Tiokratik Haroro Sikuli Ena Riviu
Inai henanadai be Tiokratik Haroro Sikuli dekenai do ita herevalaia, December 29, 2003 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be November 3 ia lao December 29 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.—Haroro Sikuli bukana, rau 36-7 itaia.]
HEREVA NAMONAMO KARANA
1. Haroro gaukara lalonai, dahaka dainai Baibel ita gaukaralaia be mai anina bada? [1, be rau 145 par. 2, maua] Baibel ena siahu be bada mamoe bamona taudia ia hakaua totona, to iseda hereva be unai bamona lasi. Tau ta be ia sibona ena matana amo Baibel ai ia itaia gauna ese ena lalona do ia veria goada.
2. Edena dala ai siri ta oi gwauraia matamaia namonamo karana ese badina siridia edia hereva ia durua diba? [3, be rau 149] Badina siridia ese idia hahedinaraia daika ese unai siri ena hereva ia gwauraia. Hegeregere, Davida be Salamo iboudiai ia torea lasi, bona Solomona ese Aonega Herevadia bukana ibounai ia torea lasi. Badina siridia be mai anina bada emu hereva dekenai, siri ese daika ia herevalaia, dahaka ia herevalaia, bona unai Baibel sivarai idia torea neganai, noho dalana be edena bamona ia hahedinaraia danu.
3. Baibel ena siri ta ita duahia neganai, dahaka dainai hereva maorodia ita hahedinaraia be gau badana, bona edena dala ai unai ita karaia diba? [5, be rau 151 par. 2, maua] Hereva maorodia edia anina ita hahedinaraia neganai, ita herevalaia gauna be helai taudia dekenai do ia hedinarai goevagoeva bona idia lalo-pararalaia be auka lasi. Siri oi laloa namonamo neganai, oi sibona oi nanadaia: ‘Dahaka hereva idauidau do lau hahedinaraia unai amo inai siri ena badina do lau hahedinaraia?’
4. Ma haida ita hadibaia neganai, Paulo ena sisiba ‘hereva momokani oi hadibaia maoromaoro’ be edena dala ai ita badinaia diba, bona dahaka dainai unai be mai anina bada? (2 Tim. 2:15) [7, be rau 153 par. 2, maua] ‘Hereva momokani ita hadibaia maoromaoro’ totona, Baibel ena hadibaia hereva hegeregerena siri ena anina ita gwauraia be namo. Unai ita karaia totona badina siridia ita laloa bona sibona iseda lalohadai eiava tanobada ena aonega herevadia amo siri ena anina ita gwauraia lasi. Unai be mai anina bada badina Dirava ena ura be taunimanima ese “hereva momokani do idia diba.” (1 Tim. 2:3, 4)
5. Paulo be edena dala ai ‘Buka Helaga ia herevalaia’? (Kara 17:2, 3) [9, be rau 155 par. 5–rau 156 par. 1] Paulo ese Iesu ena mauri bona hesiai gaukara lalonai idia vara gaudia ia herevalaia, ia hahedinaraia Heberu Revareva ese unai gaudia idia perovetalaia bena hereva dokona goadana ia henia. Heberu revarevadia edia hereva ia tore hanaia, hereva ta eiava haida sibona ia hahedinaraia, bena anina ia gwauraia.
