Karoa 44
Apokalupo Bukana Bona Oi
IERUSALEM Matamatana ena toana namona ita duahia murinai, reana do ita henanadai: ‘Unai bamona gau hereadaena ia vara momokani diba, a?’ Ioane ese unai henanadai ia haerelaia totona aneru ena hereva ia gwauraia: “Aneru ese lau ia hamaoroa, ia gwau, ‘Inai hereva be maoromaoro bona momokani, bona inai hereva do oi abidadama henia diba. Lohiabada Dirava ese iena Lauma Helaga iena peroveta taudia dekenai ia henia noho. Ia ese iena aneru ia siaia vadaeni, kahirakahira do idia vara gaudia, iena hesiai taudia dekenai do ia hadibaia totona.’ Iesu ia hereva, ia gwau, ‘Kamonai! Lau be do lau mai haraga! Inai buka ena peroveta herevadia idia kamonai henia taudia be do idia moale!’ ” (Apokalupo 22:6, 7) Momokani, Apokalupo bukana ena gwauhamata hereva iboudiai do idia guguru! Aneru be Iesu ena ladanai ia gwau Iesu do ia mai “haraga.” Unai negana ai, Iesu be “henaoa tauna bamona” do ia mai Iehova ena inai taudia do ia hadikaia ore totona bona Apokalupo ena hagugurua negana do ia hamatamaia totona. (Apokalupo 16:15, 16) Unai dainai namona be iseda mauri lalonai “inai buka,” Apokalupo bukana, ena hereva ita badinaia, bena unai negai do idia gwau ita moale.
2 Ita hoa lasi bema Ioane ese ia kamonaia bona ia itaia gaudia momo dainai, ia hoa dikadika. Ia gwau: “Lau Ioane ese inai hereva ibounai lau kamonai, bona inai kara ibounai lau itaia. Bona unai gaudia lau itaia bona kamonai haorea neganai, lau dekenai unai gaudia ia hedinaraia aneruna ena aena badinai lau tui diho, do lau tomadiho henia totona. To lau dekenai ia hereva, ia gwau, ‘Unai bamona do oi karaia lasi. Lau be hesiai tauna, oi bamona, bona lau be oiemu varavara peroveta taudia edia gaukara hebou tauna danu. Bona lau be, inai buka ena hereva idia kamonai henia taudia ibounai edia gaukara hebou tauna danu. Dirava sibona do oi tomadiho henia.’ ” (Apokalupo 22:8, 9; Apokalupo 19:10 itaia danu.) Unai sisiba nega rua idia henia, aneru ita tomadiho henia lasi, be sisiba badana Ioane ena nega lalonai. Unai negai haida ese aneru idia tomadiho henia eiava idia gwau aneru ese hehuni gaudia be idia dekenai idia hahedinaraia. (1 Korinto 13:1; Galatia 1:8; Kolose 2:18) Hari inai negai, unai sisiba ia hahedinaraia, gau badana be Dirava mo sibona ita tomadiho henia. (Mataio 4:10) Tomadiho goevana ita hamiroa lasi totona, ma tau ta o ma gau ta ita tomadiho henia lasi.—Isaia 42:5, 8.
3 Ioane be ma ia gwau: “Ma lau ia hamaoroa, ia gwau, ‘Inai buka ena peroveta hereva do oi hunia lasi, badina be Dirava ese inai kara do ia karaia ena nega be kahirakahira. Vadaeni kara dika tauna, be kara dika do ia karaia noho. Lebulebu tauna, be lebulebu do ia karaia noho. Kara maoromaoro tauna, be kara maoromaoro do ia karaia noho. Bona helaga tauna, be helaga kara do ia karaia noho.’ ”—Apokalupo 22:10, 11.
