Duahia Taudia Edia Amo

Muvini Piksa  Tanikiu bada “Matamata Taudia Edia Henanadai” ena sivarai kahana (Issue Number 1, 1991) “Muvini Piksa Namona Ta be Edena Bamona Lau Abia Hidi Diba” herevana dekenai. Hari inai nega matamata taudia momo idia diba lasi Keristen taudia ese edena bamona muvini piksa idia raraia diba, eiava edia tama bona sina dekenai gwaumaoro idia abia lasi edena muvini piksa idia raraia totona. Lau ura henia lalohadaina be bema muvini piksa ia dika neganai televisen ita koua.

J.N.S., Brazil

Ruma Bese e, Umui Lalo-Tamona  Lau be tama ta bona lauegu natudia lau lalodia momo lasi. Lau diba lasi gabeai dahaka dika do ia havaraia. “Ruma Bese e, Lalo-Tamona Umui Tahua” (Issue Number 3, 1992) dekenai lau duahia neganai lau lalohisihisi bada! Lau gwauhamata lauegu mauri do lau haidaua bona egu natudia do lau kara namo henidia.

J.B.M., Gabon

Mamoe Huina  Lau tanikiu emui sivarai “Mamoe Huina be Hoa Gauna” (Issue Number 3, 1992) dekenai. Lau be dabua turia sikulina lau karaia, bona mamoe huina ai stadilaia danu. Unai sivarai ese lauegu sikuli gaukara dekenai lau ia durua bada. Unai bamona karaia totona lauegu hemami ia namo momokani lasi badina lauegu sikuli turadia ese lau idia hevasehalaia lau be Iehova ena Witness kekeni ta dainai. Aiemai sikuli ena biaguna be sikuli natudia ia hadibadia Iehova ena Witness taudia dekenai do idia naria namonamo! To lauegu tisa be unai Noga! magasin ia duahia bona ia ura ta do ia abia.

P.A., Czechoslovakia

Humidifaea  Lau ura egu lalohadai (Issue Number 3, 1992) “Tanobada amo Sivarai Idauidau” ena kahana dekenai umui torea “Humidifaea Edia Dika” lau herevalaia. Humidifaea dekenai filter gaukaralaia neganai, unai ese gorere do ia havaraia diba, umui ese unai umui hahedinaraia namonamo lasi.

S.G., Germany

Hodahoda amo “minerals” idia kokia masini ese gaukara namona idia karaia, badina idia ese “aluminum”, led, eiava “asbestos” edia kahu hodahoda amo idia kokia. Unai masini idia karaia taudia idia gwau namona be unai masini ena “filter” idia sensia hanaihanai, unai amo sibona ia hagoevaia loulou.​—⁠Inai magasin hereva hamaoromaoroa tauna.

“Estrogen” Muramurana  Tanikiu bada umui torea herevana “Estrogen Muramura Oi Inua be Namo Eiava?” (Issue Number 3, 1992) be nega korikori dekenai ia ginidae dainai. Lauegu doketa ia ura estrogen muramurana lau inua. Lau moale bada herea badina unai dina murinai unai hereva ibounai lau duahia namonamo.

M.R.S., United States

Lagani rua lalodiai, varahu ia diho kava lauegu tauanina amo bona lauegu tauanina dekenai ma gau haida idia vara. Lauegu doketa ese muramura haida lau dekenai ia henia, to hisihisi idauidau lau dekenai ia havaraia, hegeregere kwarana hisihisi gorerena. Lau sibona heduru lau tahua, lau ura umui dekenai heduru herevana ta do umui torea. Unai pura murinai, Noga! magasin lau kehoa bona unuseniai estrogen muramurana inua karana ia hahedinaraia namonamo. Lau diba unai magasin ena hereva ese hahine momo do ia durudia.

B.S., United States