Karoa 10

Dirava Ena Basileia Ia Lohia Noho

1, 2. Taunimanima edia gavamani be edena bamona idia hegeregere lasi?

REANA masini ta oi hoia murinai, oi davaria ia gaukara lasi. Mekaniki oi boiria bena ia “hanamoa,” to nega daudau lasi ia dika lou. Unai oi lalohisihisilaia bada!

² Taunimanima edia gavamani be unai bamona. Nega ibounai taunimanima idia ura gavamani ta ese maino bona moale do ia havaraia momokani. Ena be edia bese edia hekwakwanai idia hanamodia toho, to idia kwalimu momokani lasi. Maino gwauhamatadia momo idia karaia—bena idia utudia. Inai danu, edena gavamani ese ogogami, badu, kara dika, gorere, bona tanobada hadikaia karadia ia haorea vadaeni? Taunimanima edia lohia dalana ia dika, bona hanamoa dalana be lasi. Israela ena aonega tauna King Solomona danu ia henanadai, ia gwau: “Edena bamona ita sibona ese, iseda mauri ena dala do ita diba?”—Aonega Herevadia 20:24.

3. (a) Iesu ese dahaka ia harorolaia badabada? (b) Haida ese Dirava ena Basileia edena bamona idia herevalaia?

³ Oi lalohisihisi lasi! Tanobada ibounai do ia naria gavamanina namona be helaro kava gauna mo lasi. Iesu ese ia harorolaia badabada. Ena ladana ia hatoa “Dirava ena Basileia,” bona ena hahediba taudia ia hadibaia do idia gurigurilaia. (Luka 11:2; 21:31) Nega haida tomadiho oreadia lalodiai Dirava ena Basileia idia herevalaia, bona taunimanima milioni ese dina iboudiai idia gurigurilaia, Lohiabada ese ia gwauraia gurigurina idia gwauraia loulou negadiai. To inai henanadai, “Dirava ena Basileia be dahaka?” be dala idauidau amo idia haerelaia. Haida idia gwau, “Ia be emu lalona ai.” Ma haida idia gwau ia be guba. Baibel ena haere maorona mani do ita tahua.

IA PALANIA BASILEIANA

4, 5. Dahaka dainai Dirava ese ena lohia siahuna hahedinaraia dalana matamatana ia palania, bona unai ese dahaka do ia karaia?

⁴ Nega ibounai Iehova Dirava be guba bona tanobada edia Pavapava o Siahu Ibounai Lohiabadana. Unai atai dagina ia abia, badina be ia ese gau iboudiai ia karaia. (1 Sivarai 29:11; Salamo 103:19; Kara 4:24) Iena lohia siahuna, gabu iboudiai ia gaukaralaia, ese Iesu ia harorolaia Basileiana ia hereaia. Unai Mesia Basileiana ia palania gaukara ta karaia totona. Unai gaukara be dahaka?

⁵ Karoa 6 ese ia gwauraia bamona, taunimanima ginigunadia ruaosi ese Dirava ena lohia siahuna idia dadaraia. Unai neganai idia vara henanadaidia dainai, Iehova ese ena lohia siahuna hahedinaraia dalana matamatana ia lalohadailaia. Ena palani ia gwauraia, ia gwau “garana” ta do ia havaraia, bena unai garana ese Gaigai, Satani, do ia moia, bona taunimanima edia kara dika, Adamu ena amo idia abia, ena anina be do ia haorea. “Garana” badana be Iesu; ia ese “Dirava ena Basileia” amo Satani do ia halusia vaitani. Unai Basileia amo, Iesu Keriso ese Iehova ena ladanai Iena lohia siahuna maorona be tanobada ai do ia haginia lou, bena do ia hamomokania ela bona hanaihanai.—Genese 3:15, NW; Salamo 2:2-9.

6, 7. (a) Basileia be edeseniai, bona King bona idia bamoa lohiadia be daidia? (b) Basileia ese daidia ia lohiaia?

