“Mase Taudia Do Idia Toreisi Lou”

“Kibi do idia hiriria, vadaeni mase taudia do idia toreisi lou, bona do idia mase lou diba lasi. Bona ita ibounai Dirava ese do ia senisia, do ita idau.”​—1 KORINTO 15:52.

1, 2. (a) Dirava ese peroveta tauna Hosea amo ia henia hagoadaia gwauhamatana be dahaka? (b) Edena dala ai ita diba Dirava ia ura mase taudia ia hamauria lou?

NEGA ta oiemu lalokau tauna ta ia mase, a? Bema oibe, oi ese mase ia havaraia hisihisina oi diba. To, Dirava ese peroveta tauna Hosea amo ia henia gwauhamatana ese Keristani taudia ia hagoadaia, ia gwau: “Sheol amo idia do lau hamauria; mase amo idia do lau abia lou. Mase e, oiemu hisihisi be edeseni? Sheol e, oiemu hadikaia karana be edeseni? Hebogahisi be egu matana ai do ia hedinarai lasi.”​—Hosea 13:14, NW.

² Baibel ena hereva idia abia dae lasi taudia idia laloa mase taudia do idia mauri lou be kavakava lalohadaina. To Siahu Ibounai Diravana ia hegeregere unai hoa karana ia karaia! To henanadai badana be Iehova ia ura mase taudia do ia hamauria, eiava. Kara maoromaoro tauna Iobu ia henanadai: “Bema tau goadana ta ia mase, do ia mauri lou diba, a?” Bena, ita ia hagoadaia haerena ia henia, ia gwau: “Do oi boiboi, bena oi dekenai lau sibona do lau haere. Oiemu imana edia gaukara do oi ura dikadika.” (Iobu 14:14, 15, NW) Unai hereva “ura dikadika” ese ura momokani eiava ura bada ena mamina ia hahedinaraia. (Salamo 84:2 itaia.) Oibe, Iehova be mai ena ura bada ida toreisi lou negana ia naria​—ia ura dikadika ia laloatao noho abidadama taudia do ia itaia lou.​—Mataio 22:31, 32.

Iesu ese Toreisi Lou Ena Anina Ia Hahedinaraia

3, 4. (a) Iesu ese toreisi lou ena anina be edena bamona ia hahedinaraia? (b) Badina be dahaka Iesu ia toreisi lou neganai, ia be taunimanima ta lasi, to ia be lauma ta?

³ Iobu bamona, idaunegai abidadama taudia ese toreisi lou idia lalo-pararalaia sisina. Iesu Keriso ese unai helaro hereadaena ena anina ia hahedinaraia goevagoeva. Toreisi lou dekenai ia sibona ena kahana mai anina bada ia hahedinaraia, ia gwau: “Dirava ena Natuna ia abidadama henia tauna ese mauri hanaihanai do ia abia.” (Ioane 3:36) Edeseniai unai mauri do idia moalelaia? Abidadama taudia momo herea dekenai, unai be tanobada dekenai do ia vara. (Salamo 37:11) To, Iesu be ena hahediba taudia dekenai ia gwau: “Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.” (Luka 12:32) Dirava ena Basileia be guba gauna. Unai dainai, unai gwauhamata ena anina be “orea maragi” taudia be guba dekenai Iesu ida lauma maurina do idia abia. (Ioane 14:​2, 3; 1 Petero 1:​3, 4) Unai be helaro namo hereana! Gabeai Iesu ese aposetolo Ioane dekenai ma ia hahedinaraia unai “orea maragi” taudia edia namba be 144,000 sibona.​—Apokalupo 14:1.