4 Hari inai negai horoa orena taudia ese aneru ena hereva idia badinaia. Buka ena peroveta herevadia idia hunidia lasi. Nega ginigunanai, Zion’s Watch Tower and Herald of Christ’s Presence (July 1879) magasin idia printaia neganai, Apokalupo bukana ena siri momo idia gwauraia. Bona inai buka ena karoa ginigunana lalonai ita gwauraia hedinarai hegeregerena, idia hanai vadaeni laganidia lalonai, Iehova Ena Witnes taudia ese buka haida idia printaia, Apokalupo bukana ena hereva idia hahedinaraia goevagoeva totona. Hari, hereva momokani idia ura henia taudia iboudiai ai veria, Apokalupo bukana ena peroveta herevadia bona edia guguru do idia laloa namonamo totona.
5 Bema taunimanima idia ura lasi Apokalupo bukana ena sisiba bona heduru herevadia idia abia dae, vadaeni, unai be idia sibodia! “Kara dika tauna, be kara dika do ia karaia noho.” Bema haida idia abia hidi dalana be inai nega dikana ena gau mirodia dekenai do idia noho, vadaeni, unai miro dekenai do idia mase. Kahirakahira, Babulono Badana do idia hadikaia ore bena Iehova ena hahemaoro karadia iboudiai do idia karaia haorea. Namona be lalo-manau taudia ese peroveta tauna ena hereva idia badinadia “Iehova umui tahua. Kara maoromaoro umui tahua, lalo-manau umui tahua; bena reana do umui hehuni diba Iehova ena badu dinana ai.” (Sepanaia 2:3) Iehova dekenai idia gwauhamata vadaeni taudia dekenai inai bamona idia hereva, idia gwau: “Kara maoromaoro tauna, be kara maoromaoro do ia karaia noho. Bona helaga tauna, be helaga kara do ia karaia noho.” Aonega taudia idia diba, kara dika be nega sisina lalonai ia havaraia gau namodia be anina lasi gaudia to kara maoromaoro bona kara helaga idia badinaia taudia be gabeai do idia abia hahenamo be anina bada momokani gaudia. Baibel ia gwau: “Umui sibona emui kara do umui tahua, bona emui mauri do umui dibaia, umui be abidadama korikori taudia o lasi.” (2 Korinto 13:5) Oi abia hidi bona oi karaia noho dalana hegeregerena, emu davana do oi abia.—Salamo 19:9-11; 58:10, 11.
6 Noho hanaihanai King, Iehova, be inai peroveta herevana lalonai nega ginigabena Apokalupo bukana idia duahia taudia ia hereva henidia, ia gwau: “ ‘Kamonai! Lau be karaharaga umui dekenai do lau mai! Taunimanima edia gaukara davana be lauegu imana dekenai idia noho. Taunimanima ibounai edia kara hegeregerena edia davana do lau henia. Lau be Alepa bona Omega, ginigunana bona gini gabena, matamana bona dokona.’ Edia dabua idia huria taudia be idia moale. Badina be inai: Idia be mai edia maoro mauri auna ena huahua do idia ania. Bona mai edia maoro danu hanua ena iduara do idia raka vareai. To murimuri dekenai be [sisia] kara bodaga taudia, bona dika bada idia karaia taudia, meamea taudia, matabodaga taudia, ala-ala taudia, kaivakuku idia tomadiho henia taudia, bona koikoi idia ura henia bona badinaia taudia idia noho.”—Apokalupo 22:12-15.
7 Vadaeni, Iehova Dirava ia hahedinaraia lou ia be atai herea lohiana ela bona hanaihanai bona iena ura ginigunadia be gabeai do ia karaia. Ia be “karaharaga” do ia mai panisi do ia henia totona, bona ia idia tahua goadagoada taudia iboudiai edia davana namona do ia henidia totona. (Heberu 11:6) Iena taravatu hegeregerena, haida be davana namona do idia abia bona Dirava ese ma haida do ia dadaraia. Kerisendom ena dubu gunalaia taudia be “gadona lasi sisiadia” bamona idia karaia, bona Iehova be unai siri lalonai ia gwauraia kara dika idia koua lasi. (Isaia 56:10-12; Deuteronomi 23:18, New World Translation Reference Bible, futnout itaia danu.) Momokani, idia ese hahediba koikoi herevadia ‘idia ura henia bona idia badinaia’ bona Iesu be kongregesen 7 dekenai ia henia sisiba ibounai idia dadaraia. Unai dainai, Ierusalem Matamatana lalonai do idia vareai lasi.
