Haroro Bona Mauri Dalana Hebou Pepana Edia Referens
© 2024 Watch Tower Bible and Tract Society of Pennsylvania
NOVEMBER 4-10
BAIBEL ENA HEREVA BADADIA SALAMO 105
“Ia ese Ia Karaia Gwaubou Ia Laloatao Hanaihanai”
Tanobada Matamatana Dekenai Iseda Abidadama Ita Hagoadaia Dalana?
11 Idaunegai, Iehova ese ena taunimanima idia laloa do idia vara diba lasi gaudia ia gwauhamatalaia karana mani ita laloa. Aberahamo bona Sara ia hamaorodia edia buruka negana ai natuna ta do idia havaraia. (Gen. 17:15-17) Danu, Aberahamo ia hamaoroa ena bese taudia dekenai Kanana tano do ia henia. Lagani momo lalonai, Aberahamo ena bese taudia, Israela taudia unai, be Aigupito ai igui hesiai taudia bamona idia noho neganai, reana idia laloa unai gwauhamata be do ia vara lasi. To ia guguru. Gabeai, Iehova ia gwau Elisabeta be natuna ta do ia havaraia ena be ia buruka vadaeni. Danu, Iehova ese rami-hebou kekenina Maria ia hamaoroa, ia be Iena Natuna do ia havaraia. Unai Natuna do ia vara ena gwauhamata herevana be lagani tausen momo gunanai Eden umana ai ia gwauraia. Unai gwauhamata be ia guguru! Gen. 3:15.
12 Iehova ese ia gwauraia gwauhamata ibounai bona ia hagugurudia dalana ita laloa neganai, iena siahu ita lalopararalaia bona unai ese iseda abidadama tanobada matamatana dekenai ia hagoadaia. (Iosua 23:14; Isaia 55:10, 11 duahia) Unai amo ita hegeregere ma haida ita durua bena do idia abia dae tanobada matamatana ena gwauhamata be nihi ta sibona lasi. Guba bona tanobada matamatana totona Iehova ia gwau: “Inai hereva . . . be taunimanima ese idia abia dae diba bona idia be momokani.”—Apok. 21:1, 5.
it-2-E 1201
Hereva
Dirava ese ia havaraia gaudia, idia mauri bona mauri lasi gaudia be Dirava ena hereva idia badinaia, bona ia gaukaralaidia ena ura ia hagugurua totona. (Sal 103:20; 148:8) Iena hereva ita abidadama henia diba; danu Dirava ese ia gwauhamatalaia gaudia ia laloatao bona karaia. (Deu 9:5; Sal 105:42-45) Ia sibona ia gwau bamona, iena hereva “be ia noho hanaihanai”; do ia giroa lou lasi, to ena ura do ia hagugurua.—Isa 40:8; 55:10, 11; 1Pe 1:25.
Hakaua Hereva Namodia
Emu Hesiai Gaukara Do Oi Habadaia, A?
15 Iehova ese oi do ia hamaoromaoroa. Bema haida ese oi idia kara auka henia, dahaka do oi karaia? Reana unai hekwakwanai do oi hamaoromaoroa haraga. To nega haida, bema sibona emu maoro oi gwauraia hedinarai, unai ese hekwakwanai ia habadaia diba. Iosepa ena tadikaka ese ia idia kara auka henia, to idia ia badu henia lasi. Gabeai, Iosepa idia samania koikoi bona dibura ruma ai idia atoa. To, unai nega aukadia lalonai ia be Iehova dekenai ia tabekau. Dahaka ia vara? “Lohiabada ena hereva ese, ia hahedinaraia Iosepa ena hereva be maoro.” (Sal. 105:19) Unai hahetoho idia ore neganai, Iosepa be gaukara badana ta ia abia. (Gen. 41:37-44; 45:4-8) Ginigini bamona hekwakwanai idauidau oi davaria neganai, aonega totona oi guriguri, mai manau ida oi kara bona hereva, bona Dirava oi noia oi dekenai goada do ia henia. Bena Iehova ese oi do ia durua.—1 Petero 5:10 duahia.