HEREVA NAMBA 1
6. Hereva ta hegaegaelaia totona iseda tulu badana Baibel ita gaukaralaia neganai, dahaka dainai (1) badina siridia ita itaia, (2) idia torea siri ma haida ita itaia, bona (3) Baibel konkodens ita gaukaralaia be mai ena namo? [1, be rau 34 par. 3–rau 35 par. 2] (1) Badina siridia ita tahua ese ita idia durua diba Baibel siri ena anina ita lalo-pararalaia totona bona iseda hereva lalonai ita gaukaralaia neganai, iseda hereva do idia hanamoa bada. (2) Idia torea siri ma haida ese ita dekenai diba idia henia bona Baibel ena peroveta herevana ta ia guguru dalana eiava Taravatu gwauhamata ese ia laulaulaia gauna ta idia hahedinaraia; idia torea siri ma haida be reana unai bamona lalohadai ma ta eiava tau ta eiava gabu ta idia gwauraia herevadia idia hahedinaraia sibona. (3) Baibel konkodens ita gaukaralaia ese ita ia durua diba ita tahua gauna idia herevalaia siridia ita davaria totona bona Dirava ena Hereva lalonai ia hedinarai “hereva momokani” ena toana ita itaia totona. (2 Tim. 1:13)
7. Badinaia karana momokanina be edena dala ai ita hahedinaraia bona daidia dekenai? [3, w01 10/1 rau 22-3] Badinaia karana be inai hereva, hebogahisi mai lalokauna, ida ia hegeregere dainai, ia ese ma ta dekenai kara namo haloua urana ia hahedinaraia danu. Bema ta be ita dekenai hebogahisi mai lalokauna ia hahedinaraia, bena unai bamona badinaia karana be ia dekenai ita hahedinaraia lou be namo. Davida be Iehova ena hebogahisi mai lalokauna ia mamia bona unai ese ia veria, Dirava ia tomadiho henia bona hanamoa totona. (Sal. 138:2) Iehova ita badinaia ena anina be ena Hereva bona iena orea do ita badinaia. Iseda adavana, abidadama ruma bese, bona turadia dekenai badinaia karana ita hahedinaraia danu be namo.
8. Dahaka ese ia hahedinaraia Iehova be nega ia naria tauna maorona? (Dan. 11:35-40, NW; Luka 21:24) [4, si Stadi Namba 3 par. 1] “Not kahana ena king” bona “saut kahana ena king” matahanaina ia henia neganai, Iehova ena aneru ese nega haida inai hereva, “Ia abia hidi negana” ia gaukaralaia. Ma Baibel siri momo ese idia hahedinaraia Iehova be nega ia naria tauna maorona, bona ena ura be nega korikorina ai ia hagugurua.
9. Hereva ta totona gau haida ita tahua bena edena hereva haida do ita ura gaukaralaia ita lalohadailaia neganai, dahaka gaudia ita laloatao be namo? [5, be rau 38] Iseda hereva do ia hanamoa momokani gaudia sibona do ita gaukaralaia. Namona be oi hamomokania hari danu unai gaudia be idia momokani bona Iehova ena Witnes taudia ese idia halasia buka matamata edia hereva ida ia hegeregere. Tanobada oreadia ese idia halasia gaudia amo hereva haida ita abia neganai, namona be ita naria namonamo, ita laloaboio lasi Dirava ena Hereva be momokani bona Dirava ena ura hagugurua karana lalonai Iesu ena gaukara be bada. (Ioa. 17:17; Kol. 2:3) Iseda ura be Dirava ena lalohadai ita hahedinaraia. (Aon. 2:1-5)
10. Dahaka dainai Iesu ena hereva “Noa ena nega” be hari iseda nega hegeregerena? (Mat. 24:37) [7, w01 11/15 rau 31 par. 3-4] Hari inai negai, Keristani taudia be kara maoromaoro idia harorolaia taudia, taunimanima idia hagoadaia idia helalo-kerehai totona. (2 Pet. 3:5-9) Ena be Noa be dagedage bona nega aukadia ia abia, to Iehova ia badinaia. Ia bona ena ruma bese idia diba momokani lasi edena negai Dirava ese Abata do ia mailaia, to Dirava ena hereva idia abidadama henia karana ese idia ia durua lagani momo lalonai tiokratik gaukaradia idia karaia totona. (Heb. 11:7)
