Evolusen Idia Kota Henia

Evolusen herevana idia abia dae taudia idia ura mauri ia matama dalana do idia tahua lou

MANI inai oi laloa: Oi be kota biaguna ta. Oi kota henia tauna be pulisi ese idia samania, idia gwau taravatu ia utua. Ia gwau ia kerere lasi, bona ena uitnesi taudia ta ta idia gini bona ena hereva idia durua. To, oi kamonai idia ta ta ese oredia edia hereva idia hakoikoidia. Bena, oi boiridia lou neganai, edia hereva idia haidaua. Oi, kota biaguna, ese edia hereva do oi abia dae a? Do oi laloa namona be do oi gwau ia kerere lasi, a? Reana lasi, badina be ena uitnesi taudia edia hereva be idauidau dainai, ena hereva oi abia dae be auka.

Evolusen herevana be unai bamona. Uitnesi taudia momo ese mauri ia matama dalana sivaraidia idauidau idia herevalaidia, evolusen herevana durua totona. To edia hereva be kota lalonai do idia hamomokanidia diba a? Unai hereva idia durua taudia be hereva tamona idia gwauraia, eiava?

Edia Hereva be Idauidau

Mauri be edena bamona ia matama? Unai idia laloa momo bona idia hepapahuahulaia momo. Evolusen herevana idia abia dae taudia be Dirava ese mauri gaudia ta ta ena bese ena bese ai ia karadia herevana idia abia dae taudia ida idia hepapahuahu, bona evolusen herevana idia abia dae taudia be sibodia idia hepapahuahu heheni. Evolusen be edena bamona ia vara, edeseniai ia matama, daika o dahaka ese ia hamatamaia, bona ia vara noho negana be ede daudauna, be idia hepapahuahulaia goadagoada.

Nega daudau lalonai evolusen taudia idia gwau mauri be “supu” gohugohuna lalonai ia matama. Hari idia haida idia gwau reana davara ena gwaragwara ese mauri ia hamatamaia. Ma haida idia gwau mauri ia matama gabuna be reana davara ena dobu gabudia ai, ranu siahu ia lohilohi gabudia ai. Ma haida idia gwau reana mauri gaudia maragimaragidia be guba amo idia moru nadidia ese idia mailaidia. Ma haida idia gwau reana guba amo idia moru nadidia badadia ese tanobada ena hodahoda idia haidaua, bona unai dala amo mauri idia hamatamaia.

Hari idia ese mauri ena matamana danu be dala idaudia ai idia laloa. Time magasin ia gwau: ‘Mauri be nega namona ai ia matama lasi, guna idia laloa bamona, to nega dikana ai ia matama; unai neganai kwalahu ororodia ese edia anina idia halasia loulou bona nadi badadia idauidau be guba amo idia moru loulou.’ Saiens taudia be guna idia laloa evolusen be nega daudau herea lalonai ia vara, to hari idia haida idia gwau unai dika idauidau bogaragidiai ia vara negana ena daudau be unai bamona lasi.

Saiens taudia ese Dirava danu idia lalo-tamonalaia lasi. Haida idia gwau mauri be evolusen sibona amo ia vara, badina be Dirava be lasi. Ma haida idia gwau Dirava ese mauri ia hamatamaia bena ia rakatania, evolusen ese ena anina do ia havaraia guguru totona.

Mauri ia matama murinai, evolusen be edena bamona ia vara? Inai danu idia lalo-tamonalaia lasi. Guna Darwin ese ena evolusen herevana ia halasia, bena lagani 100 murinai, lagani 1958 ai, evolusen tauna Sir Julian Huxley ia gwau evolusen be Darwin ese ia gwauraia dalana sibona amo ia vara. To ma lagani 24 murinai, evolusen tauna Michael Ruse ia gwau saiens taudia, mauri gaudia edia oromadia tahudia taudia, momo ese Darwin ena lalohadai idia hamomokania lasi.

Time magasin ia gwau evolusen herevana hamomokanilaia gaudia be momo, to ia be ma ia gwau evolusen herevana ia guguru lasi, bona saiens taudia ese lalohadai idauidau momo amo idia hagugurua toho. Evolusen herevana idia abia dae vaitani taudia haida idia gwau lasi idia hamomokania vadaeni, to idia gwau namona be mauri ia matama dalana do idia tahua namonamo lou.

Anina be, evolusen herevana idia hamomokania toho taudia edia hereva be tamona lasi, bona mauri be evolusen amo ia matama dalana idia lalo-tamonalaia lasi, lasi momokani. Saiens tauna T. H. Janabi ia gwau, evolusen herevana idia abia dae taudia ese nega daudau lalonai lalohadai kereredia momo idia abidia bena idia negedia, bona idia ese lalohadai tamona idia abia dae diba lasi.

Charles Darwin ia diba unai hepapahuahu do idia vara. Ena buka ladana The Origin of Species lalonai ia gwau: “Lau diba inai buka lalonai lau gwauraidia gaudia kahirakahira iboudiai be do idia gwauraidia diba, lalohadai idau hereadia do idia hamomokanidia toho totona.”