NOVEMBER 11-17
BAIBEL ENA HEREVA BADADIA SALAMO 106
“Idia be Edia Hamauria Diravana Idia Laloaboio”
“Daika be Iehova Ena Kahanai?”
13 Israela taudia be ori koremana, kevaru bona Dirava ena hoa karadia ma haida idia itaia neganai idia gari dikadika. Idia noinoi dainai Mose ese edia hereva ia abia dae bona Sinai Ororo dekenai ia daekau bona idia totona Iehova ia hereva henia. (Eso. 20:18-21) Mose be ororo ataiai ia noho bona ia diho mai haraga lasi. Israela taudia idia laloa idia be dala lasi heduru idia abia totona, badina taunimanima idia noho lasi gabuna ai, edia gunalaia tauna be idia danu ia noho lasi. Israela taudia be Mose sibona dekenai idia tabekau. Idia lalohekwarahi dainai, Arona idia hamaoroa, idia gwau: “Mose, Aigupito dekena amo ai ia hakaua tauna dekenai, be dahaka ia vara ai diba lasi. Unai dainai kaivakuku do oi karaia, ia ese ai do ia hakaua totona.”—Eso 32:1, 2.
Hakaua Hereva Namodia
Salamo Bukana Ena Kahana Ihatoina Bona Ihahanina Edia Hereva Badadia
106:36, 37. Inai siri ia hahedinaraia kaivakuku tomadiho henia bona lauma dikadia dekenai boubou karaia karana be kara tamona. Unai ese ia hahedinaraia kaivakuku ia tomadiho henia tauna be lauma dikadia ese idia biagua diba. Unai dainai Baibel ese ita ia hagania: “Do umui naria namonamo, dirava koikoidia [“kaivakuku,” NW] garina.”—1 Ioane 5:21.
NOVEMBER 18-24
BAIBEL ENA HEREVA BADADIA SALAMO 107-108
“Iehova Tanikiu Henia, Badina Ia be Namo”
Kongrigeisen Lalonai Iehova Hanamoa
2 Kongrigeisen be iseda turadia ida ita moale hebou klab ta lasi. Bona ia be komiuniti taudia idia hebou, hanua tamona taudia, spot eiava edia ura gaudia be hegeregere taudia edia klab ta lasi. To, kongrigeisen ia noho ena badina be Iehova Dirava hanamoa totona. Salamo bukana ese ia hahedinaraia, idaunega amo unai idia karaia. Salamo 35:18 ia gwau: “Hebou [“kongrigeisen,” NW] badana lalonai, oi do lau tanikiu henia. Taunimanima momo edia vairana dekenai oi do lau hanamoa.” Unai hegeregerena, Salamo 107:31, 32 ese ita ia hagoadaia: “Lohiabada dekenai edia tanikiu idia henia be namo, ia ese iena lalokau bona bogahisihisi bona hoa karadia, taunimanima dekenai ia hedinaraia dainai. Namona be edia guriguri hebou dekenai ia do idia hanamoa.”
Iehova Tanikiu Henia Bona Oi Do Ia Hanamoa
4 Iehova tanikiu henia karana ita hahedinaraia noho totona, namona be ia amo ita abia hahenamo ita laloa dobu bona moalelaia. Bona iena lalokau karadia do ita laloa. Salamo torea tauna danu be Iehova ese ia karaia gaudia namodia ia hoalaia.—Salamo 40:5; 107:43 duahia.
Hakaua Hereva Namodia
w23 10 17 par. 20
“Umui Do Ia Hagoadaia”—Edena Dala Ai?
20 Ena be iseda goada ia ore, “Dirava dainai goada do ita abia.” (Sal. 108:13) Iehova amo goada oi abia totona, ia ese gau namodia haida ia hegaegaelaia vadaeni. Unai dainai, bema oi ura asainmen ta oi hagugurua, hekwakwanai ta oi haheaukalaia, eiava oi moale noho totona, namona be Iehova oi guriguri henia goadagoada bona sibona emu stadi karana amo iena heduru oi tahua. Keristani tadikaka bona taihu edia heduru oi abia dae. Bona nega matamata ena helaro oi laloa noho. Bena “Dirava ena siahu hereadaena dainai goada do [oi] abia, unai amo mai boga-auka bona moale ida gau ibounai [oi] haheaukalaia diba.”—Kol. 1:11.
