Taunimanima Edia Kara Dika Kokia Dalana Ia Noho, A?

MAI ena natudia badadia hani ida, Chisako be siti ta dekenai mei rumadia ia hagoevaia, unai gaukara be 600 kilomita iena noho rumana amo. Unai gaukara ia karaia noho lalonai, ia be Buddhist taudia edia ute ia abia, to unai hereva ena anina ia diba lasi. Unai be tomadiho orea ta ena kara, unai orea ese tomadiho iboudiai edia badina idia tahua noho.

Chisako ia gwau: “Ena be sisiba kara aukadia ai badinaia, to egu kara bona lalohadai toana lau haidaua diba lasi. Egu kudouna dekenai, lau be haida edia kara dika lau dekenai lau laloaboio diba lasi, bona egu lalona amo lalokau korikori idia dekenai lau hahedinaraia diba lasi.”

Asia taudia edia tano dekenai, Bible ena hahediba kara dika karana dekenai idia diba lasi, to idia haida be Chisako hegeregerena, edia kara dika dainai edia lalona ena mamina idia dika. (Roma 2:​14, 15) Ita ibounai be dika bada ia davaria tauna ta ita hebogahisi henia lasi dainai ita hemarai, eiava tau ta ita hereva dika henia gabeai iseda hereva dainai ita lalohisihisi, ani? (Iakobo 4:17) Danu, memero kekeni bona tau bona hahine badadia dekenai mama ia noho, ani?

Dahaka dainai taunimanima edia lalona idia hisihisi? Badina, ena be idia lalo-parara eiava idia lalo-parara lasi, to edia lalona dekenai idia diba dahaka be kerere, eiava kara dikana. Oibe, ena be taunimanima ese Bible ena hahediba herevana kara dika dekenai idia diba eiava lasi, to idia iboudiai be mai edia kara dika. Unai hereva ia tahua aonega tauna ta ia gwau: “Ita ibounai ita kara dika vadaeni, bona Dirava ena hairaina ita abia be hegeregere lasi.”​—Roma 3:23.

Kara Dika Kokia Dalana Ia Noho, A?

Hari inai nega lalonai, Kerisendom dekenai danu, taunimanima momo idia hekwarahi noho kara dika bona hemarai edia mamina be edia lalona dekena amo idia kokia totona. Doketa Karl Menninger be iena buka Whatever Became of Sin? lalonai, ia gwau: “Unai hereva ‘kara dika’ . . . be hari ita kamonai momo lasi.” Ena be unai hereva “kara dika” idia gwauraia momo lasi, to unai ese edia kara dika ia kokia diba lasi, hegeregere, ena be tau buruka ta be unai hereva “buruka” ia gwauraia momo lasi, to unai ese ena buruka toana ia kokia diba lasi. Namona be ita lalo-parara ita be mai iseda kara dika bona tau ta ese ita ia hamauria be gau badana. To daika ese ita do ia hamauria diba?

Keristen aposetolo Paulo ese unai henanadai ia henanadailaia badina ena be ia ura lasi to ia ese kara dika ia karaia, ia gwau: “Lau madi o! Lau be dika momokani inai! Lauegu tauanina ese lau ia hamasea noho, be daika ese lau do ia hamauria?” Bena murinai Paulo ia haere, ia gwau: “Dirava lau tanikiu henia, ia ese lau ia hamauria, Iesu Keriso dekena amo.” Badina be dahaka? Badina Iesu ena mauri davana ia henia boubou karana amo, Dirava ese taunimanima edia kara dika gwauatao dalana ia kehoa.​—Roma 7:​14-25.

To, tanobada dekenai idia noho Keristen lasi taudia 3,500,000,000 (sibodia idia gwauraia Keristen taudia edia namba amo nega rua ia bada unai) be mauri davana henia karana ena lalohadai idia abia dae be ia auka. Haheitalai ta be inai: Japan dekenai Muslim tauna ta ia noho bona nega sisina lalonai ia ese Bible ia stadilaia, to ia dekenai Iesu be mauri davana ia henia ena hahediba herevana be hekwakwanai bada gauna ta. Tau ta do ia mase taunimanima iboudiai do ia hamauridia totona be lalohadai idauna momokani Asia taudia dekenai.

Kerisendom lalonai danu taunimanima momo ese unai hahediba hereva badana ena anina idia lalo-pararalaia be ia auka. New Catholic Encyclopedia bukana lalonai ia gwau: “Taunimanima edia mauri hoia lou karana ena anina kahana ta ia do hedinarai lasi bona Keristen hahediba dekenai unai ese hekwakwanai ia do havaraia noho.”

Unai hahediba herevana dekenai hekwakwanai be ia bada, badina tomadiho orea ena torea tauna, N. H. Barbour ia gwau: “Ita gwau diba lasi tamana ta ese lao ta ena tauanina ia gwadaia, ia hahisia, bona ia hamasea karana be iena natuna ena kerere kokia dalana maorona. Unai hegeregerena, ita gwau diba lasi Keriso ena mase karana ese taunimanima edia kara dika ia kokia.” Unai nega lalonai, Barbour bona Charles T. Russell idia gaukara hebou, to Russell ia diba mauri davana henia ena hahediba herevana ia gwauraia dika be maoro lasi. Unai dainai ia be Barbour dekena amo ia siri, bona lagani 1879 ai, ia ese magasin matamatana ta ia halasia, hari unai magasin be oi duhaia inai. The Watchtower magasin idia halasia hamatamaia negana amo ema bona hari, idia ese Iesu Keriso ena mauri davana ia henia hahediba herevana idia gwauraia bada.

To “Keristen” ena mauri idia diba lasi taudia be unai hahediba herevana idia abia dae diba, a? Do ita diba totona, namona be tau ta ia mase taunimanima iboudiai ia hamauridia totona ena hahediba herevana do ita tahua namonamo.