Mai Ena Kamonai Bona Kara Maoromaoro “Hesiai Tauna”
“Hesiai tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, . . . tauna be daika?”—MATAIO 24:45.
1, 2. Dahaka dainai hari inai negai, hanaihanai lauma aniani ita abia be gau badana?
TUESDAY, Nisan 11, 33 C.E. ena adorahi ai, Iesu ena hahediba taudia ese henanadai ta idia henia, bona hari inai negai unai henanadai be mai anina ita dekenai. Ia idia nanadaia: “Do oi giroa mai, bona tanobada dokona danu, ena toana be dahaka?” Iesu ena haere dekenai peroveta hereva badana ta ia gwauraia. Ia gwau tuari, doe, tano mareremarere, bona gorere idauidau ena nega dikana do idia vara. Bona unai be “hisihisi nega ena hamatamaia sibona.” To unai dika badadia be gabeai do idia dika momokani. Unai be gari gauna!—Mataio 24:3, 7, 8, 15-22; Luka 21:10, 11.
2 Lagani 1914 amo, Iesu ena peroveta hereva momo idia guguru vadaeni. Taunimanima be “hisihisi” bada herea idia davaria noho. To, Keristani taudia idia gari lasi be namo. Iesu ia gwauhamata lauma aniani namodia amo idia do ia ubua. Hari Iesu be guba ai dainai, edena bamona dala ia karaia tanobada ai lauma aniani ita abia totona?
3. Iesu be dahaka ia karaia lauma aniani be nega korikorina ai ita abia totona?
3 Iesu sibona ese unai henanadai ena haere ia henia. Iena peroveta hereva badana ia herevalaia lalonai, ia henanadai: “Hesiai tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona biaguna ena natuna edia aniani neganai edia aniani do ia henia, tauna be daika?” Bena ia gwau: “Iena biaguna do ia mai neganai do ia davaria, unai bamona ia karaia noho tauna be ia namo. Umui lau hamaoroa momokani, iena kohu ibounai naria tauna iena biaguna ese do ia halaoa.” (Mataio 24:45-47) Oibe, lauma aniani henia totona “hesiai tauna” ta ia abia hidi, unai “hesiai tauna” be mai ena kamonai bona kara maoromaoro. Unai hesiai tauna be tau tamona, bona idia haidaua loulou, eiava ia be ma gau ta? Hesiai tauna mai ena kamonai ese lauma aniani bada ia henia noho dainai, ita ura ena haere ita diba.
Tau Tamona Eiava Orea Ta?
4. Edena bamona ita diba “hesiai tauna mai ena kamonai, bona mai ena kara maoromaoro” be tau tamona lasi?
4 “Hesiai tauna mai ena kamonai, bona mai ena kara maoromaoro” be tau tamona lasi. Dahaka dainai? Badina unai hesiai tauna be lauma aniani henia gaukarana be aposetolo edia nega ai ia hamatamaia, bona Iesu ia gwau bamona, ena biaguna be lagani 1914 ai ia giroa mai neganai, unai hesiai tauna be unai bamona do ia karaia noho. Unai ese ia hahedinaraia tau ta be lagani 1,900 bona ma haida lalonai mai kamonai ida hesiai gaukara ia karaia. Metusela danu be unai bamona ia mauri daudau lasi!—Genese 5:27.
5. Inai hereva “hesiai tauna mai ena kamonai, bona mai ena kara maoromaoro” be horoa Keristani taudia ta ta ia gwauraia lasi, ena badina mani oi gwauraia hedinarai.
5 Vadaeni, inai hereva “hesiai tauna mai ena kamonai, bona mai ena kara maoromaoro” be Keristani taudia ta ta ia herevalaia, a? Momokani, Keristani taudia ibounai be mai edia kamonai bona kara maoromaoro be namo; to, Iesu be “hesiai tauna mai ena kamonai, bona mai ena kara maoromaoro” ia herevalaia neganai, ia be gau ta ia laloa. Unai be edena bamona ita diba? Badina ia gwau “biaguna do ia mai neganai,” ia ese unai hesiai tauna do ia abia hidi “iena kohu ibounai naria” totona. Edena bamona Keristani taudia ta ta ese gau ibounai—Lohiabada ena kohu “ibounai”—idia naria diba? Unai be hegeregere lasi!