NOVEMBER 25–DECEMBER 1
BAIBEL ENA HEREVA BADADIA SALAMO 109-112
King Iesu, Badinaia!
Salamo Bukana Ena Kahana Ihaimana Ena Hereva Badadia
110:1, 2—Iesu Keriso, Davida ena “Lohiabada” be Dirava ena idibana kahana ia helai neganai, dahaka ia karaia? Iesu ia mase bona guba dekenai ia daekau neganai, Dirava ena idibana kahana dekenai ia helai bona ia naria ela bona lagani 1914 ai King ai ia lao. Unai neganai, Iesu ese iena horoa tadikaka oreana ia lohiaia. Idia karaia haroro bona hadibaia taudia halaoa gaukarana ia gunalaia bona idia ia hegaegaelaia ia ida ena Basileia dekenai do idia lohia hebou totona.—Mataio 24:14; 28:18-20; Luka 22:28-30.
Dirava Idia Heai Henia Taudia Do Idia Kwalimu Lasi!
3 Lagani 1900 C.E. murina amo ema bona hari, Iehova ena taunimanima idia dagedage henidia. Tano momo lalonai, dika idia ura idia karaia taudia be Dirava ena Basileia sivarai namona idia koua toho—oibe idia haorea toho momokani. Iseda inai Tauna badana, Diabolo, ese idia ia doria unai kara idia karaia totona, ia “be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1Petero 5:8) Lagani 1914 ai “idau bese edia nega” ia ore murinai, Dirava ese iena natuna be tanobada ena King matamatana ai ia halaoa bona ia hamaoroa: “Oi dekenai idia tuari henia taudia do oi biagua.” (Luka 21:24; Salamo 110:2) Keriso ese ena siahu ia gaukaralaia, Satani be guba dekena amo ia negea diho bona tanobada kahana ai ia koua. Diabolo ia diba iena nega be kwadogi, unai dainai iena badu ia bubua diho horoa Keristani taudia bona edia turadia dekenai. (Apokalupo 12:9, 17) Dirava idia heai henia taudia be idia dagedage hanaihanai dainai, dahaka ia vara?
Emu Goada Oi Habadaia
Oi abia harihari gauna oi gaukaralaia ena anina be oi hekwarahi gau haida oi karaia totona. Dala oi kehoa, ma haida ida haroro gaukara oi karaia totona, a? Dala oi tahua, emu kongrigeisen dekenai idia noho memero kekeni, kamonai matamata, bona gorere taudia oi durua totona, a? Sibona oi henia, Kingdom Hall hagoevaia eiava hebouhebou gaukara ma haida oi durua totona, a? Nega haida heduru painia gaukara oi karaia diba, a? Regula painia gaukara oi karaia diba eiava kongrigeisen ma ta dekenai heduru oi henia diba, a? Bema oi be tadikaka, hesiai tauna eiava elda tauna ai ia lao diba tauna ena kara Baibel ese ia gwauraia hegeregerena oi badinaia totona oi gaukara goada, a? Oi ura heduru oi henia bona maduna oi huaia karana ese ia hahedinaraia emu goada ia bada ia lao.—Sal. 110:3.
