karana dekenai idia hamomokania lasi, idia gwau: “To momokani, hari tuari kohudia hoihoilaia karana be ia bada ia lao.” Hegeregere Bulletin magasin ese ia hahedinaraia lagani 1990 ai France dekenai “tuari kohudia hoihoilaia karana ma tano haida dekenai be 70 pesen amo ia bada daekau.” Persian Gulf tuarina ia vara hamatamaia murinai United States dekenai tuari kohudia karaia taudia idia gwauhamata 15 bilion dola ena tuari kohudia do idia karaia Middle East tanodia totona! Bona July, 1991 lalonai, United States ese 7 bilion dola tuari kohudia idia siaia tanobada hegegemadai dekenai.
Idia Boio Hahinedia
Idia mase taudia edia namba bona idia vara beibi edia namba idia stadilaia taudia ese gau dikana ta idia davaria: Hahine handred milion momo be tanobada hegegemadai taunimanima edia namba amo idia boio. The New York Times niuspepa ese ia hahedinaraia ena be idia vara kekeni be 5 eiava 6 pesen amo idia vara memero edia namba idia hanaia, to idia mase memero taudia ese idia mase kekeni taudia edia namba idia hanaia. Unai dainai, taga tano badadia dekenai, hegeregere England, Poland, bona United States dekenai, hahine edia namba be 105 105 to tatau edia namba be 100 100. Idia taga bada lasi tanodia dekenai, hegeregere Asia dekenai, hahine be momo lasi, hegeregere tatau edia namba be 100 100 to hahine edia namba be 93 93. Badina be dahaka? Times magasin ese ia hahedinaraia: “Edia lagani idauidau hahinedia bona kekeni milion momo idia boio badina idia haida be sinana ena bogana lalonai idia hamasedia, eiava idia vara neganai idia hamasedia, eiava aniani momo be memero taudia dekenai idia henia to aniani sisina sibona idia henidia kekeni taudia dekenai, eiava bema kekeni ese kukuri ranu gorere idia davaria neganai idia laloa momo lasi, to memero ese unai gorere idia abia neganai maoromaoro idia laloa bada bona muramura idia henia hanamoa totona.”
Italy Taudia bona Bible
Bible be “anina lasi gauna Italy taudia edia sene karana dekenai, idia be dubu dekenai idia lao taudia to idia manada lasi Dirava ena hereva edia uduna dekenai idia duahia totona.” Italy ena niuspepa, La Repubblica, ese ia hahedinaraia, October gunanai, Bologna dekenai profesa taudia momo bona Bible idia tahua aonega taudia momo edia hebou badana ta dekenai atai hereva idia gwauraia, edia hereva badana be “Bible, Sene Karadia, bona Sikuli Italy Dekenai.” Bible ia tahua aonega tauna ta ia gwau, Italy dekenai Bible idia diba lasi ena badina be lagani 1500 ia lao 1599 lalonai, Council of Trent dekenai taunimanima idia taravatu henidia edia Bible do idia duahia lasi. Unai aonega tauna ma ia gwau, “to Second Vatican Council ena nega murinai unai Buka (Bible) be buka ta sibona Keristen taudia dekenai, idia laloa lasi unai be aonega bona mauri ia henia bukana, to unai buka be auka lasi bona ita lalo-pararalaia haraga diba.”
Boromakau Ia Heatu Henia Pris Tauna
Spain ena niuspepa El País ese ena mauri lagani 55 tauna ta, Ángel Rodríguez Tejedor, ia be Titulcia (Madrid) ena pris tauna, ena sivarai ia gwauria, unai pris tauna be taunimanima hutuma 1,500 vairadiai boromakau matamatana ta ia heatu henia, ena dubu totona moni ia gogoa. (Iena heatu ginigunana dekenai moni ia gogoa nun edia noho rumana ena siahu halasia masini ia hoia totona.) Heatu gabuna ia lao henia noho lalonai, dubu ena vairana dekenai ia ginidae bona mai heudeheude gadona ida Virgin of the Rosary idia koroa laulauna dekenai mai taitai danu ia gwau: “¡Guapa, ayúdame!” (Hairai kekeni e, lau oi durua!) Boromakau hamasea negana ia ginidae neganai unai pris tauna ese dubu ena helaga kohudia ia naria tauna ia hamaoroa boromakau do ia hamasea totona. Unai niuspepa ese ia hahedinaraia, unai pris tauna bona ena turadia dekenai boromakau ena taiana idia henia harihari gauna bamona, bona ia gwau unai adorahi dekenai taunimanima ese pris ia karaia gaukarana “idia ura henia bada to Sunday ena hebou dubu dekenai momo idia mai lasi dainai, idia hahedinaraia unai gaukara be idia ura henia bada lasi.”
Urita Manauna
Urita ena toana oi itaia neganai oi gari bada, to African Wildlife ena magasin ese ia hahedinaraia oi do ia hadikaia diba lasi. Bema urita idia hadikaia gwauraia neganai ia sibona do ia naria namonamo, to urita be ia hemarai bona kerere ta do ia karaia lasi. Ma danu sibona ena hekwawanai ia hamaoromaoroa diba. Saiens taudia ese ura [lobster] ta kavabu ta dekenai idia udaia bona ikouna amo unai kavabu idia koua urita rua idia tohoa totona. Unai urita rua be sibodia kavabu ikouna idia kehoa. Unai magasin ese ma ia hahedinaraia taunimanima idia ubua urita maragina ta be edena bamona ena aniani ia abia: “Ruma bese ta be nega hanaihanai edia adorahi aniani idia do ania lasi neganai unai urita maragina idia ubua guna. Nega ta unai ruma bese be unai urita maragina ubua totona idia laloaboio, unai urita ese ena imana 8 amo ia noho galasi habana ia dogoatao bona ena tauanina ena kala idauidau ia karaia unai ruma bese ese idia itaia totona. Bona idia itaia lasi neganai ena imana amo nadi ta ia abia bona galasi ia botaia ela bona unai ruma bese idia itaia bona ena aniani idia henia.”