⁶ Iesu ese Farisea taudia dikadia dekenai ia gwauraia herevadia be Hiri Motu Baibel lalonai inai bamona idia torea hanai: “Dirava ena Basileia be umui emui lalona dekenai ia noho.” (Luka 17:21) Iesu ena hereva ena anina be Basileia be unai kerere taudia edia kudou dikadia lalodiai, a? Lasi. Unai hereva be Greek gado amo hahanaia dalana maorona be inai: “Dirava ena Basileia be umui bogaraginai ia noho.” (NW) Idia bogaragidiai ia noho tauna, Iesu, ese sibona ia gwauraia unai, ia be King ai do ia lao tauna. Dirava ena Basileia be taunimanima ena lalona ai ia noho gauna lasi; ia be ia gaukara noho gavamanina ta, mai ena lohia bona mai ena taunimanima. Ia be guba gavamanina, unai dainai idia gwauraia “Guba Basileia” bona “Dirava ena Basileia” danu. (Mataio 13:11; Luka 8:10) Ena Lohia be peroveta tauna Daniela ese mata hanai lalonai ia itaia, “ia be taunimanima ena natuna ta bamona”; Siahu Ibounai Diravana vairanai idia hakaua lao, bena ia ese “lohia siahuna bona hairai bona basileia ia henia, taunimanima iboudiai, basileia idauidau bona gado idauidau taudia, ese ena hesiai do idia lao henia totona.” (Daniela 7:13, 14, NW) Unai King be daika? Baibel ese Iesu Keriso ia gwauraia “Taunimanima ena Natuna.” (Mataio 12:40; Luka 17:26) Oibe, Iehova ese ena Natuna, Iesu Keriso, ia abia hidi, King ai do ia lao totona.

⁷ Iesu be sibona ia lohia lasi. Ia ida be 144,000, idia be “tanobada dekena amo ia hamauria,” ia ida pavapava bona hahelaga taudia ai idia lao totona. (Apokalupo 5:9, 10; 14:1, 3; Luka 22:28-30) Dirava ena Basileia ese tanobada ibounai besena do ia lohiadia, Keriso idia kamonai henia taudia unai. (Salamo 72:7, 8) To, edena bamona ita diba momokani Basileia ese Dirava ena lohia siahuna do ia hamomokania bona paradaiso be tanobada dekenai do ia havaraia lou?

BASILEIA BE GAU KORIKORINA

8, 9. (a) Dirava ena Basileia gwauhamatadia edia momokani be dahaka haheitalai amo ita hahedinaraia diba? (b) Dahaka dainai ita diba momokani Basileia be gau korikorina?

⁸ Mani inai oi laloa: Lahi ese emu ruma ia gabua ore vadaeni. Emu turana ta, taga tauna, ia gwauhamata oi do ia durua emu ruma do oi haginia lou bona emu famili do oi ubua totona. Bema guna ia be nega ibounai ia hereva momokani, ena hereva oi abia dae, ani? Kerukeru oi be gaukara amo oi lou mai neganai, bema oi davaria emu ruma ena momoru idia kokia matamaia vadaeni bona aniani idia mailaia vadaeni emu famili edia, oi be momokani oi diba gabeai emu gau do idia hanamodia lou, ela bona edia namo gunana do idia hereaia.

⁹ Unai hegeregerena, Iehova ese ia hamomokania Basileia be gau korikorina ta. Baibel bukana Heberu ese ia hahedinaraia Taravatu ena gau momo be Basileia ena laulau. (Heberu 10:1) Dirava ena Basileia idia laulaulaia gaudia be Israela basileiana lalonai idia hedinarai danu. Unai gavamani be idau, badina be ena pavapava be “[Iehova] ena terona” latanai idia helai. (1 Sivarai 29:23) Inai danu, Iakobo ia peroveta, ia gwau: “Kepata, lohia ena toana, be Iuda ese do ia dogoatao . . . ela bona siahu momokani ena biaguna, Silo, do ia mai. Vadaeni ia dekenai bese ibounai ese, dohore idia kamonai henia.” (Genese 49:10)a Oibe, unai Iudea pavapava iduhuna lalonai, Iesu, Dirava ena gavamani ena King hanaihanai, be do ia vara.—Luka 1:32, 33.