⁴ To, edena dala ai unai 144,000 taudia ese guba hairaina do idia abia? Iesu ese “Sivarai Namona dekena amo mauri hanaihanai ia hedinaraia vadaeni.” Ia ese ena rara amo “dala matamata, mauri dalana” guba dekenai ia kehoa. (2 Timoteo 1:​10; Heberu 10:​19, 20) Ia mase guna, Baibel ese ia perovetalaia hegeregerena. (Isaia 53:12) Bena, aposetolo Petero ese gabeai ia gwauraia bamona, “inai Iesu be Dirava ese ia hatorea isi.” (Kara 2:32) To Iesu ia toreisi lou neganai, ia be taunimanima ta lasi. Guna ia gwau: “Do lau henia aniani be egu tauanina, inai dekena amo tanobada ese mauri do ia abia.” (Ioane 6:51) Bema ena tauanina ia abia lou, unai boubou gauna be anina lasi. Unai dainai Iesu ena “tauanina idia alaia, to Lauma [dekenai] ia toreisi lou.” (1 Petero 3:18) “Unai dekena amo ia ese mauri hanaihanai ita totona ia abia,” anina be “orea maragi” taudia totona. (Heberu 9:12) Ia ese goevadae lasi taudia ia ruhaia totona ena mauri goevadaena ia henia bona Dirava dekenai mauri davana ia henia, bona unai kara amo namo idia davaria taudia ginigunadia be unai 144,000 taudia.

5. Iesu murinai idia raka taudia ginigunadia be dahaka helaro idia abia?

⁵ Iesu sibona lasi be guba dekenai toreisi lou ia abia. Paulo be Roma dekenai idia noho Keristani tadikaka ia hamaorodia Dirava ese idia ia horoa, ena natudia ai idia lao totona, bona bema unai horoa karana idia hamomokania bona idia haheauka ela bona dokona, Keriso ida ahuna do idia abia. (Roma 8:​16, 17) Paulo be ma ia gwau: “Bema Keriso danu ita hakapua tamona iena mase lalonai, vadaeni ia danu do ita hakapua tamona iena toreisi lou lalonai danu.”​—Roma 6:5.

Toreisi Lou Helarona Ia Hamomokania

6. Dahaka dainai Korinto dekenai toreisi lou idia hakoikoia toho, bona aposetolo Paulo be dahaka ia karaia?

⁶ Toreisi lou be Keristani tomadiho ena “diba hamatamaia gaudia” ta. (Heberu 6:​1, 2) To, Korinto dekenai unai hahediba herevana idia hakoikoia toho. Kongregesen taudia haida, reana Greek aonega herevadia ese idia veridia dainai, idia gwau: “Mase taudia do idia toreisi lou lasi.” (1 Korinto 15:12) Aposetolo Paulo be unai ia kamonai neganai, ia ura toreisi lou helarona ia hamomokania, bona horoa Keristani taudia edia helaro ia herevalaia badabada. Paulo ena hereva 1 Korinto karoa 15 dekenai mani ita laloa. Bema hereva gunana dekenai ai gwauraia bamona, unai karoa ibounai oi duahia guna vadaeni, unai ese oi do ia durua.

7. (a) Paulo ia herevalaia gauna badana be dahaka? (b) Daidia ese ia toreisi lou tauna Iesu idia itaia?

⁷ Korinto Ginigunana karoa 15 ena siri ginigunadia rua ai, Paulo ese ena hereva ena badina ia hahedinaraia, ia gwau: “Lauegu varavara taudia e, Sivarai Namona umui dekenai lau harorolaia gauna, be umui abia dae vadaeni, bona ia lalonai umui emui abidadama ia gini goada noho. . . . Inai Sivarai Namona dekena amo Dirava ese umui ia hamauria . . . To gau tamona, . . . umui abia dae kava garina.” Bema Korinto taudia be sivarai namona ai idia gini goada noho lasi, hereva momokani idia abia dae kava. Paulo be ma ia gwau: “Lau davaria hereva badana umui dekenai lau hamaoroa guna: Keriso be ita dainai ia mase, Buka Helaga lalonai ia torea hegeregerena. Idia guria vadaeni danu, to dina toi murinai mase dekena amo ia toreisi lou, Buka Helaga lalonai ia torea hegeregerena. Petero ese ia itaia, unai murinai aposetolo taudia 12 ese idia itaia. Unai murinai, nega tamona dekenai, iseda Keristani varavara taudia 500 mai kahana ese Iesu idia itaia. Inai varavara taudia momo idia do mauri noho, to haida be idia mase vadaeni [“mase dekenai idia mahuta,” NW]. Unai murinai Iamesi ese Iesu ia itaia, bona aposetolo ibounai ese danu ma idia itaia lou. Idia ibounai idia itaia murinai, lau danu ese Iesu lau itaia, to lau be mero ta ia vara [haraga] bamona.”​—1 Korinto 15:3-8.

