Emu Ruma be Miri o Nadi Latanai Oi Haginia?

BAIBEL duahia karana oi moalelaia, a? Nega ta oi makaia, bona unai negai hanaihanai Iehova ena Witnes tauna o hahinena ta ida Baibel umui herevalaia hebou, a? Bema oibe, vadaeni reana Baibel amo oi dibaia gaudia ese oi idia durua, hari tanobada ai idia vara hekwakwanai idauidau edia badina oi lalopararalaia totona. (Apokalupo 12:​9, 12) Danu, Baibel ena siri momo ese metau negadiai emu lalona idia hagoadaia, bona oi idia durua vaira neganai do ia vara tanobada matamatana oi naria noho totona.​​—⁠Salamo 145:14; 147:3; 2 Petero 3:​13.

Bema ta ia ura Keriso murinai ia raka, vadaeni Baibel amo diba maoromaoro ia abia be mai anina bada. To unai sibona be hegeregere, a? Lasi. Bema ia ura hahetoho negadiai ia gini goada bona Keristani tauna momokanina ta ai ia lao, mai anina bada gauna ma ta ia karaia be namo. Unai be dahaka? Haere ita davaria totona, Iesu ese Galilea ai ia gwauraia Ororo Harorona mani ita herevalaia sisina.​​—⁠Mataio 5:​1, 2.

Ruma Rua Bona Hahetoho

Iesu ena Ororo Harorona oi diba, a? Unai haroro herevana be Evanelia bukadia Mataio bona Luka dekenai oi duahia diba. (Mataio 5:1–​7:​29; Luka 6:​20-​49) Ororo Harorona ibounai be miniti 20 lalonai ita duahia haorea diba. Unai Ororo Harorona ai, Iesu be Heberu Revarevadia ena hereva 20 mai kahana bona parabole 50 mai kahana bamona ia gwauraia. Unai parabole ta​​—⁠ruma rua parabolena​​—⁠be ena hereva dokonai ia gwauraia dainai, taunimanima momo ese idia laloatao. To unai parabole ena anina oi lalopararalaia be namo, unai amo do oi itaia edena dala ai mai haheauka ida Keriso murinai oi raka noho, herevana dahaka gaudia ese emu abidadama do idia tohoa.

Iesu ia gwau: “Lauegu hereva inai ia kamonai, bona ia karaia tauna be aonega tauna ta bamona, ia ese iena ruma nadi latanai ia haginia. Vadaeni medu bada ia diho, sinavai ia abata, lai bada ia botaia unai ruma dekenai. To unai ruma be ia moru lasi, badina ia be nadi latanai tau ese ia haginia. Ma danu, egu hereva ia kamonai, to ia karaia lasi tauna be kavakava tauna ta bamona. Inai tau ena ruma be miri latanai ia haginia. Vadaeni medu bada ia diho, sinavai be ia abata, lai bada ia botaia unai ruma dekenai. Vadaeni, ia moru. Ia moru neganai be ia dika momokani.”​​—⁠Mataio 7:​24-​27.

“Guri Ia Geia Dobu” Tauna

Dahaka dainai Iesu be ena hahediba taudia dekenai ruma haginia taudia rua ena parabole ia gwauraia? Haere ita diba totona, namona be Iesu ena hereva ena anina ita tahua namonamo. Unai ruma ruaosi ita herevalaia sisina. Idia dekenai be hekwakwanai tamona​—⁠medu bona lai​—⁠ia vara. Reana ruma edia toana be hegeregere. Bona reana ruma ta be ruma ma ta kahirakahira ia gini. To, ruma ta be miri latanai ia gini, bona ma ta be nadi latanai ia gini. Dahaka dainai? Luka ia gwau, aonega tauna be “guri ia geia dobu,” bena ruma be nadi latanai ia haginia. (Luka 6:​48) Unai dainai, aonega tauna ena ruma be ia gini goada.

Dahaka dainai Iesu be unai parabole ia gwauraia? Iesu be ruma ena toana o gabu o hekwakwanai ena bada ia herevalaia lasi, to ia be ruma idia haginia taudia ruaosi edia kara ia herevalaia. Aonega tauna be guri ia geia dobu, to kavakava tauna be unai bamona ia karaia lasi. Edena dala ai oi be aonega tauna bamona, guri do oi geia dobu? Iesu ia gwau: “Umui be badina dahaka umui gwauraia lau dekenai, umui gwau, ‘Lohiabada e, Lohiabada e,’ to egu hereva umui karaia lasi? Lau dekenai do ia mai, egu hereva do ia kamonai, bona karana do ia karaia, tauna ena toana do lau hedinaraia. Ia be tau ta bamona, iena ruma do ia karaia gwauraia, vadaeni guri ia geia dobu, nadi ena latanai ruma ia haginia.”​​—⁠Luka 6:​46-​48.

Bema Baibel ena hahediba herevadia ita kamonai to kara ta ita karaia lasi, eiava ruma ai Baibel ita duahia to ena sisiba ita badinaia lasi, vadaeni ita be miri latanai ruma ia haginia tauna bamona​​—⁠guri ia geia dobu lasi. Momokani, Keriso ena hahediba herevadia ita badinaia totona, ita hekwarahi be gau badana. Anina be aonega tauna ena kara ita tohotohoa, ia be guri ia geia dobu, nadi ia davaria totona.