6. Israela besena be edena dala ai Dirava ena “hesiai tauna” bamona ena gaukara ia karaia?
6 Vadaeni ita gwau diba, Iesu ese Keristani taudia edia orea ta ia gwauraia “hesiai tauna mai ena kamonai, bona mai ena kara maoromaoro.” Hesiai tauna be orea ta bamona, a? Oibe. Lagani 700 gunanai Keriso ia do vara lasi neganai, Iehova ese Israela besena ibounai ia gwauraia ena “hereva hamomokania taudia” bona ‘ia abia hidi, ena hesiai [“tauna”, NW ] gaukara do idia karaia’ totona. (Isaia 43:10) Lagani 1513 B.C.E. ai, Mose ena taravatu idia abia negana amo ema bona Pentekoste 33 C.E. ai idia noho Israela taudia ibounai, be unai orea lalonai idia noho. Israela taudia momo ese unai bese ena gaukara idauidau idia naria lasi eiava ena lauma aniani idia hegaegaelaia lasi. Iehova ese king taudia, diadi taudia, peroveta taudia, hahelaga taudia, bona Levi taudia ia gaukaralaia unai gaukara idia karaia totona. To, Israela be bese ta dainai, idia ese Iehova ena lohia siahuna idia abia isi bona bese idauidau huanai ia idia hanamoa. Israela taudia ta ta be Iehova ena hereva hamomokania tauna.—Deuteronomi 26:19; Isaia 43:21; Malaki 2:7; Roma 3:1, 2.
“Hesiai Tauna” Ta Ia Kokia
7. Dahaka dainai idaunegai Israela ia hegeregere lasi Dirava ena “hesiai tauna” ai ia lao totona?
7 Lagani handred momo gunanai Israela be Dirava ena “hesiai tauna” dainai, ia be Iesu ese ia gwauraia hesiai tauna, a? Lasi, badina idaunegai Israela taudia be idia kamonai lasi bona idia kara maoromaoro lasi. Paulo ese guna Iehova be unai bese dekenai Ia gwauraia herevadia amo unai ia gwauraia lou: “Umui be Iuda taudia dainai, Iuda lasi taudia ese Dirava ena ladana idia hadikaia.” (Roma 2:24) Momokani, Israela ena gwau-edeede karana ia bada ia lao ela bona Iesu ia dadaraia neganai, Iehova ese idia ia dadaraia.—Mataio 21:42, 43.
8. Edena negai “hesiai tauna” ta idia abia hidi Israela ena gabu ia abia totona, bona unai be edena dala amo ia vara?
8 “Hesiai tauna,” Israela, ena kamonai lasi karana dainai, ita gwau lasi abidadama tomadiho taudia be lauma aniani do idia abia lasi. Iesu ia toreisi lou bena dina 50 murinai, Pentekoste 33 C.E. ai, Ierusalema ena atai daiutuna ai ena hahediba taudia 120 ese lauma helaga idia abia. Unai negai, bese matamatana ta ia vara. Unai bese taudia ese Ierusalema taudia dekenai mai gari lasi ida “Dirava ena hoa gaudia” idia herevalaia neganai, ena vara idia gwauraia hedinarai. (Kara 2:11) Unai dainai, unai lauma bese matamatana be “hesiai tauna” ai ia lao, bona bese idauidau dekenai Iehova ena hairai ia gwauraia bona nega korikori ai lauma aniani ia henia. (1 Petero 2:9) Unai dainai, inai ladana “Dirava ena Israela” ia abia be maoro.—Galatia 6:16.
9. (a) Daidia be “hesiai tauna mai ena kamonai, bona mai ena kara maoromaoro”oreana taudia? (b) ‘Ruma taudia’ be daidia?
