Do Oi Lalohisihisi Lasi

TAU ta bona ena adavana be dina rua lalonai unai gabu dekenai idia ginidae. Edia natudia maragi rua idia rosidia bona 70 kilomita bamona uda badadia idia raka hanaia, unai gabu ai rara idia topoa gaigaigaigai idia noho; bona lai bada bona medu ese abata bada ia havaraia sinavai haida idia hanaidia. To idia ura lasi idia reaia.

Zaire dekenai hahine rua be 500 kilomita bamona idia raka, bona dina 14 dala dekenai idia mahuta, idia ura unuseniai do idia ginidae. Zaire dekenai danu, ena mauri lagani 70 tau burukana ta be 260 kilomita bamona ena baisikele amo ia heau lao unai gabu dekenai. Gau badana be ia reaia lasi.

Unai taudia ibounai be edena gabu dekenai idia lao? Idia ibounai be edia gabu ta ta dekenai edia hebouhebou badana ta dekenai idia lao. Ena be unai gabu idia lao henia totona be hekwarahi bada, to idia ibounai idia gwau unai be mai anina bada dainai idia hekwarahi kava lasi.

Oi hegaegae lagani 1992 “Diari Halasia Taudia” Distrik Hebouhebouna ta dekenai do oi lao henia totona, a? Reana unai hebouhebou ta do oi lao henia totona do oi hekwarahi lasi unai abidadama tadikaka haida bamona. To ena be hekwakwanai sisina ia vara, umui ai noia unai hebou umui reaia lasi be gau badana.

Program namo hereana bona taunimanima ese idia badinaia diba herevadia idia hegaegaelaia. Bema oi be Keristen edia hebamo oi moalelaia bona maino momokani oi ura davaria, bema oi ura diba vaira kahanai dahaka do ia vara, eiava edena bamona Dirava ena ura do oi karaia namonamo diba, ai gwauhamata unai hebouhebou dainai do oi lalohisihisi lasi. Oiemu gabu dekenai idia noho Witness taudia ese emu gabu dekenai idia hebouhebou ena gabu bona ena nega oi dekenai do idia hadibaia.