Tiokratik Dalana Badinaia Ena Namo

BEMA ita ura Iehova ena ura ita karaia, gau badana be guba bona tanobada edia Lohia Badana ita kamonai henia. Danu ita abia dae iena Natuna be Keristani kongrigeisen ena kwarana bona mauri ena kahana ma haida ai kwara dagina ita badinaia danu. Unai tiokratik dalana badinaia karana ese taunimanima ibounai dekenai namo ia mailaia.

² Siahu tauna kamonai henia karana be Eden umana dekenai ia hamatamaia. Dirava ese Genese 1:28 bona 2:16, 17 lalonai unai hahegani ia gwauraia. Animal be taunimanima henunai idia noho, bona Adamu bona Heva be Dirava ena ura bona siahu do idia badinaia. Dirava ena siahu badinaia karana ese maino bona noho namo do ia havaraia. Kwara dagina ena hakaua herevana be gabeai 1 Korinto 11:3 dekenai idia hahedinaraia. Aposetolo Paulo ia gwau: “Lau ura umui diba, tatau ibounai edia kwarana be Keriso, hahine ena kwarana be tau, bona Keriso ena kwarana be Dirava.” Unai ese ia hahedinaraia taunimanima ibounai be mai edia kwarana, to Iehova sibona be ta ese ia biagua lasi.

³ Hari inai negai, taunimanima momo ese kwara dagina idia badinaia lasi. Dahaka dainai? Eden lalonai taunimanima edia tama sina ginigunadia be mai edia ura ida Dirava ena lohia siahuna henuna amo idia raka siri neganai, kwara dagina badinaia lasi karana ia matamaia. (Gen. 3:4, 5) To, edia kara amo ura kwalimu momokani idia abia lasi. Idia be lauma dikana, Satani Diabolo, ena siahu henunai idia noho matamaia. Unai gwau-edeede karana ginigunana ese taunimanima be Dirava ena amo ia hapararaia. (Kol. 1:21) Unai dainai, hari taunimanima momo be Satani ena siahu henunai idia do noho.​​—1 Ioa. 5:19.

⁴ Baibel ena hereva momokani ita dibaia bona ita badinaia karana amo, ita be Satani ena siahu henuna amo ita raka siri vadaeni. Ita be gwauhamata bapatiso Witnes taudia dainai, ita abia dae Iehova be iseda mauri ena Lohia Badana, ani? Bona King Davida ena hereva ita abia dae, badina ia gwau Iehova be “gau ibounai edia Biaguna,” ani? (1 Siv. 29:11) Oibe, mai manau ida ita gwau: “Do umui diba Iehova be Dirava. Ia ese ita ia karaia, bona ita be iena. Ita be iena taunimanima bona ita be ia naria mamoe oreana.” (Sal. 100:3) Ita abia dae Iehova ena hairai be bada herea bona ia sibona ita badinaia be maoro, badina ia ese gau ibounai ia havaraia. (Apok. 4:11) Ita be Dirava momokanina ena hesiai taudia dainai, namona be Iesu Keriso ita tohotohoa badina ia be haheitalai hereadaena Dirava kamonai henia karana dekenai.

⁵ Iesu be inai tanobada ai ia hisihisilaia gaudia amo dahaka ia dibaia? Heberu 5:8 ia haere: “Ena be ia be Dirava ena natuna, to ia hisihisilaia gaudia amo kamonai karana ia dibaia.” Oibe, herevana Iesu be hisihisi bada ia abia, to ena guba Tamana henunai ia noho. Danu, Iesu be sibona ena ura dekenai gau ta ia karaia lasi. Ia sibona ena ura hegeregerena ia hereva lasi bona ia sibona ena hairai ia tahua lasi. (Ioa. 5:19, 30; 6:38; 7:16-18) Ena hesiai gaukara lalonai, mai moale ida ena Tamana ena ura ia karaia, herevana unai amo dagedage bona hisihisi do ia abia. (Ioa. 15:20) Ma danu, Iesu ese kamonai karana ia hahedinaraia Dirava dekenai. Iesu be “sibona ia hamanaua” ela bona “hisihisi auna dekenai ia mase.” Iehova ia kamonai henia momokani dainai gau namodia momo idia vara, hegeregere taunimanima be mauri hanaihanai idia abia diba, ia ese dagi badana ia abia, bona ena Tamana ia hanamoa bada.​​—Fili. 2:5-11; Heb. 5:9.