8 Horoa Keristen taudia sibodia, “edia dabua idia huria” Iehova ena matana ai do idia goeva totona taudia, be mai edia gwaumaoro “mauri auna ena huahua do idia ania.” Anina be idia be mai edia gwaumaoro guba dekenai ia doko diba lasi maurina do idia abia totona. (Genese 3:22-24; Apokalupo 2:7; 3:4, 5 itaia danu.) Taunimanima bamona idia mase murinai, idia toreisi lou bona Ierusalem Matamatana lalonai idia vareai. Aneru 12 ese edia dala idia koua lasi, to koikoi taudia bona kara miro taudia idia lulua, ena be unai taudia idia gwau guba dekenai do idia lao. Tanobada dekenai hutuma bada herea taudia danu “ese edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro momokani.” Gau badana be unai bamona idia goeva noho. Unai do idia karaia totona, Iehova be unai siri lalonai ia sisibalaia kara dikadia amo idia gini siri be gau badana, bona namona be Iesu ena sisiba kongregesen 7 dekenai idia abia dae.—Apokalupo 7:14; karoa 2 bona 3.
9 Iehova ia hereva murinai, Iesu ia hereva. Ia ese hagoadaia herevadia be Apokalupo bukana idia duahia kudou-maoro taudia dekenai ia gwauraia, ia gwau: “Lau Iesu, lauegu aneru umui dekenai lau siaia, inai hereva ekalesia oreadia dekenai do ia gwauraia totona. Lau be Davida ena natuna ta, Davida ena bese tauna. Lau be unai hisiu bada, daba rere neganai ia diaridiari gauna.” (Apokalupo 22:16) Oibe, unai hereva be “ekalesia oreadia” totona. Iesu ena hereva be horoa Keristen taudia tanobada dekenai idia siaidia guna. Apokalupo bukana lalonai idia torea herevadia iboudiai be horoa Keristen taudia dekenai idia siaidia guna, unai taudia be gabeai Ierusalem Matamatana lalonai do idia vareai. Unai kongregesen ena amo, hutuma bada herea taudia danu be unai peroveta herevadia namodia dekenai idia lalo-parara.—Ioane 17:18-21.
10 Dirava ese maduna be Iesu Keriso ia henia Apokalupo ena hereva be Ioane dekenai ia henia bena Ioane ena amo kongregesen dekenai do ia siaia totona. Iesu be “Davida ena natuna ta, Davida ena bese tauna.” Tanobada tauna bamona, Iesu be David ena amo ia mai bona unai dainai ia hegeregere Iehova ena Basileia ena Pavapava ai do ia lao. Danu, ia be David ena “Noho Hanaihanai Tamana,” bona unai dala amo David ena “ramuna.” (Isaia 9:6; 11:1, 10) Ia be David besena amo do ia noho hanaihanai, bona ia mase diba lasi Pavapavana. Unai dainai Iesu ese Iehova ena gwauhamata David dekenai ia hagugurua. Danu, ia be “hisiu bada, daba rere neganai ia diaridiari gauna,” Mose ena negai idia perovetalaia gauna. (Numera 24:17; Salamo 89:34-37) Ia be “daba ena hisiu bada”; ia daekau neganai daba ia rere. (2 Petero 1:19) Dagedage tauna badana, Babulono Badana, ena koikoi karadia iboudiai ese iena daekau dalana idia koua diba lasi.
Oi Gwau: “Oi Mai”!