8, 9. (a) Toreisi lou ita abia dae be mai anina bada edena dala ai? (b) Toana be edena negai Iesu be “varavara taudia 500 mai kahana” dekenai ia hedinarai?

⁸ Sivarai namona idia abia dae taudia dekenai dala tamona sibona be Iesu ena toreisi lou idia abia dae. “Keriso be ita dainai ia mase” bena Dirava ese ia hatorea isi, bona taunimanima momo ese unai idia itaia bona idia hamomokania. Idia ta be Petero. Iesu idia samania bona idia dogoatao hanuaboina ai Petero ese Iesu ia gorea, to gabeai Iesu be Petero dekenai ia hedinarai neganai, unai ese Petero ia hagoadaia bada. Iesu ia toreisi lou murinai, “aposetolo taudia 12” ia vadivadi henia danu​—unai ia vara dainai edia gari ia ore bona Iesu ena toreisi lou idia harorolaia goadagoada taudia ai idia lao.​—Ioane 20:​19-​23; Kara 2:​32.

⁹ Keriso be grup badana ta dekenai ia hedinarai danu, idia be “varavara taudia 500 mai kahana.” Galilea sibona dekenai ia murinai idia raka taudia be momo herea dainai, reana unai be Mataio 28:​16-​20 ia herevalaia negana ai ia vara, Iesu ese hahediba taudia halaoa haheganina ia henia negana unai. Unai taunimanima ese hamomokania herevana mai goadana idia gwauraia diba! Lagani 55 C.E. ai, Paulo ese inai revareva ginigunana Korinto taudia dekenai ia torea neganai, idia momo idia do mauri noho. To, mani oi itaia, ia gwau idia mase vadaeni taudia be “mase dekenai idia mahuta.” Dirava ese guba dekenai edia ahuna idia abia totona idia ia do hatorea isi lasi.

10. (a) Iesu be ena hahediba taudia ida ia hebou negana ginigabena amo dahaka ia vara? (b) Iesu be Paulo dekenai ia hedinarai ia be “mero ta ia vara [haraga] bamona” ena anina be dahaka?

¹⁰ Iesu ena toreisi lou ia hamomokania diba tauna badana ma ta be Iamesi, Iosepa bona Iesu ena sinana, Maria, edia natuna mero. Toana be, Iesu ia do toreisi lou lasi neganai, Iamesi be abidadama tauna lasi. (Ioane 7:5) To Iesu be Iamesi dekenai ia hedinarai murinai, Iamesi be abidadama tauna ai ia lao bona reana ia dainai ena tadidia danu be sivarai namona idia abia dae. (Kara 1:​13, 14) Iesu be ena hahediba taudia ida ia hebou negana ginigabena ai, guba dekenai ia daekau gwauraia neganai, idia ia hagania idia ese ‘ena ladana do idia gwauraia hedinarai . . . tanobada ena kahana ibounai.’ (Kara 1:6-11) Gabeai, Taso tauna Saulo, Keristani taudia ia dagedage henia tauna dekenai ia hedinarai. (Kara 22:​6-8) Iesu be Saulo dekenai ia hedinarai neganai, Saulo be “mero ta ia vara [haraga] bamona.” Unai be hegeregere Saulo be lauma maurina ai ia toreisi lou vadaeni bona Lohiabada be mai ena hairai ida ia itaia vadaeni, ena be lagani handred momo murinai unai toreisi lou korikorina do ia vara. Saulo dekenai unai ia vara dainai, ia ese Keristani kongregesen taudia ia alaia karana ia rakatania haraga bona ena mauri ia haidaua momokani. (Kara 9:​3-9, 17-​19) Saulo be aposetolo Paulo, Keristani abidadama ia hamomokania tauna mai goadana ta ai ia lao.​—1 Korinto 15:​9, 10.

