Ia be Gau Momokanina Ta, A?

TAU TA ese ia karaia diba gauna, ma tau ta be koikoi dalanai ia kopi hanai diba. Oi itaia gauna be reana oi ura henia gauna ta, to ia be gau momokanina eiava koikoi dalanai idia karaia gauna, a? Nega haida, panisi bada idia henia koikoi gaudia idia hoia neganai. Lagani 1300 murinai motel bamona rumana ia biagua German tauna be aiona amo idia taua dae badina ia gwau ia hoihoilaia uaina be Rudesheimer, to unai be koikoi herevana. Britain lalonai, lagani 1692 ia lao 1831 ai, taunimanima 300 be aiodia amo idia taua dae moni koikoina idia karaia dainai. Lagani 1597 ai, golo gaudia idia karaia taudia rua be kwarana, aena bona imana ia dogoatao gauna (pillory) dekenai idia koua bona unai gauna dekenai edia taiadia idia kokoa kau, badina golo ena bada be koikoi dalana amo idia stampa.

Mark Jones be British Museum dekenai ia gaukara bona idia hahedinaraia gaudia edia ladana be Fake? The Art of Deception (Koikoi Gaudia? Taunimanima Koia Karana), bona ia gwau: “Taunimanima idia ura dikadika gau haida idia gogodia, bona unai dainai hoihoi taudia be koikoi dalanai unai taudia idia ura gaudia idia karaia. Diba bada taudia idia koidia danu. Idia gwau idia davaria “turia” be Piltdown man, to unai turia idia davaria lasi, taunimanima ese unai turia idia haboudia koikoi bona lagani momo lalodiai saiens taudia idia koidia. Haida idia gwau Hitler ena diari bukadia idia davaria, to unai be koikoi, taunimanima ma haida ese unai buka ena hereva idia torea bona diba bada taudia idia koidia.

Mark Jones ia gwau: “Idia karaia koikoi kara badana be . . . ladana bada kohudia edia ladana be idau kohu dekenai idia atoa taunimanima koidia totona.” Hegeregere, lagani 1988 ai, United States dekenai, idia laloa hua ta ta iboudiai Apple kompiuta 10,000 ia lao 15,000 idia hoihoilaidia, to idia be Apple kompiuta momokanidia lasi, idia be kompiuta idaudia. Galasi amo idia karaia gaudia idia gwauraia Waterford crystal, to taunimanima be koikoi gaudia idia karaia bona unai ladana idia atoa neganai K23,600,000 idia davaria, vanegai sibona unai koikoi karana idia davaria. The Sunday Times niuspepa ia gwau: “France ena hanua maragina ta lalonai unai davana bada crystal gaudia momokanidia idia tohotohodia, to idia be Waterford crystal lasi.”

Inai uru taudia be kohu namodia idia ura henia bada. Vincent Carratu be koikoi amo kohu idia karaia taudia be nega daudau ia koudia toho, bona ia gwau: “Hari dina” koikoi gaudia ia karaia ena bisinesi tauna “be muramura idauna ta dekenai Chanel kampani ena ladana do ia atoa, bona ma murinai sieti idauna ta dekenai Fila kampani ena ladana do ia atoa, bena murinai tennis rackett idaudia dekenai Dunlop kampani ena ladana do ia atoa.” Taunimanima idia ura hoia gaudia, hoihoi taudia ese koikoi dalanai do idia karaia. To, Britain lalonai Koikoi Koua Oreana (Anti-Counterfeiting Group), ia sisiba ia gwau, “nega momo . . . idia gwauraia ladana bada dina gauna ena ‘davana idia hamaragia’ K100.00 dekenai, to ena davana korikori be K10.00 sibona.”

Mase Idia Havaraia Koikoi Gaudia

Anti-Counterfeiting News pepana ese hekwakwanai ma ta ia hahedinaraia, unai be idia dika kohudia: “Taunimanima be idia dika gaudia bona idia dika sisina gaudia idia hoia neganai haida idia hamasea diba.”

Dika bada herea gauna be muramura koikoidia idia karaia. Britain lalonai, Anti-Counterfeiting Group oreana ia gwau: “Africa dekenai idia hoihoilaia muramura 100 100 amo 70 70 be muramura koikoi.” Hegeregere, Nigeria lalonai idia hoihoilaia matana muramurana be koikoi gauna bona ranu dikana amo idia karaia. Unai gauna ese taunimanima edia matadia ia hakepuludia diba.

Oi gaukaralaia pepa monina be reana koikoi gaudia. Guna, lagani tamona lalonai, tanobada ibounai dekenai moni koikoi Kina 106,700,000 idia davaridia. The Irish Times niuspepa ia gwau Ireland dekenai idia gaukaralaia K100 pepa moni koikoina ena toana be namo herea dainai “idia 155 be banika badadia dekenai idia atoa neganai idia dadaraidia lasi.”

Dahaka do oi karaia kohu koikoi oi hoidia garina? Kohu naria orea ena hahine ta ia gwau “oi ia durua gauna namona be kohu oi diba namonamo.” Ma ia gwau: “Bema oi hoia gwauraia gauna ena davana be maragi herea, reana do oi diba ia be koikoi gauna.”

[Picture on page 20]

Inai Piltdown “turia” be koikoi gauna bona lagani momo lalodiai saiens taudia ia koidia