11 Vadaeni, Ioane ia hereva. Ia ese ia itaia gaudia bona ia kamonaia gaudia iboudiai iena kudouna lalonai ia laloa bada dainai, ia gwau: “Lauma Helaga bona Headava Matamata Hahine idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Iesu ena boubou ena namo be 144,000 taudia do idia durudia, to idia sibona lasi. Unai boiboi amo taunimanima iboudiai idia boiria. Iehova ena lauma helaga be headava matamata kekeni oreana ena amo ia gaukara, unai dainai inai sivarai idia boiboilaia goevagoeva noho: “Mauri ranuna do umui abia, ia be davana lasi.” (Isaia 55:1; 59:21 itaia danu.) Kara maoromaoro idia tahua goadagoada taudia iboudiai idia boiridia, do idia “mai” Iehova ena hariharibada do idia abia dae totona. (Mataio 5:3, 6) Tanobada dekenai mauri do idia abia taudia, bema Ioane oreana horoa taudia edia boiboi dekenai idia kamonai, hahenamo bada herea do idia abia!
12 Lagani 1931 bamona amo, hutuma bada herea taudia momo be unai boiboi idia “kamonai”—unai boiboi idia hakala henia. Edia horoa hesiai bamodia hegeregerena, Iehova vairanai idia be kara goeva taudia bamona idia gini. Mai edia ura dikadika danu idia naria ela bona Ierusalem Matamatana be guba dekena amo do ia diho mai, hahenamo be taunimanima dekenai do ia henidia totona. Apokalupo ena sivarai badana idia kamonai murinai, hutuma bada herea taudia idia gwau, “Oi mai” sibona lasi, to ma taunimanima haida be Iehova ena orea dekenai idia haboudia, bona unai taudia danu idia hadibadia, do idia gwau: “Ranu mase taudia, umui mai.” Unai dainai, hutuma bada herea taudia edia namba ia bada daekau noho, bona tano 235 lalonai unai taudia 6,000,000 bona ma haida bona horoa headava matamata kekeni oreana taudia, kahirakahira 8,700 bamona, idia gaukara hebou bona taunimanima idia boiria, “mauri ranuna do [idia] abia dae, ia be davana lasi.”
13 Bena, Iesu ia hereva lou, ia gwau: “Lau [Iesu] ese inai buka ena peroveta hereva idia kamonai noho taudia lau sisiba henia inai. Tau ta ese bema inai hereva latanai hereva haida ma do ia atoa kau neganai, Dirava ese inai buka lalonai idia torea hisihisi, unai tau latanai do ia atoa kau. Bona bema tau ta ese hereva ta inai peroveta bukana dekena amo do ia kokia, Dirava ese unai tau ena davana namona do ia kokia. Oibe, ia ese mauri auna do ia ania diba lasi. Bona ia be Hanua Helagana do ia vareai diba lasi. Inai davana namodia ruaosi be inai buka ese ia herevalaia vadaeni.”—Apokalupo 22:18, 19.
14 Ioane oreana taudia ese Apokalupo ena “peroveta hereva” idia gwauraia hedinarai be gau badana. Unai peroveta hereva idia hunia eiava ia dekenai ma hereva ta idia atoa kau be namo lasi. Gau badana be unai hereva idia harorolaia hedinarai, “ruma ena atai dekena amo.” (Mataio 10:27) Iena lauma helaga amo Dirava ese Apokalupo bukana ia havaraia. Daika ia gari lasi bona Dirava ena hereva ta, ia lohia noho Pavapavana, Iesu Keriso, ena amo ia gwauraia herevana ta, do ia haidaua toho? Momokani, unai bamona tauna ese mauri hanaihanai helarona ia haboioa bona Babulono Badana bona inai tanobada ibounai ese do idia abia hisihisidia ia abia be maoro.
