Ma Haida Tura Henia

Hekwakwanai

Bema ita ura henia lasi taudia ita dadaraia, ma haida inai henia karana ena hemami do ia bada ia lao. Bona ita ura henia taudia sibona ita tura henia neganai, do ita laloa iseda lalohadai, hemami bona kara sibona be maoro.

Baibel Ena Hakaua Herevana

“Emui lalokau umui habadaia.”—2 KORINTO 6:13.

Ena anina be dahaka? Iseda “kudouna” ena anina be iseda hemami bona ita ura henia gaudia. Bema ita bamona taudia sibona ita ura henia iseda lalokau ma haida dekenai do ia maragi. Unai kara ita dadaraia totona, namona be ma haida ita tura henia danu.

Ma Haida Tura Henia Karana Ena Namo

Haida edia kara ita diba neganai, do ita laloparara dahaka dainai idia karaia gaudia be idau. Bema idia ita dibaia namonamo, do ita itaia idia be ita bamona. Bena idia do ita laloa bada bona hebogahisi henia.

Mani Nazaré ena sivarai ita laloa. Ia be idau bese taudia ia inai henia. Ia ia durua gauna ia herevalaia ia gwau: “Idau bese taudia ida lau hebamo bona idia ida lau gaukara. Unai neganai lau diba komiuniti taudia ese unai grup taudia totona idia gwauraia herevadia be momokani lasi. Idau bese tauna ta oi tura henia neganai, do oi laloparara idia ibounai edia kara be idau bona idia do oi lalokau henia bona laloa bada.”

Oi Karaia Diba Gauna

Dala ia kehoa neganai, idau tano, bese eiava gado tauna oi hereva henia. Reana inai oi karaia diba

Idia oi nanadaia edia sivarai haida idia gwauraia.
Idia oi boiria emu ruma ai idia aniani totona.
Edia hereva oi kamonai namonamo unai amo idia laloa bada gaudia do oi dibaia.

Bema edia mauri ai idia davaria gaudia oi lalopararalaia neganai, do oi diba dahaka dainai edia kara be idau, bona unai ese oi do ia durua idia bona edia grup ai idia noho taudia oi ura henia totona.

Sivarai Momokanina: Kandasamy Bona Sookammah (Canada)

“Ai be South Africa dekenai ai tubu daekau, unai negai kurokuro taudia bona korema taudia idia inai heheni. Bese idauidau taudia be komiuniti ta ta dekenai idia hapararaia, bona unai ese grup ta ta huanai inai heheni karana ia havaraia. Ai be kurokuro taudia lasi, bona kurokuro taudia ai ura henidia lasi badina emai taunimanima haida idia kara namo henia lasi. Unai negai, ai laloa unai be ma haida inai karana lasi. Badina ai mamia idia ese ai idia inai henia.

“Emai lalohadai ai haidaua totona, bese bona noho daladia idauidau taudia ai bamoa matamaia. Bena kurokuro taudia ai bamoa neganai, ai laloparara idia be ai bamona. Mauri lalonai ai karaia gaudia bona ai davaria hekwakwanai be hegeregere.

“Kurokuro tauna ta bona ena adavana be emai ruma dekenai ai abia dae, bona ai ida nega daudau idia noho. Idia ai dibaia namonamo. Daudau lasi idia be emai tura namodia ai idia lao. Unai ese ai ia durua kurokuro taudia ibounai dekenai lalohadai maorona ai abia totona.”