10. (a) Edena negai Iesu ese Dirava ena Mesia Basileiana ena badina ia atoa? (b) Iesu ida do idia lohia taudia ese dahaka gaukara mai anina bada be tanobada dekenai idia gunalaia?

¹⁰ Iesu ese ena aposetolo ia abidia hidi neganai, Dirava ena Mesia Basileiana ena badina ia atoa unai. (Efeso 2:19, 20; Apokalupo 21:14) Guba lalonai Iesu Keriso ida do idia pavapava hebou taudia 144,000 ginigunadia be idia. Tanobada ai idia do noho neganai, Iesu ena oda hegeregerena haroro gaukarana ta do idia gunalaia; ia gwau: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai.”—Mataio 28:19.

11. Hari inai negai Basileia harorolaia gaukarana be edena bamona idia karaia, bona dahaka anina ia havaraia?

¹¹ Unai oda hegeregerena, hari inai negai tanobada hegegemadai lalonai, Iehova ena Witness taudia ese taunimanima momo herea be hahediba taudia ai idia halaodia, guna gaukara ena bada be inai bamona lasi. Iesu ese ia perovetalaia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Unai hegeregerena, Basileia sivaraina namona be tanobada hegegemadai idia harorolaia. Unai gaukara ena kahana ta be, taunimanima hadibadia gaukarana badana idia karaia noho. Dirava ena Basileia ena taravatu bona ena sisiba herevadia idia badinaia taudia ese maino bona lalo-tamona idia abia, taunimanima edia gavamani ese idia davaria diba lasi gaudia unai. Unai ibounai ese ia hahedinaraia goevagoeva Dirava ena Basileia be gau korikorina!

12. (a) Dahaka dainai Basileia harorolaia taudia be ita gwauraidia Iehova ena Witness taudia be maoro? (b) Dirava ena Basileia bona taunimanima edia gavamani edia idau be dahaka?

¹² Iehova ese Israela taudia ia hamaoroa, ia gwau: “Umui be lauegu hereva hamomokania taudia [witness taudia]. Lau ese umui lau abia hidi.” (Isaia 43:10-12) “Dirava ena hereva ia gwauraia maoromaoro tauna [witness tauna] namona,” Iesu, ese Basileia sivaraina namona ia harorolaia mai ena goada ida. (Apokalupo 1:5; Mataio 4:17) Unai dainai, Basileia harorolaia taudia hari inai negai be Iehova ena Witness taudia idia gwauraia be maoro; Dirava ese ia gwauraia hidi ladana be unai. To, badina be dahaka Witness taudia be hora momo lalodiai Dirava ena Basileia be ma haida dekenai idia herevalaia mai edia goada ida? Badina be Basileia be taunimanima do ia durudia diba. Taunimanima edia gavamani be idia moru, to Dirava ena Basileia do ia moru lasi. Isaia 9:6, 7 ese ena Lohia, Iesu, ia gwauraia “Maino ena Lohia,” ma ia gwau: “Iena King siahuna, be do ia bada daekau lao, bona iena basileia be nega ibounai, mai maino danu do ia noho.” Dirava ena Basileia be taunimanima edia gavamani hegeregeredia lasi—hari dina idia noho, bena kerukeru idia hamorudia. Daniela 2:44 ia gwau: “Guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. . . . Do ia noho ela bona hanaihanai.”

13. (a) Dirava ena Basileia ese dahaka hekwakwanai do ia haoredia? (b) Dahaka dainai ita diba momokani Dirava ese ena gwauhamata do ia hamomokanidia?

¹³ Edena tanobada pavapavana ese tuari, raskol karadia, gorere, hitolo mase, bona ogogami ia haorea diba? Edena ese mase taudia ia hatorea isi diba? Dirava ena Basileia bona ena King ese unai do idia karaia. Basileia be do ia dika lasi. Ia be masini ta, ia dika dainai idia hanamoa loulou gauna, bamona lasi. Lasi, Dirava ena Basileia do ia kwalimu, badina be Iehova ia gwauhamata, ia gwau: “Lau gwauraia hereva, be . . . lau dekenai do ia giroa kava lasi. Lau siaia totona gaukarana be do ia karaia momokani.” (Isaia 55:11) Dirava ena palani do ia moru lasi, to unai palani hegeregerena Basileia be edena negai ia lohia matamaia?