Toreisi Lou Idia Abia Dae be Gau Badana

11. Edena dala ai Paulo ese haida edia hereva, “Mase taudia do idia toreisi lou lasi,” ena kerere ia hahedinaraia?

¹¹ Taunimanima momo ese Iesu ena toreisi lou idia hamomokania. Paulo ia gwau: “Bema Keriso be mase dekena amo ia toreisi lou ai harorolaia noho, edena bamona umui haida umui gwau mase taudia do idia toreisi lou lasi?” (1 Korinto 15:12) Unai taudia be toreisi lou idia daradaralaia eiava idia henanadailaia sibona lasi, to idia hahedinaraia goevagoeva toreisi lou idia abia dae lasi. Unai dainai Paulo ese edia lalohadai ena kerere ia hahedinaraia. Ia gwau, bema Keriso ia toreisi lou lasi, Keristani taudia idia gwauraia sivaraina be koikoi, bona Keriso ena toreisi lou idia hamomokania taudia be ‘Dirava ena hereva idia gwauraia koikoi’ taudia. Bema Keriso ia toreisi lou lasi, Dirava ese mauri ena davana ia abia lasi; Keristani taudia be ‘edia kara dika lalonai idia do noho.’ (1 Korinto 15:13-​19; Roma 3:​23, 24; Heberu 9:​11-​14) Bona “mase dekenai idia mahuta” Keristani taudia, idia haida be abidadama dainai idia mase taudia, idia boio bamona badina idia be mai edia helaro lasi. Bema Keristani taudia be inai mauri sibona idia abia, edia noho be dika momokani! Edia hisihisi ibounai idia haheaukalaia kava.

12. (a) Paulo ia gwau Keriso ese ‘toreisi lou taudia ia gunalaia,’ unai amo dahaka ia hahedinaraia? (b) Keriso ese dahaka ia karaia dainai toreisi lou ia vara diba?

¹² To, ia be unai bamona lasi. Paulo be ma ia gwau: “Keriso be Dirava ese mase dekena amo ia hatorea isi.” Ma danu, “toreisi lou taudia be ia ese idia ia gunalaia.” (1 Korinto 15:20) Israela taudia ese mai edia kamonai ida uma gaudia edia anina ginigunadia be Iehova dekenai idia henia neganai, Iehova ese idia ia hanamoa bena uma ena anina bada herea idia haboua. (Esodo 22:​29, 30; 23:19; Aonega Herevadia 3:​9, 10) Paulo ia gwau Keriso ese ma haida ia “gunalaia” neganai, ia hahedinaraia ma haida be mase amo do idia toreisi lou bona guba dekenai do idia mauri. Paulo ia gwau: “Badina be tau tamona dekena amo mase ia vara, bona inai bamona danu, tau tamona dekena amo mase dekena amo toreisi lou ia vara. Badina be taunimanima ibounai Adamu dainai idia mase vadaeni, unai bamona danu Keriso idia abidadama henia dainai ibounai do idia mauri.” (1 Korinto 15:21, 22) Toreisi lou ia vara diba, badina Iesu ese ena mauri goevadaena ia henia kara dika ena davana ia karaia totona, ia ese dala ia kehoa kara dika bona mase edia igui hesiai amo taunimanima ia ruhaia totona.​—Galatia 1:4; 1 Petero 1:​18, 19.a

13. (a) Guba toreisi louna be edena negai ia vara? (b) Dahaka dainai horoa taudia haida be “mase dekenai idia mahuta” lasi?

