Ma Haida Edia Kara Namodia Oi Laloa Bada

Hekwakwanai

Sibona laloa bada karana ese inai heheni karana ia havaraia diba. Unai bamona kara ia hahedinaraia tauna be nega momo sibona ia abia isi bona ia laloa ma haida ia hereaia. Momo be unai bamona idia laloa. Buka ta ladana Encyclopædia Britannica ia gwau: “Taunimanima momo idia laloa edia noho dalana, aniani, dabua, kara, idia abia dae gaudia, edia lalohadai, bona gau ma haida ese taunimanima ma haida edia ia hereaia.” Edena dala ai inai lalohadai kererena ita dadaraia diba?

Baibel Ena Hakaua Herevana

“Mai manau ida do umui laloa ma haida ese umui idia hereaia.”—FILIPI 2:3.

Ena anina be dahaka? Hekokoroku karana ita dadaraia totona, namona be ita manau. Manau karana ese ita do ia durua ita laloparara dala haida dekenai ma haida ese ita idia hereaia. Ita gwau diba lasi bese ta sibona ese kara namodia ibounai ia hahedinaraia diba bona hanaihanai gau namodia do idia karaia.

Mani Stefan ena haheitalai ita laloa. Ena be Komiunis tanona ta dekenai ia tubu daekau, to gabeai komiunis lasi tanodia amo idia mai taudia inai henia karana ia hadokoa. Ia gwau: “Lau laloa bema oi abia dae ma haida ese oi idia hereaia, unai ese oi do ia durua ma haida oi inai henia lasi totona. Gau ibounai lau diba lasi. To ma haida amo gau haida do lau dibaia.”

Oi Karaia Diba Gauna

Namona be oi diba nega haida oi kerere diba. Bona oi karaia gaudia haida be ma haida ese idia karaia namonamo diba. Namo lasi oi laloa bese ta o grup ta lalonai idia noho taudia ibounai edia kerere be hegeregere.

Namo lasi idau bese tauna ta dekenai lalohadai kererena oi abia haraga, to sibona oi nanadaia:

Namona be oi diba oi karaia gaudia haida be ma haida ese idia karaia namonamo diba

‘Unai tauna ese ia karaia karana be kara dikana, eiava ena kara be idau?’
‘Unai tauna ese egu kerere do ia laloa, a?’
‘Edena dala ai unai tauna ese ia karaia gaudia be lau karaia gaudia ia hereaia?’

Bema mai momokani ida unai henanadai oi haerelaia, ma haida inai henia karana do oi dadaraia sibona lasi, to edia kara namodia do oi ura henia.

Sivarai Momokanina: Nelson (United States)

“Lau maragi neganai, egu gabu dekenai idia noho taudia be bese tamona bona edia noho dalana be hegeregere.” To egu mauri lagani be 19 neganai, siti badana ta dekenai lau lao bona factory ta ai lau gaukara. Lau ida ai gaukara hebou bona noho hebou taudia edia bese, noho dalana, bona kastom be idauidau.

“Egu gaukara turadia lau dibaia namonamo neganai, lau itaia herevana edia kopina ena kala, gado, bona bese be idau, to idia be gaukara goada taudia, idia lau trast diba, bona idia danu be mai edia kara namodia.

“Gabeai idau bese hahinena ta lau adavaia, ena be lau dekenai edia aniani bona miusiki idauidau be matamata, to unai gaudia lau moalelaia. Mauri lalonai idia vara gaudia amo lau dibaia gauna be inai, ita ibounai be mai iseda kerere bona manoka gaudia. Momokani, bese bona kastom idauidau taudia amo lau dibaia kara namodia lau tohotohoa neganai, unai ese lau ia durua taunimanima namona ai lau lao totona.”