Karoa 4
Roho Mauri Taudia Do Idia Abia Maurina
ENA BE “Iehova ena dina” be mai garina, to tanobada do ia hadikaia vaitani lasi; unai “dina” murinai taunimanima ese tanobada do idia noholaia diba. Unai “dina” ai do ia vara gauna be niuklia tuarina hegeregerena lasi; tanobada do ia hadikaia momokani lasi, bona idia mase lasi taudia be niuklia siahuna dikana ese do ia hadikadia lasi. Dirava ese tanobada do ia hadikaia lasi, to “tanobada idia hadikaia vadaeni taudia do [ia] alaia ore.”—Ioel 2:30, 31; Apokalupo 11:18.
2 Iehova ena hesiai taudia mai edia kamonai idia diba momokani gauna be inai: Herevana dahaka hadikaia siahuna be idia kahirakahira dekenai ia halasia, to do ia hamauridia diba. Idia diba, Iehova ese ‘salifa bona lahi guba amo ia negea diho’ bona hanua dikadia ruaosi Sodom bona Gomora ia hadikaia ore neganai, iena aneru ese Lot mai ena natuna kekeni rua danu idia hamauridia. (Genese 19:15-17, 24-26) Idia diba danu, Mose ena negai, Iehova ena ala-ala aneruna ese Egypt taudia edia vara guna memerodia iboudiai ia aladia mase neganai, Israel taudia edia ruma ia hanaidia, Pasova ena mamoe natuna ena rarana amo idia dahua rumadia unai. (Esodo 12:21-29) Unai hegeregerena, hisihisi badana ena hadikaia siahuna ia hamatamaia neganai, Iehova ese ia idia abidadama henia taudia do ia hamauridia.—Salamo 91:1, 2, 14-16; Isaia 26:20.
3 Momokani, Iehova ese do ia hamasedia taudia momo herea edia mase tauanidia be tanobada ena kopina dekenai do idia noho. To Dirava be roho mauri taudia edia mauri naria dalana ia diba herea. Ia gwau, ia ese manu bona animal do ia boiridia, iena “aria badana” dekenai do idia mai bona ia hamasedia taudia edia tauanina do idia ania bogakunu. (Apokalupo 19:17, 18; Esekiel 39:17-20) Do idia ania ore lasi gaudia be dala idauna amo do ia haorea diba. Bena Dirava ena palani tanobada totona, Eden dekenai ia gwauraia hegeregerena, be do ia hagugurua.
DIRAVA ENA PALANI ENA ANINA
4 Hisihisi badana amo do idia roho mauri taudia ese do idia davaria maurina be Iehova ese ia hahedinaraia, taunimanima be Eden dekenai ia atodia neganai. Tanobada be do idia noholaia totona ia hegaegaelaia neganai, Dirava ese au bona ava bona rei momo herea ia havaraia, bona gwarume, manu bona animal idauidau danu, do idia moalelaidia totona. “Iehova Dirava ese uma ta dina ia daekau kahana dekenai ia karaia, ladana Eden, bona unai gabu dekenai ia karaia vadaeni tauna ia atoa, unuseni ia noho.” (Genese 2:8) To Dirava ese tanobada ibounai be paradaiso ai ia halaoa lasi. Tau ginigunana mai ena adavana be ia ese ia hanamodia bona gaukara ia henidia. Unai gaukara lalonai edia diba bona aonega do idia gaukaralaia bona edia gaukara ena anina do idia moalelaia. Unai amo edia mauri ena anina do ia bada. Ia henidia gaukarana namona be inai: Edia natudia do idia hadibadia Dirava ena kara idia tohotohoa totona. Paradaiso do idia habadaia lao ela bona tanobada ena kahana ibounai, bona mauri gaudia iboudiai do idia naridia! Bema Adam bona Eva ese Iehova ena lohia siahuna idia matauraia noho, do idia mase lasi, to mauri goevadaena be tanobada dekenai do idia moalelaia ela bona hanaihanai.—Genese 1:26-28; 2:16, 17.
