Idia be Daidia?

IEHOVA ENA WITNES TAUDIA idia ura oi ese idia do oi diba namonamo. Reana idia be oiemu dekena taudia eiava gaukara turadia dainai, eiava dina ta ta gaudia oi karaia lalonai, idia oi davaria. Reana dala dekenai idia raka taudia dekenai edia magasin idia henia neganai idia oi itaia. Eiava emu ruma dekenai idia ida oi herevahereva sisina.

Iehova ena Witnes taudia ese oi bona emu namo idia laloa bada. Idia ura oiemu turadia ai idia lao bona oi dekenai idia sibona, idia abia dae herevadia, edia orea, bona edia lalohadai taunimanima bona ita ibounai ita noholaia tanobadana dekenai idia hahedinaraia. Unai dainai, oi totona inai buklet idia karaia.

Dala momo ai, Iehova ena Witnes taudia be taunimanima iboudiai bamona. Idia ese moni, tauanina, bona hemami dalanai, hekwakwanai idia davaria. Nega haida idia kerere, badina idia be goevadae lasi. To edia kerere amo diba idia abia toho bona mai goada ida Baibel idia stadilaia, edia kara idia hamaoromaoroa totona. Sibona edia mauri be Dirava dekenai idia henia iena ura idia karaia totona, bona unai gwauhamata idia hagugurua totona idia gaukara goada. Edia gaukara ibounai lalonai, Dirava ena Hereva bona ena lauma helaga ena heduru idia tahua.

Idia laloa namona be idia abia dae herevadia be taunimanima edia lalohadai eiava tomadiho herevadia sibona lasi, to idia be Baibel amo be gau badana. Edia lalohadai be aposetolo Paulo ena hegeregerena, lauma helaga ena hakaua henunai ia gwau: “Taunimanima ibounai be idia koikoi noho, to Dirava tamona be nega ibounai ia hereva momokani.” (Roma 3:4a) Bema haida idia gwau edia hadibaia herevadia be Baibel ena hereva momokani, Witnes taudia ese aposetolo Paulo ena haroro herevana idia kamonai Berea taudia edia kara idia badinaia: “Paulo ena hereva idia kamonai, bona idia ura henia danu. Dina ibounai Buka Helaga idia tahua, inai hereva be ia momokani o lasi.” (Kara 17:11) Iehova ena Witnes taudia idia laloa, tomadiho hadibaia herevadia ibounai, sibona edia bona ma haida edia, be unai dala ai ita tahua be namo, bena ita itaia idia be Dirava ena lauma amo ia vara Baibel hegeregerena eiava lasi. Oi idia boiria​—oi idia noia​—idia ida oi herevahereva neganai, unai do oi karaia.

Unai ese ia hahedinaraia Iehova ena Witnes taudia idia abia dae momokani Baibel be Dirava ena Hereva. Idia abia dae ena buka 66 be Dirava ena lauma amo idia vara bona idaunegai sivaraina momokanina idia hahedinaraia. Taunimanima momo idia gwauraia Taravatu Matamatana idia gwauraia Keristani Greek Revarevadia, bona Taravatu Gunana idia gwauraia Heberu Revarevadia. Idia ese unai ruaosi, Greek bona Heberu Revarevadia, idia gaukaralaia, bona idia torea hegeregerena idia abia dae, to bema ena hereva eiava sivarai ese ia hahedinaraia goevagoeva idia be laulau herevadia, unai bamona do idia abia dae. Idia abia dae Baibel ena peroveta herevadia momo idia guguru vadaeni, haida idia guguru noho, bona ma haida be gabeai do idia guguru.

EDIA LADANA

Iehova ena Witnes taudia? Oibe, edia ladana be unai bamona idia gwauraia. Unai ladana ese ia hahedinaraia bamona, idia ese Iehova, iena Dirava dagina, bona ena ura idia gwauraia hedinarai. “Dirava,” “Lohiabada,” bona “Havaraia Tauna”​—hegeregere “Presiden,” “King,” bona “Jeneral”​—be dagi ladadia dainai ma haida be unai dagi ladadia amo idia gwauraidia diba. To “Iehova” be ladana korikorina ta, guba bona tanobada edia siahu ibounai Diravana bona Havaraia Tauna sibona ena ladana. Salamo 83:18 ese unai ia hahedinaraia, ia gwau: “Do idia diba oiemu ladana be IEHOVA. Bona oi sibona, Ataiai Momokani Diravana, ese tanobada oi biagua noho.”

