Duahia Taudia Edia Henanadai

Bible haida lalodiai unicorn boromakau sivaraina idia torea, to Bible ese edia noho ia hamomokanilaia, a?

King James, Douay, bona Bible ma haida lalodiai, unicorn boromakau edia sivarai idia torea. To iseda nega lalonai Heberu dekena amo hereva idia hahanaia maoro Bible dekenai, unai unicorn boromakauna idia herevalaia lasi.​—Salamo 22:21; 29:6; 92:10.

Idau negai ia mai hari gori sivarai idauidau momo ese animal ta idia herevalaia, idia gwau unai animal ena tauanina bona kwarana be hosi bamona, to ena aena be dia bamona bona ena iuna be leona bamona. Gori dekenai idia gwau unai animal ena baguna dekenai ia gageva doana tamona ia tubu.a

“Gunaguna taunimanima idia laloa unicorn doana ena pauda ese poisini ena siahu ia koua diba, bona lagani 500 ia lao 1500 C.E. ai, unai doana idia hapatapataia bona unai pauda be davana bada dekenai idia hoia. Aonega taudia kahirakahira iboudiai idia gwau unicorn toana ia vara taunimanima ese Europe taudia edia hereva rhinoceros dekenai idia kamonai henia dainai.” (The World Book Encyclopedia bukana amo) Asuria bona Babulono taudia idia koroa nadidia haida dekenai mai edia doana tamona animal edia toana idia karaia. Hari ita diba unai animal be dia maruanedia, ibex, boromakau hahinedia, bona boromakau maruanedia, bona edia laulau be edia kahana tamona toana sibona, unai dainai edia doana rua idia hedinarai lasi.

Bible ena hereva idia tahua taudia dekenai unai sivarai be mai anina, badina Bible lalonai animal ta be nega 9 ia gwauraia neganai, ia be Heberu hereva reʼemʹ idia torea. (Numera 23:22; 24:8; Deuteronomi 33:17; Iobu 39:​9, 10; Salamo 22:21; 29:6; 92:10; Isaia 34:7) Gado idia hahanaia taudia be nega daudau lalonai unai animal be dahaka idia daradaralaia. Greek Septuagint Bible lalonai reʼemʹ idia hahanaia neganai, idia torea ‘doana tamona’ animal eiava unicorn. Latin Vulgate Bible ai nega momo idia hahanaia “rhinoceros.” Bible ma haida dekenai idia hahanaia ‘uda boromakau,’ ‘uda dagedage gaudia,’ eiava ‘buffalo.’ Robert Young ese unai Heberu hereva be English gado ai ia hahanaia neganai “Reem” ia torea, to duahia taudia be unai hereva ena anina idia lalo-pararalaia lasi.

To, hari inai negai, aonega taudia ese daradara unai hereva reʼemʹ ena anina dekenai idia kokia. Diksenari karaia taudia Ludwig Koehler bona Walter Baumgartner ese idia hahedinaraia ena anina korikori be “uda boromakau,” saiens taudia idia gwau ena ladana korikori be Bos primigenius. Unai animal be “mai edia doana bada bona mai edia aena auka oreana ta.” The New Encyclopædia Britannica bukana ia gwau:

“Taravatu Gunana dekenai hereva haida lalodiai idia ese mai ena goada bona mai ena hairai doana animal ta idia gwauraia reʼemʹ. Bible haida dekenai unai hereva idia hahanaia ‘unicorn’ eiava ‘rhinoceros,’ to hari inai nega lalonai idia karaia Bible lalodiai unai hereva idia hahanaia ‘uda boromakau’ (aurochs), bona unai be Heberu hereva reʼemʹ ena anina korikori.”

Hari inai nega lalonai English gado ai ox eiava “boromakau” ena anina be ena abona idia utua oho boromakau maruanena, bona New World Translation of the Holy Scriptures ese nega ibounai unai hereva reʼemʹ idia hahanaia “uda boromakau maruanena.” Unai aurochs (uda boromakau, eiava uda boromakau maruanena) be lagani 1700 C.E. ia mai neganai idia iboudiai idia mase ore, to saiens taudia idia gwau unai animal bona gori sivaraina idia gwauraia unicorn be idia idau. Idau negai ia mauri noho auroch boromakauna ia gini ena lata be 1.8 mita, bona ena kwarana ela bona ena iuna ena lata be 3 mita. Reana ena metau be 900 kilo, bona ena doana rua ta ta edia lata be 75 sentamita ia hanaia diba.

Unai be Bible ena sivarai hegeregerena, ia gwau reʼemʹ, eiava uda boromakau ena toana be unai bamona. Bible ia gwau iena goada be bada bona ia manau lasi (Iobu 39:​10, 11) bona ia heau haraga diba. (Numera 23:22; 24:8) Iena doana be rua, ia be gori sivaraina ia gwauraia doana tamona unicorn bamona lasi. Mose ese unai animal ena doana rua ia gwauraia ia ese mai edia siahu bada basileia rua be Iosef natudia memero rua amo do idia mai ia haheitalaia totona.​—Deuteronomi 33:17.

Vadaeni, Bible ese unicorn ena gori herevana ia hamomokanilaia lasi. To ia ese aurochs eiava uda boromakauna ena sivarai maorona ia gwauraia sisina, ia gwau unai animal be bada herea bona taunimanima idia gari henia. Unai animal be Bible ena sivarai idia torea negana lalonai idia noho ela bona lagani 490 C.E bamona lalonai idia mase ore.

[Footnotes]

[Picture Credit Line on page 31]

Treasury of Fantastic and Mythological Creatures: 1,087 Renderings from Historic Sources, Richard Huber ia torea bukana/Dover Publications, Inc.