5 Momokani, hisihisi badana murinai tanobada ena oromana be Eden ena hegeregerena ai do ia lao haraga lasi. To Dirava ena palani tanobada bona taunimanima totodia be do ia idau lasi. Tanobada ibounai be Paradaiso ai do ia lao, taunimanima ese do idia naria, bona Dirava momokani do idia tomadiho henia mai edia lalo-tamona danu. Mauri hanaihanai bona Dirava ena natuna edia ura kwalimu mai hairaina do idia abia diba.—Luka 23:42, 43; Apokalupo 21:3, 4; Roma 8:20, 21.
6 Nega gunana ena momoru do idia kokia guna. Tuari gaudia do idia haidaua bena maino daladia ai do idia gaukaralaia. (Esekiel 39:8-10; Mika 4:3 itaia.) Uma edia anina do idia gogoa idia ania totona. Bena uhe do idia hadoa bona uma edia anina matamata do idia gogoa neganai, gwauhamata ta do ia momokani: “Tano ena anina do ia vara goevagoeva; Dirava, iseda Dirava, ese ita do ia hanamoa.” (Salamo 67:6; Deuteronomi 28:8 itaia.) Nega gunana ena mataganigani karadia bona taunimanima hapararadia gaudia idia ore dainai, ta be hanuaboi ai do ia hekure lasi mai ena hitolo danu.—Salamo 72:16.
7 Unai negai Iehova ese taunimanima iboudiai do ia hakaudia bona do ia hanamodia mai ena aonega bona mai ena lalokau danu, bona idia iboudiai ese iena kara do idia laloa bada. Iehova ese sibona ena Natuna, Iesu Keriso be tanobada ena King matamatana ai ia halaoa vadaeni. Bible ia gwau, Dirava ese ia ena amo tanobada bona idia noholaia gaudia iboudiai ia havaraia. (Kolose 1:15-17) Dirava ena Natuna be tanobada idia noholaia gaudia edia mauri durua dalana ia diba goevagoeva, bona taunimanima ia moalelaidia bada.—Hereva Lada-isidia 8:30, 31.
8 Danu, Natuna ese Iehova ena lohia siahuna ia abia isi. Bible ia gwau: “Ia latanai Iehova ena lauma do ia diho mai, aonega bona lalo-parara laumana, sisiba bona goada laumana, diba bona Iehova gari henia laumana; Iehova garina do ia moalelaia.” (Isaia 11:2, 3) Taunimanima do ia durudia, Iehova ena dala badinaia be unai bamona idia moalelaia totona. Ia pavapava neganai, hisihisi badana amo idia roho mauri taudia do ia hanamodia ela bona mauri goevadaena idia abia; Dirava ese unai bamona mauri ia lalohadailaia, iseda tubudia ruaosi be Eden dekenai ia hanohodia neganai.
IESU ENA KARA ENA ANINA
9 Unai bamona mauri ita abia totona, kara dika amo ita ia hamauria guna be namo. Ita ibounai be kara dika Adam ena amo ita abia; iena mauri goevadaena ia haboioa, Dirava ia gwau-edeede henia neganai. Kara dika dainai taunimanima idia gorere, edia tauanina idia dika, bona nega momo edia ura kereredia hegeregeredia idia hereva bona idia kara. Dokonai mase ia havaraia. (Roma 5:12; 6:23) Tanobada dekenai ia noho neganai, Iesu ese hoa karadia momo ia karaia, unai amo ia hahedinaraia, Dirava ena Basileia henunai do idia noho taudia be edena bamona do ia hamauridia.