BASILEIA BE EDENA NEGAI IA LOHIA?

14. Iesu ena hahediba taudia ese Basileia edena bamona idia laloa kerere, to Iesu be dahaka ia diba iena lohia negana dekenai?

¹⁴ “Lohiabada e, inai negana be, basileia do oi henia lou Israela taudia dekenai, a?” Unai henanadai amo Iesu ena hahediba taudia ese idia hahedinaraia idia be Dirava ena Basileia ena gaukara bona ia abia hidi do ia lohia matamaia negana be idia diba lasi. Iesu ese ia sisiba henidia, unai do idia laloa davari toho kava lasi be namo; ia gwau: “Egu Tamana sibona ena siahu dekenai ia laloa dina bona nega, umui be diba lasi.” Iesu ia diba tanobada do ia lohiaia negana be do vairai; ia toreisi lou murinai guba dekenai do ia daekau, bena nega daudau murinai unai do ia vara. (Kara 1:6-11; Luka 19:11, 12, 15) Baibel ese unai ia perovetalaia vadaeni. Edena bamona?

15. Salamo 110:1 ese dahaka ia hahedinaraia Iesu ena lohia negana dekenai?

¹⁵ King Davida ese Iesu ia perovetalaia, “Lohiabada” ia gwauraia. Ia gwau: “[Iehova] ese egu Lohiabada dekenai ia hamaoroa, ia gwau, ‘Lauegu idiba kahana dekenai do oi helai, ela bona oi dekenai idia tuari henia taudia, be oiemu aena atoa gauna dohore lau halaoa.’ ” (Salamo 110:1; ma Kara 2:34-36 danu itaia.) Inai peroveta herevana ese ia hahedinaraia, Iesu be guba dekenai do ia daekau murinai, ia be maoromaoro do ia lohia matamaia lasi, to Dirava ena idibana kahanai do ia naria. (Heberu 10:12, 13) Do ia naria ela bona edena nega? Edena negai do ia lohia matamaia? Baibel ese ita ia durua, haere ita davaria totona.

16. Dahaka be lagani 607 B.C.E. lalonai ia vara, bona ena anina Dirava ena Basileia dekenai be dahaka?

¹⁶ Tanobada ibounai lalonai, Iehova ese ena ladana be Ierusalema hanuana sibona latanai ia atoa. (1 King Taudia 11:36) Unai hanua be tanobada basileiana ta ena hanua badana; unai basileia, Dirava ese gwaumaoro ia henia gauna, be Dirava ena guba Basileiana ena laulau. Unai dainai, Babulonia taudia ese lagani 607 B.C.E. lalonai Ierusalema idia hadikaia ore be mai anina bada. Unai be nega daudauna ta ena matamana; unai nega lalonai Dirava ese ena orea taudia tanobada dekenai ia lohiadia lasi. Lagani 600 mai kahana murinai, Iesu ese ia hahedinaraia unai nega, Dirava ese ia lohiadia lasi negana, be ia ore lasi; ia gwau: “Idau bese taudia ese aena dekenai Ierusalema do idia moia tao, ia lao bona unai idau bese edia nega do ia ore.”—Luka 21:24.

17. (a) “Idau bese edia nega” be dahaka, bona ena daudau be edena bamona? (b) “Idau bese edia nega” be edena negai ia matamaia, bona edena negai ia ore?

¹⁷ “Idau bese edia nega” lalonai, Dirava ese tanobada ena gavamani ia koudia lasi dainai, gwaumaoro ia henia basileiana ena lohia siahuna do idia koua. Unai nega be lagani 607 B.C.E. lalonai ia matamaia, Ierusalema idia hadikaia ore neganai, bona Daniela ese ia hahedinaraia do ia noho ela bona “lagani 7” do idia ore. (Daniela 4:23-25) Unai nega ena daudau be edena bamona? Baibel ese ia hahedinaraia “lagani” toi mai kahana ta be dina 1,260 hegeregeredia. (Apokalupo 12:6, 14) Unai nega ena daudau nega rua be dina 2,520. To unai nega kwadogina ia ore neganai, gau badana ta ia vara lasi. Bema ita gwau Daniela ena peroveta herevana lalonai “dina ta be lagani ta hegeregerena,” bona bema lagani 2,520 be lagani 607 B.C.E. amo ita duahia matamaia, dokona be lagani 1914 C.E.—Numera 14:34; Esekiela 4:6, NW.

