Basileia Haroro Ripoti

Greenland Ena Hanua Daudaudia Ai Idia Lao

LAGANI momo lalodiai, Iehova ena Witness taudia be Gima Kohorona bona Noga! magasin idia gaukaralaia sivarai namona idia harorolaia totona. Unai magasin ese Iehova ena aonega idia hahedinaraia, iena Hereva, Baibel ese ia gwauraia hegeregerena. Baibel ena peroveta herevadia hegeregerena tanobada dekenai idia vara gaudia idia herevalaia, bona Baibel ena sisiba maorodia idia henia taunimanima edia hekwakwanai hanamodia totona.​—⁠Iamesi 3:⁠17.

Lagani 1994 lalonai, Greenland dekenai Witness taudia idia goada karaia taunimanima momo dekenai Gima Kohorona bona Noga! magasin idia henia totona. Palani idia karaia, June ia lao August hua lalodiai, do idia lao Greenland ena daudau hanua idia vadivadi henidia totona. Basileia harorolaia taudia edia grup ta be bouti amo kilomita 4,000 bamona west ena kone kahana idia badinaia lao ela bona Qaanaaq (Thule) dekenai idia ginidae, bona unuseniai tanobada ena not kahana momokani dekenai idia noho taudia idia davaria. Pura 7 lalonai unai gabu dekenai idia gaukara. Ist konena kahanai, Witness tauna ta mai adavana ida be Ittoqqortoormiit hanua dekenai idia lao, bona unai be nega ginigunana unai gabu ena kahana ta ta dekenai sivarai namona idia harorolaia.

Unai lagani ena matamana ai, April huana lalonai, Gima Kohorona bona Noga! magasin ibounai 7,513 be Greenland taudia dekenai idia haria. Ena anina be Basileia harorolaia pablisa taudia 127 amo ta ta edia averes be magasin ibounai 59 idia haria​—⁠anina be taunimanima 7 7 amo ta ta ese magasin tamona idia abia. Unai hua lalonai, Awake! magasin ese “Breast Cancer​—⁠Every Woman’s Fear” (Rata Kensa Gorerena​—⁠Hahine Iboudiai Edia Gari Gauna) ena hereva haida ia halasia. Witness hahine ta magasin ibounai 140 ia haria, be televisen ripoti hahinena ta dekenai unai Awake! magasin haida ia henia. Dina haida murinai, televisen program ta be unai magasin amo rata kensa gorerena ia herevalaia. Unai ripoti ia karaia hahinena be televisen dekenai unai magasin bona ena rau haida ia hahedinaraia neganai, Greenland gado dekenai idia hahanaia gaukara ia hanamoa. Danu, unai Awake! magasin ese ia herevalaia rata kensa gorerena koua daladia ia gwauraia hedinarai.

Unai ripoti hahine dekenai magasin ia henia Witness hahine be unai televisen program dekenai idia henanadai henia danu. Ia ese edia henanadai, Iehova ena Witness taudia be edena bamona taudia ia haerelaia, bona unai hua lalonai magasin idia hariharilaia gaukarana ia herevalaia. Ia ese Baibel lalonai idia noho sisiba namodia ia herevalaia, bona ia hahedinaraia unai sisiba namodia sibona ese ita idia durua diba inai nega ena hekwakwanai ita hanaidia totona.

Unai televisen program ena dokona kahana dekenai Greenladic Cancer Society ena presiden idia henanadai henia. Ia gwau guna ia be unai bamona kensa gorerena ena heduru hereva namodia be ena gado dekenai ia itaia lasi. Bena ia ese rata kensa gorerena idia ura dibaia taudia ia noia unai Awake! magasin idia duahia totona. Ia gwau badina namodia dainai, Iehova ena Witness taudia ese idia karaia karana idia moalelaia be namo.

Greenland dekenai bamona, Iehova ena Witness taudia tanobada hegegemadai ese sivarai namona be “tanobada ibounai dekenai ai [idia] harorolaia” noho. (Kolose 1:23; Kara 1:⁠8) Baibel idia hadibalaia bukadia, bona Gima Kohorona bona Noga! amo danu, idia ese taunimanima idauidau idia durua inai nega ena hekwakwanai idia haheaukalaidia bona nega vaira ena helaro namona idia abia totona.

[Map on page 8]

(For fully formatted text, see publication)

Qaanaaq (Thule)

Ittoqqortoormiit

Nuuk (Godthåb)