Unai ladana Iehova (eiava Roman Catholic dubuna ena Jerusalem Bible bona diba bada taudia haida idia gwauraia bamona Yahweh) be kahirakahira nega 7,000 Heberu Revarevadia lalonai ia hedinarai. Baibel momo be unai ladana idia hahedinaraia lasi, to ena gabu ai “Dirava” eiava “Lohiabada” idia atoa. To, unai Baibel lalodiai danu, nega momo ta ese Heberu toretoredia ai unai ladana Iehova ia noho gabudia ia gwauraia diba, badina unai gabudia ai idia atoa herevadia be leta badadia ai inai bamona idia torea: DIRAVA, LOHIABADA. Hari idia hahanaia Baibel momo ese unai ladana Iehova eiava Yahweh idia gaukaralaia. Unai hegeregerena, Buka Helağa lalonai, Isaia 42:​8 ia gwau: “Lau be Iehova, egu ladana be unai.”

Iehova ena Witnes taudia ese Isaia karoa 43 lalonai ia noho Baibel sivaraina amo edia ladana idia abia. Unuseniai tanobada be kota rumana bamona: Bese idauidau edia dirava idia boiridia edia witnes taudia do idia mailaia unai dirava idia gwauraia kara maoromaorodia idia hamomokania totona eiava Iehova ena kahana ai idia noho witnes taudia edia hereva idia kamonai bona hereva momokani idia itaia totona. Iehova ese ena bese taudia ia hamaoroa: “Iehova ia gwau: Umui be lauegu hereva hamomokania [witnes] taudia; lauegu hesiai taudia, umui lau abia hidi vadaeni, lau do umui diba bona abidadama henia totona, bona do umui lalo-parara Lau be Ia. Dirava ta ese lau ia gunalaia lasi, bona lauegu murinai danu ta do ia hedinarai lasi. Lau be Iehova, umui ia hamauria tauna ma ta be lasi, lau sibona.”​—Isaia 43:​10, 11, Buka Helağa.

Tanobada ai Iesu ia do vara lasi neganai, Iehova Dirava ena hereva idia gwauraia taudia eiava ena witnes taudia be lagani gunadia tausen momo lalodiai tanobada dekenai idia noho. Heberu karoa 11 ese unai abidadama taudia haida, edia hereva bona kara amo Iehova ena hereva idia gwauraia taudia, ia herevalaia. Danu, Iesu ese Pontio Pilato vairanai ia hereva, ia gwau: “Hereva momokani gwauraia hedinarai totona lau vara, bona lau mai inai tanobada dekenai.” Ia idia gwauraia “hereva momokani tauna, bona Dirava ena hereva ia gwauraia maoromaoro tauna.” (Ioane 18:37; Apokalupo 3:14) Iesu ese ena hahediba taudia ia hamaoroa: “To, umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”​—Kara 1:8.

Unai dainai, hari tano 230 bamona ai, Iehova ena Basileia Keriso Iesu ese ia lohiaia ena sivarai namona idia gwauraia hedinarai taudia 6,000,000 bamona be idia mamia edia ladana idia gwauraia Iehova ena Witnes taudia be maoro.

[Footnote]

[Blurb on page 4]

Dirava dekenai sibona idia henia, iena ura idia karaia totona

[Blurb on page 4]

Idia abia dae Baibel be Dirava ena Hereva

[Blurb on page 5]

Ladana ena anina kota ta lalonai

[Blurb on page 5]

Witnes taudia 6,000,000 bamona tano 230 bona ma haida ai

[Picture on page 3]

Oi idia laloa bada

[Picture on page 4]

Dirava ena ladana idaunegai Heberu gado ai