WIKI TA TA ENA BAIBEL DUAHIDUAHI
11. Edena dala ai Paulo ena revareva Filemona dekenai ese ia hahedinaraia Keristani taudia edia hahegani be taunimanima idia hadibaia Keristani taudia ai idia lao totona, edia noho dalana idia haidaua totona lasi? (File. 12) Paulo ese ia heau boio hesiai tauna Onesimo, ia gwauraia “lauegu natuna” bona “lalokau tauna.” (File. 10, 16) Ena be Onesimo be Paulo ena haroro ia kamonai bona Keristani tauna ai ia lao, Paulo ia gwau lasi hari ia be ura kwalimu tauna, to Roma ena taravatu henunai ena noho gabu maorona dekenai ia siaia giroa, unai negai Roma ena noho dalana lalonai igui hesiai taudia idia abia be hegeregere. [1, w98 1/15 rau 30-1; w62-E rau 653-6]
12. “Hure oho,” “raka siri” bona ‘abidadama rakatania’ edia idau be dahaka? (Heb. 2:1; 3:12; 6:6; NW ) [2, w99 7/15 rau 19 par. 12; w86-E 6/1 rau 14 par. 16-17; w80-E 12/1 rau 23 par. 8] Hereva momokani amo ita “hure oho” karana be auka lasi bona unai ia vara diba kohu haida sibona haboua karana amo, tanobada taudia hebamo henia karana amo, eiava Baibel ena hereva dekenai sibona edia lalohadai idia gwauraia toho karana amo ia matamaia diba. “Raka siri” karana be dika bona ena anina be gini siri eiava hereva momokani negea karana. ‘Abidadama rakatania’ karana ena anina be, mai edia ura ida hereva momokani idia dadaraia dainai idia giroa diba lasi, Iehova bona Iesu sibona idia diba.
13. Inai hereva “bema Dirava ia ura” be anina lasi gauna ai ita halaoa lasi totona, edena dala ai ita gaukaralaia lasi be namo? (Iam. 4:15) [4, cj-E rau 171 par. 1-2] Namo lasi unai hereva be hanaihanai ita gaukaralaia taunimanima vairanai ita heagi eiava ita karaia abia hidi ena maoro ita hahedinaraia totona. To, gau ta ita ura karaia neganai, hegeregere Baibel ena hahegani iseda ruma bese taudia ita naria totona, namona be mai momokani ida Dirava ena ura ita laloa bona iseda lalona ita hadaia ita badinaia totona.
14. ‘Iehova ena dina ita naria bona laloa noho’ ena anina be dahaka, bona unai be edena bamona ita karaia diba? (2 Pet. 3:12, NW ) [5, w97 9/1 rau 19-20] Ena anina be ita gima noho bona “Siahu Ibounai Diravana ena Dina Badana,” Aramagedono unai, ita naria noho. (Apok. 16:14) Unai ita karaia diba bema peroveta taudia ese “guna idia gwauraia hereva,” Iesu be Basileia siahuna ida ia noho negana bona Dirava idia badinaia lasi taudia hahemaoro herevadia unai, ita laloatao. Danu ita gima noho totona, namona be “Lohiabada bona Hamauria Tauna ena taravatu” ita laloaboio lasi. (2 Pet. 3:2; Luka 21:34-36)
15. Apokalupo karoa 2 bona 3 ese ia gwauraia kongregesen 7 ese idia abia hadibaia herevadia amo, dahaka mai anina bada sisiba ia noho hari idia noho Keristani taudia totona? (Apok. 2:4, 5, 10, 14, 20; 3:3, 10, 11, 17, 19) Keristani kwalimu taudia ai ita lao totona, lauma dalanai ita goada karana eiava hereva momokani lalokau henia karana ita haboioa lasi be namo. Namona be ita diba hahetoho momo do ita davaria bona iseda lalona ita hadaia iseda mauri dinadia ibounai lalonai abidadama ita hahedinaraia. Matabodaga karadia bona hereva momokani negea karana ita dadaraia be namo, lauma dalanai ita noga bona ita haheauka noho, bona lalo-hesiku bona kohu momo tahua karana ita dadaraia. [7, re rau 34 par. 5-6; rau 38 par. 5; rau 44 par. 10-11; rau 49 par. 7; rau 56 par. 7; rau 64 par. 20; rau 68 par. 8]