18. Iesu ese Basileia siahuna ia abia bena nega daudau lasi edena bamona ia kara, bona unai ena anina tanobada dekenai be dahaka?

¹⁸ Vadaeni, unai neganai Iesu be guba lalonai ia lohia matamaia, a? Karoa gabena lalonai Baibel amo unai do ai hamomokania. To, Iesu ia lohia matamaia neganai, tanobada be maoromaoro ia maino lasi. Apokalupo 12:7-12 ese ia hahedinaraia, Iesu be Basileia ia abia bena nega daudau lasi Satani bona aneru dikadia be guba amo ia negea. Unai dainai tanobada dekenai dika ia vara, to iseda lalona idia goada diba, badina be Baibel ia gwau Diabolo ena “nega be ia kwadogi sibona.” Kahirakahira do ita moale diba, Dirava ena Basileia ia lohia dainai sibona lasi, to badina be tanobada bona kamonai taudia do ia hanamoa danu. (Salamo 72:7, 8) Dahaka dainai ita diba unai be kahirakahira do ia vara?

[Footnotes]

EMU DIBA OI TOHOA

Dirava ena Basileia be dahaka, bona edeseni amo ia lohia?

Daidia be Basileia lalonai idia lohia, bona daidia ia lohiaia?

Iehova ese ita edena bamona ia hadibaia iena Basileia be gau korikorina?

“Idau bese edia nega” be edena negai ia matamaia, bona edena negai ia ore?

[Box on page 94]

DIRAVA ENA BASILEIA DAINAI IDIA VARA GAUDIA BADADIA HAIDA

• Iehova ese ena palani ia gwauraia, ia gwau “garana” ta do ia havaraia, Gaigai, Satani Diabolo ena kwarana do ia moia tauna unai.—Genese 3:15, NW.

• Lagani 1943 B.C.E. ai, Iehova ese ia hahedinaraia unai “garana” be Aberahamo ena bese lalonai do ia vara.—Genese 12:1-3, 7; 22:18.

• Taravatu gwauhamatana, lagani 1513 B.C.E. lalonai Israela ia henia gauna, be “dohore idia vara gau namodia edia laulau.”—Esodo 24:6-8; Heberu 10:1.

• Israela ena tanobada basileiana be lagani 1117 B.C.E. lalonai ia matamaia, bena gabeai Davida ena iduhu taudia ese idia lohiaia.—1 Samuela 11:15; 2 Samuela 7:8, 16.

• Lagani 607 B.C.E. ai, Ierusalema idia hadikaia ore bona “idau bese edia nega” ia matamaia.—2 King Taudia 25:8-10, 25, 26; Luka 21:24.

• Lagani 29 C.E. ai, Iesu be Iehova ese ia horoa, gabeai do ia king totona, bena Iesu ese ena gaukara tanobada dekenai ia karaia matamaia.—Mataio 3:16, 17; 4:17; 21:9-11.

• Lagani 33 C.E. ai, Iesu be guba dekenai ia daekau, bena unuseniai ia be Dirava ena idibana kahanai ia naria ela bona ia lohia matamaia.—Kara 5:30, 31; Heberu 10:12, 13.

• Lagani 1914 C.E. ai, “idau bese edia nega” ia ore neganai, guba Basileiana lalonai Dirava ese Iesu be king dagina ia henia.—Apokalupo 11:15.

• Iesu ese Satani bona ena lauma dikadia ia negea diho tanobada kahirakahira, bena idia ese hisihisi momo be taunimanima dekenai idia havaraia.—Apokalupo 12:9-12.

• Dirava ena Basileia sivaraina namona tanobada hegegemadai harorolaia gaukarana be Iesu ese ia naria.—Mataio 24:14; 28:19, 20.