10 To taunimanima haida be Iesu ena hoa karadia edia sivarai Bible lalonai idia duahia neganai, idia abia dae diba lasi. Reana idia haida idia laloa, bema saiens taudia ese unai hoa karadia idia tohotohoa diba eiava edia badina bema idia gwauraia hedinarai diba, vadaeni unai sivarai do idia abia dae. To dahaka dainai saiens taudia idia hekwarahi bada noho edia diba habadaia totona? Badina be gau momo idia do diba lasi dainai. To bema ita abia dae Dirava ese ena siahu taunimanima bogaragidiai ia hahedinaraia, Iesu ena hoa karadia edia sivarai ita abia dae be auka lasi.
11 Aposetolo Petro ia gwau: “Siahu kara bona hoa kara bona toa kara umui emui huanai Dirava ese ia karaia [Iesu] ena imana dekenai.” (Kara 2:22) Unai hoa karadia be “siahu kara,” taunimanima ese idia tohotohoa diba lasi bona edia badina idia gwauraia hedinarai diba lasi karadia; idia hamomokania Dirava ena siahu be Iesu ena amo ia gaukara noho. Idia be “toa kara,” idia hamomokania ia be Mesia, Dirava sibona ena Natuna, bona idia hahedinaraia dahaka gau namodia be vaira neganai do idia vara.
12 Iesu ena sivarai be Bible lalonai mani oi duahia, bona oi duahia noho lalonai, inai oi laloa noho: Iesu ena hoa karadia ese idia hahedinaraia ia ese Dirava ena Basileia henunai do idia noho taudia edena bamona do ia hanamodia. Lepra taudia do ia hanamodia—lepra taudia 10 be Ierusalem ia lao henia dalana dekenai ia hanamodia hegeregerena. Ia hahedinaraia ia ese unai bamona taudia ia durudia diba bona ia ura momokani unai bamona ia karaia. (Luka 17:11-19; Mareko 1:40-42) Taunimanima momo be marere diba lasi gorerena idia abia. Iesu ese idia danu do ia hanamodia—unai gorere ia abia tauna ta be gunaguna ia hanamoa hegeregerena; unai negai iena kara dika ia gwauatao danu.—Mareko 2:1-12.
13 Matakepulu taudia, taia kudima taudia bona idia hereva diba lasi taudia do ia hanamodia—gunaguna Galilea bona Hanua Gwauta dekenai ia karaia hegeregerena. (Mataio 9:27-30; Mareko 7:31-37) Hari inai negai gorere taudia momo be doketa taudia ese idia hanamodia diba lasi. Hahine ta Kaperanaum dekenai be unai bamona, “muramura taudia momo iena gorere idia hanamoa gwauraia, to idia be hegeregere lasi. Iena moni bona kohu ia negea ia ore, to iena gorere be ia bada noho.” To Iesu ese ia hanamoa, bona unai bamona taudia momo do ia hanamodia. (Mareko 5:25-29) Kansa, kudou gorerena, maleria—iboudiai do ia hanamodia diba, badina be gunaguna ia ese “gorere taudia bona hisihisi taudia ibounai ia hanamoa,” Galilea dekenai ia haroro loaloa neganai.—Mataio 9:35.
14 Unai neganai mase taudia do idia mauri lou. Unai be Dirava ese hisihisi badana lalonai ia hamasedia taudia lasi—to idau nega amo ema bona hari idia mase taudia milion momo—bena guna idia abia diba lasi gauna be do idia abia diba. Anina be dahaka, roho mauri taudia dekenai? Nain hanuana dekenai Iesu ese vabu ta ena taitai ia hadokoa, ena natuna merona tamona be mase amo ia hatoreaisi lou neganai. Kaperanaum dekenai tau ta mai ena adavana ia hamoaledia bada, edia natuna be mase amo ia hanogaia neganai. (Luka 7:11-16; Mareko 5:35-42) Oi ura emu lalokau taudia do oi itadia, mase amo do idia lou mai neganai, a? Idia roho mauri bena “tanobada matamatana” dekenai idia vareai taudia be unai bamona do idia moale dikadika.