9 “Dirava ena Israela” taudia ta ta be gwauhamata bona bapatiso idia abia Keristani taudia, lauma helaga ese ia horodia bona edia helaro be guba dekenai. Unai dainai inai hereva, “hesiai tauna mai ena kamonai, bona mai ena kara maoromaoro” be lagani 33 C.E. ai ema bona hari tanobada ai idia noho horoa lauma besena ena orea ibounai ia herevalaia, herevana edena negai idia noho. Hegeregere, lagani 1513 B.C.E. amo ela bona Pentekoste 33 C.E. huanai idia noho Israela taudia ibounai, be Keristani negana ia do mai lasi neganai ia noho hesiai tauna oreana lalonai idia noho. To, hesiai tauna amo lauma aniani idia abia ‘ruma taudia’ be daidia? Aposetolo edia negai, Keristani taudia ibounai be guba helarona idia abia taudia. Unai dainai, ruma taudia danu be horoa Keristani taudia, orea ta bamona lasi, to taunimanima ta ta. Idia ibounai, anina be kongregesen dekenai maduna idia huaia taudia danu, be hesiai tauna amo lauma aniani idia abia be namo.—1 Korinto 12:12, 19-27; Heberu 5:11-13; 2 Petero 3:15, 16.
“Idia Ta Ta Mai Edia Gaukara”
10, 11. Edena bamona ita diba, hesiai tauna oreana taudia ibounai be gaukara tamona idia abia lasi?
10 Ena be “Dirava ena Israela” be hesiai tauna mai ena kamonai bona kara maoromaoro oreana bona mai ena gaukara, to idia ta ta danu be mai edia maduna. Iesu ena hereva Mareko 13:34 ese unai ia hahedinaraia. Ia gwau: “Ia be tau ta hanua daudau dekenai ia lao bamona, iena ruma ia rakatania, iena hesiai taudia dekenai siahu ia henia, idia ta ta mai edia gaukara. Bona ruma biaguna ese iduara naria tauna dekenai ia hamaoroa, ia naria namonamo.” Unai dainai hesiai tauna oreana taudia ta ta be maduna idia abia—Keriso ena kohu ibounai tanobada ai idia habadaia totona. Idia ta ta be iena diba bona dala hegeregerena gaukara idia karaia.—Mataio 25:14, 15.
11 Danu, aposetolo Petero be ena negai idia noho horoa Keristani taudia ia hamaoroa: “Iena hariharibada dekena amo, Dirava ese umui ta ta ibounai dekenai harihari gaudia idauidau ia henia vadaeni. Unai dainai, umui ese inai harihari gaudia do umui gaukaralaia, emui Keristani varavara taudia do umui durua totona. Unai dekena amo umui be Dirava ena hesiai taudia namodia, bona iena hariharibada idauidau umui hedinaraia noho.” (1 Petero 4:10) Unai dainai, unai horoa taudia be mai edia maduna Dirava ese ia henia harihari gauna idia gaukaralaia totona, unai amo edia Keristani varavara idia durua. Danu, Petero ena hereva ese ia hahedinaraia Keristani taudia ibounai be goada, maduna, eiava hahenamo tamona idia abia lasi. To, hesiai tauna oreana taudia ta ta be dala haida amo lauma besena ena tubu dalana idia durua diba. Edena dala ai?
12. Edena dala ai hesiai tauna oreana taudia ta ta, herevana tau eiava hahine, ese hesiai tauna ena tubu dalana idia durua?
12 Ginigunana be, idia ta ta be Iehova ena witnes tauna, Basileia ena sivarai namona idia harorolaia. (Isaia 43:10-12; Mataio 24:14) Iesu be guba dekenai ia do daekau lasi neganai, ena kamonai hahediba taudia ibounai, tatau bona hahine, ia hagania hadibaia taudia ai idia lao totona. Ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.”—Mataio 28:19, 20.
13. Horoa taudia ibounai ese dahaka hahenamo idia moalelaia?
13 Hahediba taudia matamatadia idia davaria neganai, idia dekenai Keriso ese ena hahediba taudia dekenai ia henia hahegani ibounai idia hadibaia. Gabeai, kamonai taudia be idia hegeregere ma haida idia hadibaia totona. Tano momo dekenai hesiai tauna oreana ai do idia lao taudia totona dala idia karaia lauma aniani idia abia. Horoa Keristani taudia ibounai, tatau bona hahine, be hahediba taudia halaoa gaukarana ena hahegani idia badinaia. (Kara 2:17, 18) Unai gaukara ia karaia matamaia hesiai tauna be ena gaukara ia hamatamaia negana amo, bona unai gaukara do ia karaia noho ela bona tanobada ena dokona.
14. Kongregesen lalonai daidia sibona be hadibaia gaukara idia karaia diba, bona kamonai horoa taihudia ese unai be edena bamona idia laloa?
