Mauri mai Mainona Tanobada Matamatana Lalonai

Inai pepapepa ai ia hedinarai laulauna oi itaia neganai, oi ura bada unai bamona maino, moale bona noho namona do oi davaria, ani? To bema ta ia laloa unai hahenamo be tanobada dekenai do ia davaria, unai be lalohadai kavakavana sibona, a?

Taunimanima momo idia laloa do idia davaria diba lasi, badina be tuari, raskol karadia, hitolo, gorere bona buruka idia vara noho dainai. To unai helaro be mai ena badina. Baibel ese vaira negana ia herevalaia neganai, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”​—2 Petero 3:13; Isaia 65:17.

Baibel ese ia gwauraia, “guba matamata” bona “tanobada matamata” be guba bona tanobada korikorina lasi. Idia be namo herea dainai do idia noho ela bona hanaihanai. (Salamo 89:​36, 37; 104:5) “Tanobada matamata” anina be kara maoromaoro besena, tanobada do idia noholaia, bona “guba matamata” anina be guba basileiana o gavamani goevadaena, unai tanobada noholaia taudia do ia lohiadia. To unai “tanobada matamata” do ia vara momokani, a?

Matamana neganai, Dirava ena ura be taunimanima ese unai bamona noho namo hereana be tanobada dekenai do idia abia. Tau bona hahine ginigunana be tanobada ena Paradaiso ladana Eden dekenai ia atoa, bena ia hamaorodia, ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.” (Genese 1:28) Oibe, Dirava ena ura be, natudia do idia havaraia bona edia Paradaiso do idia habadaia lao ela bona tanobada dokona. Ena be gabeai Dirava idia gwau-edeede henia dainai mauri hanaihanai idia haboioa, to Dirava ese ena ura ia haidaua lasi. Bona tanobada matamatana lalonai unai do ia hagugurua!​—Isaia 55:11.

Momokani, Lohiabada ena Guriguri lalonai Dirava ena Basileia ena mai oi gurigurilaia neganai, oi hahedinaraia oi ura ena guba gavamanina ese kara dika do ia haorea bena tanobada matamatana do ia lohiaia. (Mataio 6:​9, 10) Ita diba momokani Dirava ese unai guriguri do ia haerelaia, badina be Baibel amo ia gwauhamata: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 37:29.

Mauri, Dirava Ena Tanobada Matamatana Ai

Matamana neganai Dirava ena ura hegeregerena, iena Basileia ese ena bese taudia tanobada dekenai do ia hanamodia bada. Badu bona lalodika do idia ore, bona tanobada taudia iboudiai do idia hetura heheni momokani. Dirava ena gwauhamata be, ‘tuari do ia hadokoa tanobada ena kahana ibounai dekenai.’ “Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.”​—Salamo 46:9; Isaia 2:4.

Tanobada ibounai be paradaiso hairaina ai do idia halaoa. Baibel ia gwau: “Taunimanima idia noho lasi tanona, bona tano kaukauna be do idia moale, bona palauapalaua be unai tano dekenai do idia tubu namonamo. . . . Tano kaukau dekenai, be sinavai do idia vara, bona edia ranu be, tano do ia heau hanaia lao. Miri tano mai ena siahu bada, be ranu gabuna do ia lao, bona tano kaukauna be gohu do ia lao.”​—Isaia 35:​1, 6, 7.

Taunimanima be paradaiso tanobadana dekenai do idia moale. Aniani totona do idia hitolo lou lasi. Baibel ia gwau: “Tano ena anina idia vara namonamo.” (Salamo 67:6; 72:16) Idia ibounai ese edia gaukara ena anina do idia moalelaia, badina be iseda Havaraia Tauna ia gwauhamata: “Idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi.”​—Isaia 65:​21, 22.

Dirava ena tanobada matamatana lalonai, taunimanima ese ruma dikadia do idia noholaia lasi, badina be Dirava ia gwau: “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi.” Danu, Baibel ia gwauhamata: “Do idia hekwarahi kava lasi.” (Isaia 65:​21-23) Unai dainai taunimanima edia mauri be mai anina, bona edia gaukara do idia moalelaia. Edia mauri do idia hesikulaia lasi.

Dirava ena Basileia ese guna Eden umana lalonai ia noho mainona, animal idauidau edia huanai bona animal bona taunimanima huanai do ia havaraia lou. Baibel ia gwau: “Uda sisia bona mamoe, be do idia noho hebou mai maino danu, bona taiga be nanigosi danu do idia hekure hebou. Boromakau natuna bona laiona natuna be do idia aniani hebou, bona taunimanima ena natuna maragina ta ese do ia hakaudia.”​—Isaia 11:​6-9; Hosea 2:18.

Mani inai oi laloa, Paradaiso tanobadana lalonai gorere iboudiai do idia ore! Baibel ena gwauhamata be, “Ta ese do ia gwau lasi, ‘Lau be gorere.’ ” (Isaia 33:24) “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:4.

Unai Gabu Dekenai Oi Noho Diba Dalana

Momokani, Dirava ena gwauhamata, kara maoromaoro tanobada matamatana totona ese emu lalona ia hamoalea bada. Reana taunimanima haida idia laloa unai hahenamo do idia vara diba lasi, to iseda lalokau Diravana ia hegeregere do ia havaraia totona.​—Salamo 145:16; Mika 4:4.

To tanobada Paradaisona lalonai mauri hanaihanai do ita abia totona, namona be kara haida do ita karaia. Iesu ese guriguri lalonai unai kara badana ta ia gwauraia: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​—Ioane 17:3.

Vadaeni, bema ita ura Dirava ena tanobada matamatana do ita noholaia, namona be Dirava ena ura ita dibaia bona karaia. Badina be inai “tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” Bona iseda lalokau Diravana ena hahenamo do ita moalelaia ela bona hanaihanai.​—1 Ioane 2:17.

Baibel siridia be Hiri Motu Buka Helaga, Bible Society of Papua New Guinea ese ia karaia gauna amo.