Vadaeni, edia hereva be idauidau dainai, ita henanadai, ita gwau, ‘Evolusen herevana ita abia dae be maoro eiava?’

Evolusen Herevana Abia Hidi be Aonega Karana A?

Buka ta ladana Milestones of History be ia gwau, taunimanima momo ese evolusen herevana idia ura henia, “badina be idia laloa ia be saiens herevana korikorina, to Dirava ese mauri gaudia besedia ta ta iboudiai ia havaradia herevana be unai bamona lasi.”

Inai danu, evolusen herevana idia abia dae taudia haida edia hereva aukadia ese taunimanima idia hagaridia diba. Saiens tauna H. S. Shelton ia gwau, Dirava ese mauri gaudia ia havaradia lalohadaina be “kavakava momokani dainai, namona be ta ese do ia laloa namonamo toho lasi.” Mauri gaudia edia oromadia tahudia tauna Richard Dawkins ia gwau: “Bema ta ia gwau evolusen herevana ia abia dae lasi, ia be diba lasi, eiava ia kavakava, eiava ia kava.” Unai hegeregerena, Profesa René Dubos ia gwau: “Lalo-parara taudia momo herea idia abia dae gau iboudiai . . . be evolusen daladia amo idia vara bona idia senisi noho.”

Unai hereva dainai, reana toana be diba taudia iboudiai ese evolusen herevana idia abia dae haraga, bona unai amo idia hahedinaraia idia be “kavakava” lasi to idia be “lalo-parara taudia.” To, idia sikuli bada taudia haida ese evolusen herevana idia abia dae lasi. Francis Hitching be ena buka ladana The Neck of the Giraffe lalonai ia gwau: “Saiens taudia haida lau davaridia, idia daradara hehuni noho; . . . bona idia haida idia gwau ia hedinarai Darwin ena evolusen herevana be saiens herevana korikorina lasi.”

Chandra Wickramasinghe, Britain ena saiens tauna ta mai ladana bada, ena lalohadai be unai hegeregerena. Ia gwau: “Darwin ena evolusen herevana ena badina hamomokanilaia gaudia be lasi . . . bona lau laloa saiens ia hadikaia.”

T. H. Janabi ese evolusen taudia edia hereva ia tahudia namonamo murinai, ia gwau: “Lau davaria gauna be ita idia hamaoroa herevadia hegeregeredia lasi. . . . Idia davaridia gaudia be momo lasi bona idia makohi maragimaragi dainai, mauri ia matama dalana herevana idia hamomokanilaia diba lasi.”

Unai dainai, evolusen herevana idia abia dae lasi taudia be “diba lasi” taudia o “kavakava” taudia o “kava” taudia idia gwauraidia be maoro lasi. Evolusen herevana ia goadalaia tauna, George Gaylord Simpson, ese unai hereva idia dadaraia taudia edia lalohadai ia gwauraidia, ia gwau: “Unai lalohadai ita kirikirilaidia o ita hevasehalaidia be kerere. Idia gwauraidia goadagoada taudia be diba tahua namonamo taudia.”

Abidadama Gauna

Haida idia laloa evolusen herevana abia dae karana ena badina be idia hamomokanidia vadaeni gaudia, to Dirava ese gau iboudiai ia havaradia herevana abia dae karana ena badina be abidadama mo. Momokani, tau ta ese Dirava ia itaia lasi. (Ioane 1:18; ma danu 2 Korinto 5:7 itaia.) To evolusen herevana be herea lasi, badina ena badina be tau ta ese nega ta ia itadia lasi o ia tohotohodia lasi gaudia.

Hegeregere, mauri gauna ta ia senisi bena bese idauna be iena amo ia vara be nega ta idia itaia lasi, to idia gwau idia diba momokani mauri gaudia besedia matamatadia idia vara dalana be unai. Mauri gauna ta be mauri lasi gauna amo ia vara be idia itaia lasi, to idia gwau mauri ia matama dalana be unai.

Unai dainai T. H. Janabi ia gwau evolusen herevana be “ ‘abidadama’ gauna mo.” Saiens tauna Fred Hoyle ese ia gwauraia “Darwin ena Evanelia.” Doketa Evan Shute ia gwau ia laloa Dirava ese gau iboudiai ia havaradia herevana hamomokania be haraga, to evolusen herevana hamomokania be auka.

Diba momo taudia ma haida ese unai idia hamomokania. Saiens tauna Robert Jastrow ia gwau: “Taunimanima ena oromana lau laloa neganai, . . . lau laloa gohugohu ranuna siahuna lalonai idia noho gaudia amo ia vara be hoa gauna, ena matamana sivaraina Baibel lalonai hegeregerena.”

Vadaeni, dahaka dainai momo ese Dirava be mauri ia havaraia herevana idia do dadaraia noho?

[Picture on page 3]

Idia gwauraidia goadagoada herevadia ese haida idia hagaridia diba