TIOKRATIK DALANA HENUNAI ITA NOHO DALADIA

⁶ Iehova ena lohia siahuna henunai idia noho lasi taudia ese idia davaria lalohekwarahi bona lalohisihisi momo be ita davaria lasi. Iseda inai tauna, Diabolo, be hanaihanai dala ia tahua ita ania ore totona. Bema Satani ita dadaraia bona Iehova vairanai ita manau bona ia henunai ita noho, vadaeni Iehova ese Satani amo ita do ia hamauria.​​—Mat. 6:10, 13; 1 Pet. 5:6-9.

⁷ Ita diba Keriso be Keristani kongrigeisen ena kwarana, bona ia ese “hesiai tauna mai ena kamonai bona mai ena aonega” dekenai siahu ia henia. Unai be mai anina bada ta ta ita laloa bona kara henia dalana dekenai. Bema Dirava ese kongrigeisen lalonai ia atoa dalana henunai ita noho, unai ese ita do ia durua iseda tomadiho karadia ibounai lalonai Dirava ena Hereva ita badinaia totona. Unai tomadiho karadia haida be inai: iseda haroro gaukara, hebou lao henia bona ena kahana idauidau durua, elda taudia tura henia karana, bona orea ena dala idauidau badinaia karana.​​—Mat. 24:45-47; 28:19, 20; Heb. 10:24, 25; 13:7, 17.

⁸ Dirava henunai ita noho neganai, Keristani kongrigeisen lalonai maino bona noho namo ia havaraia. Iehova idia tomadiho henia taudia ese iena kara namodia idia hahedinaraia. (1 Kor. 14:33, 40) Ita eksperiens gaudia Iehova ena orea lalonai ese ita ia durua iseda hemami ita gwauraia King Davida ena hegeregerena. Davida ese Dirava ena hesiai taudia bona kara dika taudia edia idau ia itaia murinai, mai moale ida ia gwau: “Iehova be edia Dirava ai idia halaoa taudia be idia moale!”​​—Sal. 144:15.

⁹ Headava bona ruma bese lalonai, “hahine ena kwarana be tau.” Ma danu, tatau be Keriso henunai idia noho, bona Keriso ena kwarana be Dirava. (1 Kor. 11:3) Namona be hahine edia tatau henuai idia noho, bona natudia be edia tama sina idia kamonai henia. (Efe. 5:22-24; 6:1) Ruma bese taudia ta ta ese kwara dagina idia badianaia neganai, maino do ia vara.

¹⁰ Namona be Keriso hegeregerena, tatau ese lalokau dalanai edia kwara dagina idia gaukaralaia. (Efe. 5:25-29) Tau ese ena kwara dagina ia gaukaralaia kerere lasi eiava ia rakatania lasi neganai, ena adavana bona natudia be mai moale ida ia do idia kamonai henia. Hahine ena maduna be ena tau ia durua. (Gen. 2:18) Hahine ese mai haheauka bona hemataurai ida ena adavana ia durua neganai, ena tau ese do ia lalonamo henia bona Dirava do ia hanamoa. (1 Pet. 3:1-4) Headava tatau bona hahine ese Baibel ena sisiba kwara dagina dekenai idia badinaia neganai, edia haheitalai amo natudia dekenai idia hahedinaraia Dirava henunai idia noho be namo.

¹¹ Dirava ena henunai ita noho neganai inai danu ita ia durua “gavamani henunai” do ita noho, badina “Dirava ese ia henia dagi idauidau hegeregerena idia noho.” (Roma 13:1-7) Keristani taudia be taravatu badinaia taudia dainai, takisi moni idia henia; idia ese “Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.” (Mat. 22:21) Danu, teritori ta ita ura hagugurua totona, ruma tauna ena infomeisen gimaia taravatu ita badinadia be namo. Gavamani ena taravatu​—Iehova ena kara maoromaoro taravatu idia utua lasi gaudia unai​—ita kamonai henia bona badinaia neganai, iseda goada ibounai ita gaukaralaia Dirava ena Basileia ena sivarai namona ita harorolaia totona.​​—Mar. 13:10; Kara 5:29.

¹² Iseda mauri ibounai lalonai tiokratik dalana henunai ita noho be mai anina bada. Iseda abidadama ena matana amo, taunimanima ibounai be Iehova Dirava ena henunai do idia noho negana ita itaia. (1 Kor. 15:27, 28) Mai moale ida Iehova ena lohia siahuna idia abia dae taudia ese hahenamo do idia abia, badina Iehova ena siahu henunai do idia noho ela bona hanaihanai!