¹³ Paulo be ma ia gwau: “To ta ta edia nega, edia nega dekenai mauri do idia abia. Keriso ia toreisi lou guna, unai murinai, ia giroa mai neganai, Keriso idia badinaia taudia ibounai danu do idia toreisi lou.” (1 Korinto 15:23) Keriso be lagani 33 C.E. ai toreisi lou ia abia. To, Iesu murinai idia raka horoa taudia​—“Keriso idia badinaia taudia”​—be gabeai Iesu ese ena lohia siahuna ia abia negana murinai do idia toreisi lou, bona Baibel ena peroveta herevana hegeregerena unai siahu be lagani 1914 ai ia abia. (1 Tesalonika 4:​14-​16; Apokalupo 11:18) To ia giroa negana lalonai do idia mauri noho taudia be edena bamona? Paulo ia gwau: “Umui kamonai. Hunia hereva umui lau hamaoroa inai: Ita ibounai do ita mase lasi, to Dirava ese ita ibounai do ia senisia, do ita idau. Inai be karaharaga momokani do ia vara, matana hakapua haraga ena nega bamona, dokona kibina do idia hiriria neganai. Oibe, kibi do idia hiriria, vadaeni mase taudia do idia toreisi lou, bona do idia mase lou diba lasi. Bona ita ibounai Dirava ese do ia senisia, do ita idau.” (1 Korinto 15:51, 52) Ia hedinarai goevagoeva, horoa taudia ibounai lasi be guri dekenai idia noho ela bona toreisi lou ia vara. Keriso ia giroa negana lalonai idia mase taudia be maoromaoro idia idau.​—Apokalupo 14:13.

14. Edena bamona horoa taudia be “bapatiso idia abia [idia be] mase taudia totona”?

¹⁴ Paulo ia henanadai: “Bema inai be momokani, badina dahaka haida ese bapatiso idia abia [idia be] mase taudia totona? Sedira toreisi lou idia hamomokania dainai unai bamona idia karaia, ani? Bona ai danu be edena bamona? Badina be dahaka nega ibounai mase kahirakahira ai noho?” (1 Korinto 15:29, 30) Paulo ia laloa lasi mauri taudia haida be mase taudia totona bapatiso idia abia, Baibel haida idia hahedinaraia bamona. Bapatiso be Keristani hahediba taudia idia karaia karana, to idia mase taudia be hahediba taudia ai idia lao diba lasi. (Ioane 4:1) To, Paulo ese idia mauri Keristani taudia ia herevalaia, idia momo be ia bamona ‘nega ibounai mase kahirakahira idia noho.’ Horoa Keristani taudia be Keriso ena mase lalonai idia bapatiso. (Roma 6:3) Dirava ese idia ia horoa negana amo “bapatiso” idia abia noho bamona, ela bona edia mauri dokonai do idia mase Keriso bamona. (Mareko 10:35-​40) Idia mase neganai edia helaro be guba dekenai toreisi lou hereadaena do idia abia.​—1 Korinto 6:​14; Filipi 3:​10, 11.

15. Paulo ese reana edena dika ia davaridia, bona toreisi lou ia abidadama henia karana ese edena bamona ia durua unai ia haheaukalaidia totona?

¹⁵ Hari Paulo ese sibona ena mauri ia herevalaia, ia ese nega momo dika ia davaria dainai ia gwau diba: “Dina ibounai lau idia alaia mase gwauraia.” Dika haida do idia gwau ia hekokoroku noho, Paulo be ma ia gwau: “Inai bamona lau hereva ena badina be dahaka? Badina korikori be, umui bona lau be Keriso Iesu iseda Lohiabada lalonai ita mauri noho, bona umui lau heagilaia dainai.” The Jerusalem Bible ia gwau: “Tadikaka e, dina ibounai mase be lau kahirakahira ia noho, bona unai lau hamomokania diba badina iseda Lohiabada Keriso Iesu lalonai umui lau heagilaia.” Paulo ese siri 32 ai, ia davaria dika ena haheitalai ta ia gwauraia, ia gwau ‘Efeso dekenai uda boroma danu ia heatu.’ Roma taudia ese raskol taudia idia hamasea dalana be steidiam ai uda animal vairadiai idia negedia. Bema Paulo be uda animal korikoridia ida ia heatu bona ia roho mauri, unai be Iehova ena heduru sibona dainai ia vara diba. Bema toreisi lou helarona be lasi, unai bamona mauri, dika ia davaria diba mauri dalana, ia abia hidi be kavakava karana. Bema vaira maurina ena helaro be lasi, Dirava ia tomadiho henia karana dainai dika bona hekwarahi ia haheaukalaia be anina lasi. Paulo ia gwau: “Bema mase taudia Dirava ese ia hatorea isi lasi neganai, inai bamona ita hereva namo, ‘Laloa lasi, ita aniani bona ita inuinu, badina be kerukeru do ita mase.’ ”​—1 Korinto 15:31, 32; ma danu 2 Korinto 1:​8, 9; 11:23-​27 itaia.