15 Lalohisihisi bona lalo-metau be unai nega lalonai do idia vara lou lasi. Iesu ena hoa karadia sibodia lasi, to ena hahediba herevadia danu ese unai idia hahedinaraia, badina be iena hahediba taudia korikoridia sibodia do idia roho mauri bena “tanobada matamatana” do idia noholaia. (Ioane 3:36) Ena hahediba taudia ia hadibadia, lauma gaudia do idia tahua guna, Iehova do idia tabekau henia, Iena hahekau do idia tahua bona Iena hahenamo do idia laloa bada. Iesu be ena hereva bona kara amo ia hahedinaraia, lalokau, lalo-manau, hebogahisi bona heduru be mai anina bada. Hari inai negai, Keriso ena hahediba taudia ai idia lao bona unai dala idia badinaia taudia ese moale bada idia davaria, bona idia ese ma haida idia hamoaledia danu. (Mataio 11:28, 29; Ioane 13:34, 35) Inai lalokau lasi tanobadana do ia ore murinai idia do mauri taudia ese unai bamona moale do idia abia badabada. Bema hari oi aonega, unai mauri namona do oi abia diba.
[Study Questions]
1. Dahaka dainai “Iehova ena dina” ese tanobada do ia hadikaia vaitani lasi? (Isaia 45:18)
2. Dahaka dainai ita diba Iehova ese kamonai taudia be hisihisi badana amo do ia hamauridia?
3. Dahaka dainai mase tauanidia momo herea ese roho mauri taudia do idia hagoreredia diba lasi?
4. Iehova ese Adam bona Eva edena bamona mauri ia henidia, bona dahaka dainai unai be mai anina bada ita dekenai?
5. Hisihisi badana amo do idia roho mauri taudia be dahaka hahenamo do idia abia diba?
6. (a) Tuari gaudia be edena bamona do idia gaukaralaia? (b) Dahaka dainai taunimanima ta do ia hitolo lou lasi?
7. Iehova ese tanobada ena King matamatana ia abia hidi neganai, ena aonega bona lalokau edena bamona ia hahedinaraia?
8. Keriso ese tanobada taudia do ia durudia, Iehova ena lohia siahuna edena bamona idia laloa totona?
9. (a) Kara dika Adam ena amo ita abia ese dahaka ia havaraia? (b) Iesu ena hoa karadia ese dahaka helaro idia havaraia?
10. Iesu ena hoa karadia, saiens taudia ese idia karaia diba lasi karadia, edia sivarai be dahaka dainai ita abia dae diba?
11. Kara 2:22 dekenai, Iesu ena hoa karadia be edena bamona ia gwauraia, bona unai ese dahaka ia hahedinaraia?
12. (a) Lepra taudia ia hanamodia sivaraidia ese emu lalona edena bamona idia hagoadaia? (b) Iesu ese marere diba lasi gorerena ia abia tauna ia hanamoa neganai, dahaka danu ia karaia?
13. (a) Iesu ena hoa karadia ta ta oi gwauraia; idia dainai matakepulu taudia, taia kudima taudia, mu taudia bona doketa taudia ese idia hanamodia diba lasi taudia be helaro idia abia. (b) Dahaka dainai oi diba Iesu ese gorere idauidau iboudiai do ia hanamodia diba?
14. Iesu ese mase taudia ia hatorediaisi lou sivaraidia edia anina be dahaka, roho mauri taudia dekenai?
15. (a) Iesu ena hahediba herevadia ese tanobada do idia noholaia taudia edia kara edena bamona idia hahedinaraia? (b) Unai mauri ena mamina be hari edena bamona ita abia diba?
[Picture on page 33]
DIRAVA ENA PALANI TAUNIMANIMA TOTONA
Kara maoromaoro taudia amo tanobada do idia hahonua
Tanobada ibounai be Paradaiso ai do idia halaoa bona do idia naria; animal do idia naridia danu
Tanobada do idia noholaia ela bona hanaihanai