To, Keriso murinai ia raka tauna be Keristani tauna goadana ai ia lao totona, ia kamonai gaudia ia badinaia be gau badana. Anina be, bema Baibel lalonai oi dibaia gaudia be emu mauri lalonai oi badinaia, oi be guri ia geia dobu aonega tauna bamona. Unai dainai, Baibel ia tahua taudia ta ta be sibona dekenai idia nanadaia: ‘Lau be Baibel ena hereva lau kamonai tauna, eiava Baibel ena hereva lau kamonai bona badinaia tauna, a? Lau be Baibel lau duahia bona stadilaia kava, eiava gau haida lau abia hidi gwauraia neganai Baibel ena taravatu lau badinaia, a?’

Guri Oi Geia Dobu Ena Namo

José ena ekspiriens mani oi laloa. Ena tama sina be ia dekenai Baibel taravatudia idia hadibaia, to ia sibona be Baibel ena hereva ia tahua namonamo lasi. José ia gwau: “Ruma lau rakatania neganai, Baibel amo lau dibaia gaudia lau ura badinaia toho, to ia auka badina turana dikadia momo lau bamoa. Drag lau ania matamaia, matabodaga karadia lau karaia, bona nega momo ma haida lau heatu henidia.”

Gabeai, José ia ura bada ena mauri ia haidaua dainai, Baibel ena hereva ia tahua namonamo. Ia gwau: “Iesu ena Ororo Harorona lau duahia bona lau lalopararalaia neganai, unai ese lau ia doria egu mauri lau haidaua totona. Unai dainai, metairametaira egu kara o mauri dalana lau haidaua. Matamanai, lau gari badina lau ura lasi egu turana ese lau idia kirikirilaia, to gabeai, unai gari karana lau negea. Koikoi bona hereva mirodia gwauraia karana lau hadokoa, bona Iehova ena Witnes taudia edia hebou dekenai lau lao matamaia. Lau dibaia gauna be inai: Iesu ia gwauhamata, bema ta be kohu o moni o gau momo ia tahua lasi, to Baibel ena sisiba ia badinaia, ia be nega ibounai do ia moale.”​​—⁠Mataio 5:​3-​12.

Dahaka do ia vara bema guri oi geia dobu bena nadi latanai ruma oi haginia​​—⁠eiava ita gwau diba, dahaka do ia vara bema Baibel lalonai oi duahia gaudia oi badinaia? Iesu ia gwau: “Abata ia ginidae neganai, ranu ese ruma ia doria, to ia marere lasi, badina be nadi ena latanai ia haginia.” (Luka 6:​48) Unai hegeregerena, bema ita dibaia gaudia ita badinaia namonamo, vadaeni hekwakwanai idia vara neganai, do ita gini goada. Unai be lalona hagoadaia herevana, ani?

Baibel ena hereva idia badinaia taudia edia hahenamo ma ta be Iesu ena tadina bona hahediba tauna, Iamesi ese ia gwauraia. Ia gwau: “Dirava ena hereva do umui kamonai kava lasi, to umui badinaia danu. . . . Tau ta bema inai taravatu ia itaia namonamo noho, bona ia badinaia noho, bona ia kamonai kava lasi, to ia karaia momokani neganai, unai tau be namo. Dirava ese unai tau, iena kara ibounai lalonai, do ia hanamoa.”​​—⁠Iamesi 1:​22-​25.

Momokani, Baibel ena sisiba idia badinaia taudia be idia moale. Unai moale karana ese Keriso murinai idia raka taudia ia hagoadaia, hekwakwanai o hahetoho lalonai idia gini goada bona Dirava idia badinaia goadagoada totona.

Dahaka Do Oi Karaia?

Iesu be ena Ororo Harorona ia gwauraia neganai, ia hahedinaraia Iehova Dirava ita hesiai henia totona, abia hidi haida ita karaia be namo. Hegeregere, Iesu ia gwau ta ena matana do ia namo eiava ena matana do ia dika, ta be Dirava do ia hesiai henia eiava kohu momo do ia hesiai henia, ta be dala maragina ai do ia raka eiava dala badana ai do ia raka. (Mataio 6:​22-​24; 7:​13, 14) Dokonai, Iesu ese ruma haginia taudia rua ena parabole amo ena murinai idia raka taudia ia hadibaia, abia hidi ma ta idia karaia be namo: Idia be aonega tauna eiava kavakava tauna.

Mai emu lalona ibounai ida Baibel amo oi dibaia gaudia oi badinaia noho neganai, oi be aonega tauna. Oibe, aonega tauna bamona emu ruma be nadi latanai oi haginia neganai, hari bona vaira neganai hahenamo momo do oi abia.​​—⁠Aonega Herevadia 10:⁠25.

[Pictures on page 22]

Ita gini goada totona, Baibel amo ita dibaia gaudia ita badinaia