16. (a) Inai hereva “ita aniani bona ita inuinu, badina be kerukeru do ita mase” be reana edeseni amo ia mai? (b) Unai lalohadai abia dae karana dainai dahaka dika idia vara diba?

¹⁶ Reana Paulo ese Isaia 22:​13 ena hereva ia gwauraia lou, unai siri ese Ierusalema idia noholaia kamonai lasi taudia edia lalohadai, idia vara gaudia ibounai be Dirava ese guna ia abia hidi vadaeni lalohadaina, idia abia dae. Eiava reana ia ese Epikuro taudia edia lalohadai ia laloa, idia ese mase murinai ia noho maurina ena helaro idia dadaraia bona idia gwau tauanina hamoalea karadia be mauri ena anina badana. Herevana edena ia laloa, to “ita aniani bona ita inuinu” lalohadaina be Dirava ese ia ura henia lasi. Unai dainai, Paulo ese sisiba ia henia, ia gwau: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:33) Toreisi lou idia dadaraia taudia idia bamoa karana ese dika bada ia havaraia diba. Reana unai bamona hebamo dainai, Paulo ese Korinto kongregesen lalonai ia hamaoromaoroa toho hekwakwanai idia vara, hegeregere idia lebulebu, idia heatu, kota dekenai ma haida idia samania, bona Lohiabada ena Anibou idia matauraia lasi.​—1 Korinto 1:​11; 5:1; 6:1; 11:​20-​22.

17. (a) Paulo ese Korinto taudia be edena bamona ia hagoadaia? (b) Edena henanadai idia do noho?

¹⁷ Unai dainai Paulo ese Korinto taudia ia hagoadaia, ia gwau: “Umui emui laloa kavakava umui hadokoa, bona emui kara dika daladia umui rakatania. Umui kamonai. Umui haida be Dirava umui diba lasi. Inai bamona lau hereva, do umui hemarai totona.” (1 Korinto 15:34) Toreisi lou idia laloa kerere dainai lauma dalanai idia haida idia kavakava bamona, idia inuinu kekero bamona. Gau badana be idia laloa maoro, edia lalona idia diari. Hari inai negai horoa Keristani taudia be lauma dalanai idia noga noho be gau badana danu, namo lasi tanobada taudia edia lalohadai kereredia ese idia veridia. Namona be guba dekenai do idia toreisi lou helarona idia dogoatao auka. To henanadai haida idia do noho​—unai negai Korinto taudia dekenai bona hari ita dekenai danu. Hegeregere, unai 144,000 taudia be guba dekenai do idia toreisi lou neganai, idia be edena bamona? Bona guri dekenai idia do noho bona guba helarona idia abia lasi taudia milioni momo be edena bamona? Toreisi lou ena anina idia dekenai be dahaka? Hereva gabena ai, Paulo ena toreisi lou herevana dokona do ita stadilaia.

[Footnote]

Oi Laloatao, A?

◻ Iesu ese edena bamona toreisi lou ena anina ia hahedinaraia?

◻ Keriso ena toreisi lou idia hamomokania taudia haida be daidia?

◻ Dahaka dainai haida ese toreisi lou herevana idia hakoikoia toho, bona Paulo be dahaka ia karaia?

◻ Dahaka dainai horoa Keristani taudia ese toreisi lou idia abia dae be mai anina bada?

[Picture on page 15]

Iairo ena natuna kekeni ese ia hamomokania toreisi lou ia vara diba

[Picture on page 16]

Bema toreisi lou helarona be lasi, abidadama Keristani taudia be abidadama dainai idia mase be anina lasi