14 Idia bapatiso matamata horoa taudia be hesiai tauna ai idia lao, bona guna herevana daika ese idia ia hadibaia, to kongregesen idia naria elda taudia, edia kara be Baibel ena taravatu ida ia hegeregere taudia, amo hadibaia herevadia idia abia. (1 Timoteo 3:1-7; Tito 1:6-9) Unai abia hidi taudia be dala hereadaena amo unai bese ena tubu dalana idia durua. Kongregesen lalonai hadibaia gaukara be Keristani tatau sibona dekenai idia henia dainai, kamonai horoa Keristani hahine be idia badu lasi. (1 Korinto 14:34, 35) To, kongregesen ai idia noho tatau edia gaukara goadagoada amo namo idia davaria dainai idia moale bona hesiai gaukara ena hahenamo haida hegeregere, ma haida dekenai sivarai namona laohaia gaukarana idia karaia diba dainai idia moale. Hari idia gaukara goada horoa taihudia danu be unai bamona manau karana idia hahedinaraia, herevana elda taudia be horoa taudia eiava lasi.
15. Aposetolo edia negai, edena dala badana ta ai lauma aniani idia abia, bona daidia ese unai aniani henia gaukarana idia gunalaia?
15 Aposetolo edia negai, orea idia hakaua aposetolo taudia bona hahediba taudia ma haida ese idia torea revareva amo mai anina bada lauma aniani idia henia. Idia torea revarevadia—Dirava ena lauma amo idia vara Keristani Greek Revarevadia ena buka 27 unai—be kongregesen idauidau dekenai idia hariharilaia bona ita daradara lasi unai negai idia noho elda taudia edia hadibaia herevadia ibounai be unai buka amo idia abia. Unai dala ai, hesiai tauna ena orea taudia be mai kamonai ida kudou-maoro Keristani taudia dekenai lauma aniani idia henia. Aposetolo edia negai idia noho hesiai tauna oreana be mai kamonai ida edia hahegani idia badinaia.
“Hesiai Tauna” Lagani 1900 Murinai
16, 17. Lagani 1914 ia lao henia laganidia lalonai, hesiai tauna oreana ese edena dala ai ia hahedinaraia mai kamonai ida ena gaukara ia karaia noho?
16 Hari be edena bamona? Lagani 1914 ai, Iesu ena noho ia matamaia neganai, ia davaria horoa Keristani ena orea ta be mai kamonai ida aniani be nega korikorina ai ia henia noho, a? Oibe, unai bamona orea ta ia davaria. Unai orea be ia hedinarai goevagoeva badina huahua namodia ia havaraia. (Mataio 7:20) Unai nega amo ema bona hari histori ese ia hamomokania Iesu ese orea maorona ia abia hidi.
17 Iesu ia giroa mai neganai, ruma taudia 5,000 bamona be Baibel ena hereva momokani idia harorolaia goadagoada noho. Gaukara taudia be momo lasi, to hesiai tauna be sivarai namona ia harorolaia totona dala matamata haida ia gaukaralaia. (Mataio 9:38) Hegeregere, dala idia karaia niuspepa 2,000 dekenai Baibel ena hereva badadia idia halasia totona. Unai dala ai, Dirava ena Hereva be taunimanima tausen momo ese nega tamona ai idia duahia diba. Ma danu, hora 8 program mai ena slaid piksa bona muvini piksa idia hegaegaelaia. Unai dala matamatadia dainai, Baibel ena sivarai, Dirava ese gau ibounai ia havaraia negana amo ela bona Keriso ena Lagani 1,000 Lohia Negana ia ore ena sivarai, be tano idauidau ai taunimanima milioni 9 ese idia itaia. Dala ma ta be, idia printaia buka bona magasin ia gaukaralaia. Hegeregere, lagani 1914 ai, inai magasin ena kopi 50,000 idia halasia.