15 Iesu ese lalona hagoadaia herevana ma ta ia gwauraia, ia gwau: “Inai hereva ibounai ia gwauraia hedinarai Tauna ia gwau, ‘Oibe, momokani, lau be kahirakahira do lau mai.’ ” (Apokalupo 22:20a) Iesu be “hereva momokani tauna, bona Dirava ena hereva ia gwauraia maoromaoro tauna.” (Apokalupo 3:14) Ia ese Apokalupo bukana ena matahanai ia gwauraia hedinarai, unai dainai ita diba unai matahanai be momokani. Ia bona Iehova Dirava be nega momo idia gwau do idia mai “haraga,” eiava kahirakahira do idia mai. Hari siri lalonai Iesu be nega namba 5 unai bamona ia hereva. (Apokalupo 2:16; 3:11; 22:7, 12, 20) Do ia “mai,” ariara hahine badana, politikol “king” taudia, bona “iseda Lohiabada [Iehova] bona ena Keriso” edia basileia idia koua toho taudia iboudiai dekenai hahemaoro davana do ia henidia totona.—Apokalupo 11:15; 16:14, 16; 17:1, 12-14.
16 Oi diba Iehova Dirava bona Iesu do idia mai haraga dainai, namona be “Dirava ena Dina do [oi] naria noho, bona do ia ginidae haraga totona do [oi] gaukara goada noho.” (2 Petero 3:12) Satana ena tanobada ena orea be hegeregere ia moru haraga lasi bamona, to momokani do ia moru. Satana henunai, inai tanobada ena guba, ena lohia taudia unai, bema idia kwalimu, edia kwalimu do ia ore haraga. Unai gaudia iboudiai do idia ore. (Apokalupo 21:1) Do idia noho hanaihanai gaudia be Iehova, iena Basileia Iesu Keriso henunai, bona iena tanobada matamatana sibodia. Unai oi laloaboio lasi!—1 Ioane 2:15-17.
17 Namona be Apokalupo bukana oi stadilaia neganai oi dibaia gaudia be emu mauri lalonai oi badinaia namonamo. Nega sisina lalonai Iehova ena noho gabuna guba dekenai laulau ai oi itaia dainai, oi diba iseda Havaraia Tauna ia hairai herea bona ia helaga herea, ani? (Apokalupo 4:1–5:14) Unai bamona Diravana ita hesiai henia be hahenamo badana ta! Iena helaga oi laloa bada dainai, namona be Iesu ena sisiba kongregesen 7 dekenai oi laloa namonamo, bona kohu ura dikadika, kaivakuku tomadiho henia, heudahanai, lalo-rua, hahediba koikoi amo tadikaka hapararaia karana, bona Iehova ese ia dadaraia karadia ma iboudiai amo oi gini siri, Iehova ese emu hesiai gaukara do ia abia dae totona. (Apokalupo 2:1–3:22) Aposetolo Petero be Ioane oreana taudia dekenai ia gwauraidia herevadia be mai anina hutuma bada herea taudia dekenai danu, ia gwau: “To emui kara ibounai lalonai do umui helaga, umui ia boiria Diravana [be] ia helaga hegeregerena.”—1 Petero 1:15, 16.
18 Danu, namona be “Iehova ena lalo-namo laganina bona dika davana henia dinana, iseda Dirava ena” oi harorolaia goadagoada. (Isaia 35:4; 61:2) Herevana oi be seri maragi tauna ta eiava oi be hutuma bada herea tauna ta, to namona be emu diba hegeregerena, emu haroro gaukara amo Iehova ena badu disi 7 idia bubua noho, bona Iehova ena hahemaoro Satana ena tanobada dekenai oi gwauraidia hedinarai be namo. Danu, namona be Iehova bona iena Keriso edia Basileia ena noho hanaihanai sivarai namona oi harorolaia, mai emu moale danu. (Apokalupo 11:15; 14:6, 7) Namona be unai gaukara oi karaia goadagoada. Bona namona be Iehova idia do hesiai henia lasi taudia momo idia diba, hari ita be Lohiabada ena dina lalonai ita noho, bona namona be unai diba dainai sivarai namona harorolaia gaukarana lalonai idia vareai. Namona be unai bamona taudia idia goada idia lao ela bona Dirava dekenai idia gwauhamata bona bapatiso idia abia. Oi laloatao, “inai gaudia ibounai do idia vara ena nega be ia kahirakahira vadaeni”!—Apokalupo 1:3.
