“Gaukara Ibounai Umui Karaia Namonamo, mai Dala Maorona, Karaia Kava Lasi”
1 Distrik hebouhebou ia heau namonamo totona, momo idia gaukara hebou be namo. Hebouhebou naria taudia ese hebouhebou gabuna namona bona noho gabudia totona dala idia karaia. Taunimanima ta ta bona ruma bese ese edia lao ena dala bona noho gabudia totona dalana idia karaia. Bona kongregesen idauidau idia gaukara hebou dipatmen idauidau idia durua totona, unai amo hebou ia heau namonamo diba. Edia ura be ‘gaukara ibounai idia karaia namonamo, mai dala maorona, bona karaia kava lasi.’—1 Kor. 14:40.
2 Hebouhebou naria taudia ida oi gaukara hebou neganai, laloaboio lasi, hua momo lalonai gau idauidau do umui hegaegaelaia. Tadikaka momo ese nega bada idia haorea gau idauidau idia hegaegaelaia totona. Hegeregere, ruma haida rentaia, kohu idia haboua, bona gaukara taudia abia. Hegaegae guna karana ese lauma dalanai ibounai dekenai namo do ia mailaia. Dahaka ita karaia be namo ita durudia totona?
3 Noho Gabudia Oi Abia Neganai Emu Maduna Oi Huaia: Lagani ta ta ai, tadikaka bona taihu momo herea be hebouhebou totona gabu daudau amo idia mai. Namona be Mahuta Gabudia Naria Dipatmen amo noho gabudia idia ura abia taudia ese unai dipatmen idia hadibaia guna unai amo noho gabudia idia hegaegaelaia diba. Mahuta Gabudia Naria Dipatmen ese noho gabudia noia ena fom be daudau kongregesen eiava grup ta ta dekenai do idia siaia. Unai kongregesen ena seketere eiava unai grup ia naria tadikakadia ese pablisa edia dabu gaudia do idia sekea namonamo, idia hamomokania pablisa bona Baibel stadi taudia korikoridia sibona edia ladana be lista dekenai idia noho be namo. Sikuli mahuta rumana, eiava mahuta gabudia ma haida idia abia neganai, nega momo davana idia hamaragia pablisa taudia idia durua totona. Unai noho gabudia be murimuri varavara, idia ura unai dava maragi gabuna idia noholaia taudia, totona idia abia lasi. Pablisa taudia ese kongregesen ena seketere dekenai edia ladana idia henia neganai, namona be idia laloatao idia be mai edia maduna idia noho gabuna ena davana hegeregerena do idia henia totona.
4 Namona be do ita noho gabuna idia naria taudia ida ita gaukara namonamo nadunadu gaudia, digu gabuna, bona mei rumana totona idia atoa taravatu ita badinaia. Momokani, ita ura lasi Iehova ena taunimanima idia gwauraia dika. Namona be ita noho gabudia amo kohu ta ita abia lasi, badina unai be henaohenao karana; eiava noho gabuna ita noia neganai, namona be daiutu ta dekenai taunimanima hida do idia noho ena namba korikorina ita gwauraia, ita koikoi lasi. Ita be Keristani taudia dainai, nega ibounai ita kara momokani be namo. Unai hegeregerena, eda tadikaka ese ita dekenai heabidae karana idia karaia neganai, unai kara ita laloa bada be namo. Edia heabidae karana ita laloa bada dainai moni sisina ita henia aniani bona ma gau haida edia davana karaia totona be namo.
5 Idia Vara Anina Namona Oi Laloa: Tano ta dekenai hebouhebou ia ore murinai, unai gabu ia naria tauna ia gwau: “Lau itaia Iehova ena Witnes taudia edia kara ibounai lalonai idia kara mai momokani ida. Vanegai pura lalonai, idia ibounai 40 be egu kamepa gabuna dekenai idia noho, bona idia be hekwakwanai ta idia havaraia lasi. Idia sibodia be idau, lau dekenai idia mai bona idia hadibaia bema ma ta be edia mahuta gabuna eiava palai rumana dekenai ia mahuta. Lau diba, idia be egu kamepa gabuna idia gaukaralaia taudia namodia.” Edia ruma eiava gabu ita rentaia taudia ibounai be ita dekenai unai bamona idia hereva be namo herea! Iseda tomadiho ena toana namona idia itaia!
6 Dala Badadia Haida ai Ita Gaukara Hebou Diba: Mahuta Gabudia Naria Dipatmen ida ita gaukara hebou totona, gau haida ita karaia diba. (1) Emu kongregesen ena seketere oi hadibaia bena ia ese Mahuta Gabudia Naria Dipatmen ia hadibaia diba daiutu hida oi abia be namo. Daiutu momo oi noia kava lasi. (2) Noho gabuna totona emu noinoi oi henia murinai, palani ma haida oi karaia be namo lasi. Bema iseda lalona ita haidaua bona unai noho gabuna ita abia lasi, tadikaka ma haida ese moni idia negea kava diba. Unai dainai bema ita gwau “oibe” unai ita hamomokania be namo. (Mat. 5:37) (3) Ita noholaia gabuna ita rakatania neganai, ia goeva bona gaudia ita atoa namonamo.
7 Ita be Iehova Dirava ena hesiai taudia dainai, ita be mai eda dala ita karaia gaudia ibounai dekenai iena kara ita hahedinaraia totona. Unai ena anina be hebouhebou lao henia totona dala ita karaia eiava hebouhebou dekenai ita lao neganai, Dirava ena ladana ita laloa danu. Namona be ita laloatao “Dirava be ia ura lasi hereva kava bona heai, ia be maino Diravana.” (1 Kor. 14:33) Unai dainai, “Dirava ena Hereva Hadibaia Taudia” Distrik Hebouhebouna dekenai ita lao totona palani ita karaia neganai, namona be iseda lalona ita hadaia ita idia itaia taudia ibounai ese—iseda kara amo Iehova ena kara idia itaia. Namona be ita idia itaia kudou-maoro taudia idia diba Iehova ena bese taudia edia hebou be idia ‘karaia namonamo, bona idia karaia kava lasi.’—Sal. 68:26.