18. Edena negai Iesu ese hesiai tauna ia abia hidi ena kohu ibounai ia naria totona, bona dahaka dainai?
18 Oibe, Biaguna ia ginidae neganai, ia davaria ena hesiai tauna be ena ruma taudia ia ubua noho bona sivarai namona ia harorolaia danu. Unai dainai, hesiai tauna dekenai maduna badadia do ia henia. Iesu ia gwau: “Umui lau hamaoroa momokani, iena kohu ibounai naria tauna iena biaguna ese do ia halaoa.” (Mataio 24:47) Lagani 1919 ai Iesu ese unai ia karaia, hesiai tauna be hahetoho negana ia hanaia murinai. To, dahaka dainai “hesiai tauna mai ena kamonai, bona mai ena kara maoromaoro” be maduna badadia ia abia? Badina Biaguna ena kohu ia bada ia lao. Lagani 1914 ai Iesu be lohia siahuna ia abia.
19. “Hutuma bada herea” ese lauma aniani idia abia dalana mani oi gwauraia hedinarai.
19 King dagina ia abia Biaguna ese ena kamonai hesiai tauna ia abia hidi dahaka kohu ia naria totona? Iena lauma kohudia ibounai tanobada dekenai. Hegeregere, lagani 1914 ai Keriso be king ai ia lao bona lagani 20 idia hanaia murinai, “mamoe idaudia” edia “hutuma bada herea” taudia idia hedinarai. (Apokalupo 7:9, Taravatu Matamatana; Ioane 10:16) Idia be Dirava ena Israela ena horoa taudia lasi, to idia be kudou-maoro tatau bona hahine mai edia tanobada helarona, Iehova idia lalokau henia bona idia ura horoa taudia bamona ia idia hesiai henia. Hegeregere “hesiai tauna mai ena kamonai, bona mai ena kara maoromaoro” dekenai idia gwau: “Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.” (Sekaraia 8:23) Unai bapatiso matamata Keristani taudia be horoa ruma taudia ida lauma aniani tamona idia abia, bona unai nega amo ema bona hari unai orea rua be lauma patana tamona amo idia aniani. “Hutuma bada herea” taudia dekenai unai be hahenamo badana!
20. “Hutuma bada herea” taudia be dahaka gaukara idia karaia Lohiabada ena kohu idia habadaia totona?
20 “Hutuma bada herea” taudia be horoa hesiai tauna oreana ida sivarai namona idia harorolaia. Idia haroro lalonai, Biaguna ena tanobada kohu idia habadaia, unai ese “hesiai tauna mai ena kamonai, bona mai ena kara maoromaoro” ena maduna ia habadaia. Hereva momokani idia tahua taudia edia namba ia bada daekau dainai, gau badana be printa gabudia idia habadaia be namo, unai amo Baibel idia herevalaia bukadia momo idia printaia diba. Iehova ena Witnes taudia edia brens opesi be tano momo ai idia haginia. Misinari taudia be “tanobada ena kahana ibounai” dekenai idia siaia lao. (Kara 1:8) Lagani 1914 ai horoa taudia be 5,000 bamona, hari Dirava idia hanamoa taudia edia namba be ia bada daekau milioni 6 mai kahana, idia momo be “hutuma bada herea” taudia. Oibe, lagani 1914 ai, King be terona ai ia helai neganai, ena kohu be ia bada daekau momokani!
21. Stadi gabena dekenai edena parabole rua do ita stadilaia?
21 Unai ibounai ese ia hahedinaraia, hesiai tauna be “mai ena kamonai, bona mai ena kara maoromaoro.” Iesu be hesiai tauna “mai ena kamonai, bona mai ena kara maoromaoro” ia herevalaia murinai, unai kara idia hahedinaraia parabole rua ia henia: aonega bona kavakava kekenidia ena parabole bona moni ena parabole. (Mataio 25:1-30) Unai amo iseda lalona ia veria momokani! Hari ita dekenai unai parabole edia anina be dahaka? Unai henanadai be hereva gabena dekenai do ita itaia.
Dahaka Oi Laloa?
• Daidia be “hesiai tauna mai ena kamonai, bona mai ena kara maoromaoro” oreana taudia?
• ‘Ruma taudia’ be daidia?
• Edena negai Lohiabada ese hesiai tauna mai ena kamonai ia abia hidi ena kohu ibounai ia naria totona, bona dahaka dainai unai negai?
• Vanegai laganidia lalonai, daidia ese heduru idia henia Lohiabada ena kohu idia habadaia totona, bona edena dala ai unai bamona idia karaia?
[Pictures on page 22]
Aposetolo edia negai ia noho hesiai tauna oreana be ena hahegani ia badinaia