19 Ioane hegeregerena, ita guriguri goadagoada, ita gwau: “Amen. Lohiabada Iesu e, oi mai.” Bona aposetolo burukana, Ioane, be ma ia gwau: “Lohiabada Iesu ena hariharibada umui ibounai dekenai do ia noho.” (Apokalupo 22:20b, 21) Inai buka umui duahia taudia ibounai e, iena hariharibada be umui dekenai do ia noho be namo. Namona be umui abidadama Apokalupo ena hagugurua negana be ia kahirakahira, bena umui danu be mai emui kudou ibounai ida do umui gwau: “Amen”!
[Study Questions]
1. (a) Aneru ese Ioane ia hamaoroa, Apokalupo bukana lalonai idia noho gwauhamata hereva iboudiai be edena bamona herevadia? (b) Daika ia gwau “Lau be do lau mai haraga,” bona edena negai do ia “mai”?
2. (a) Ioane ese ia itaia bona ia kamonaia gaudia iboudiai dainai dahaka ia karaia, bona aneru ese dahaka ia hamaoroa? (b) Aneru ia gwau: “Unai bamona do oi karaia lasi” bona “Dirava sibona do oi tomadiho henia.” Unai hereva dainai dahaka ita diba?
3, 4. Aneru ese Ioane dekenai dahaka ia gwauraia, bona horoa orena taudia ese iena hereva edena bamona idia badinaia?
5. (a) Bema haida ese Apokalupo bukana ena sisiba bona heduru herevadia idia dadaraia, idia be edena bamona? (b) Lalo-manau bona kara maoromaoro taudia ese dahaka idia karaia be namo?
6. Apokalupo bukana idia duahia taudia dekenai Iehova ena hereva ginigabena unai peroveta herevana lalonai be dahaka?
7. (a) Iehova be “karaharaga” do ia mai dahaka do ia karaia totona? (b) Dahaka dainai Kerisendom ena dubu gunalaia taudia be Ierusalem Matamatana lalonai do idia vareai diba lasi?
8. (a) Daidia sibodia be mai edia gwaumaoro “mauri auna ena huahua do idia ania,” bona unai hereva ena anina be dahaka? (b) Hutuma bada herea taudia be edena bamona “edia dabua idia huria,” bona idia be Dirava vairanai kara goeva taudia bamona edena bamona idia gini noho diba?
9. Iesu ese dahaka hereva ia gwauraidia, bona iena hereva bona Apokalupo bukana ena hereva ibounai be daidia dekenai ia siaidia guna?
10. Dahaka dainai Iesu ia gwau ia be (a) “Davida ena natuna ta, Davida ena bese tauna”? (b) “hisiu bada, daba rere neganai ia diaridiari gauna”?
11. Ioane ese dahaka boiboi taunimanima iboudiai dekenai ia gwauraia, bona daidia be unai boiboi dekenai idia kamonai diba?
12. Apokalupo 22:17 ena boiboi dainai, hutuma bada herea taudia ese dahaka idia karaia?
13. Iesu ese dahaka sisiba ia henia?
14. Ioane oreana taudia ese Apokalupo ena “peroveta hereva” edena bamona idia laloa?
15. Iesu ia gwau ia be “inai hereva ibounai ia gwauraia hedinarai Tauna,” bona “lau be kahirakahira do lau mai.” Iena hereva edia anina be dahaka?
16. Oi diba Iehova Dirava bona Iesu do idia mai haraga, unai dainai namona be dahaka oi karaia?
17. Iehova ena helaga oi laloa bada dainai, dahaka oi karaia be namo?
18. Namona be dahaka gaukara oi karaia goadagoada, bona dahaka dainai unai gaukara be mai anina bada hari inai negai?
19. Aposetolo burukana, Ioane, ena hereva ginigabedia be dahaka, bona oiemu haere be dahaka?
[Picture on page 314]
“Murimuri dekenai be [sisia] kara bodaga taudia . . . ”
[Picture on page 315]
“Mai edia maoro danu hanua ena iduara do idia raka vareai” taudia do idia moale