Hakaua Hereva Namodia
it-1 524 par. 2
Gwaubou
Melekisedeka Bamona Hahelaga Tauna ai Do Ia Lao ena Gwaubou. Unai gwaubou be Salamo 110:4 ese ia herevalaia, bona Heberu bukana ia torea tauna ese Heberu 7:1-3, 15-17 ai ia hahedinaraia unai be Keriso ia herevalaia. Unai gwaubou be Iehova ese Iesu sibona ida ia karaia gauna. Iesu ese ena hahediba taudia ida basileia totona gwaubou ta ia karaia neganai, unai gwaubou ia herevalaia. (Lu 22:29) Iehova be gwauhamata ia karaia ena Natuna Iesu Keriso, be Melekisedeka bamona hahelaga tauna ai do ia lao. Tanobada ai Melekisedeka be Dirava ena hahelaga tauna bona king. Iesu Keriso be tanobada ai lasi, to guba ai King bona Hahelaga Tauna ena gaukara do ia karaia. Guba ai ia daekau murinai unai dagi ia abia. (Heb 6:20; 7:26, 28; 8:1) Unai gwaubou be ia noho hanaihanai, badina Iehova ena oda herevana hegeregerena Iesu be King bona Hahelaga gaukarana do ia karaia ela bona hanaihanai.—Heb 7:3.
DECEMBER 2-8
BAIBEL ENA HEREVA BADADIA SALAMO 113-118
Iehova Ena Namo Dainai Dahaka Do Lau Henia Lou?
Lalokau ese Umui Do Ia Hagoadaia
13 Iesu ena hereva amo ia hahedinaraia goevagoeva, gauna ginigunana be Iehova ita lalokau henia be namo. To, ita vara neganai, Iehova lalokau henia karana ia do bada lasi. Unai kara be do ita habadaia be gau badana. Iehova ita dibaia matamaia neganai, ita kamonai gaudia dainai ia ita ura henia. Metairametaira ita be tanobada ia hegaegaelaia taunimanima totona sivaraina ita dibaia. (Genese 2:5-23) Iena taunimanima kara henia dalana ita dibaia. Kara dika be taunimanima besena lalonai ia vareai negana ginigunana ai, ita ia negea lasi to hoia lou dalana ia karaia matamaia. (Genese 3:1-5, 15) Ia ese abidadama taudia ia kara henia mai hebogahisi ida, bona gabeai ia sibona ia havaraia Natuna tamona ia henia iseda kara dika do ia gwauatao totona. (Ioane 3:16, 36) Iseda diba ia bada ia lao lalonai Iehova laloa bada karana ia bada ia lao danu. (Isaia 25:1) King Davida ia gwau Iehova ia lalokau henia Iena naria karana mai lalokauna dainai. (Salamo 116:1-9) Hari, Iehova ese ita ia naria, ita ia hakaua, bona ita ia hagoadaia. Ia ita dibaia noho lalonai, iseda lalokau ia dobu ia lao.—Salamo 31:23; Sepanaia 3:17; Roma 8:28.
Mai Moale ida Abia—Mai Kudouna ida Henia
Salamo torea tauna ia henanadai: “Lohiabada dekenai dahaka do lau henia, iena hariharibada ibounai lau dekenai ena davana?” (Sal. 116:12) Salamo torea tauna be dahaka hariharibada ia abia? “Gari bona laloa hekwarahi” negana ta ai, Iehova ese ia durua. Ma danu, Iehova ese “mase dekena amo [ia] hamauria.” Unai dainai, salamo torea tauna ia ura Iehova dekenai “davana” ia henia lou. Dahaka ia karaia diba? Ia gwau: “Egu gwauhamata ena anina do lau karaia, Lohiabada dekenai do lau henia.” (Sal. 116:3, 4, 8, 10-14) Oibe, ia ura Iehova dekenai ia karaia gwauhamata ibounai do ia badinaia noho bona Iehova ese ia henia gaukara ibounai do ia hagugurua.
Salamo torea tauna oi tohotohoa diba. Edena dala ai? Hanaihanai Dirava ena taravatu bona hakaua herevadia oi badinaia. Gau badana be, nega ibounai oiemu mauri lalonai Iehova tomadiho henia karana oi atoa guna, bona lauma helaga ese emu mauri dalana ia hakaua be namo. (Had. 12:13; Gal. 5:16-18) Momokani, Iehova ese ita totona ia karaia gaudia edia davana ibounai ita henia diba lasi. To, Iehova ita “hamoalea” bema Ia itaia ita be mai iseda kudouna ibounai ida iena hesiai gaukara ita karaia. (Aon. 27:11, BHğ) Momokani, unai dala amo Iehova ita hamoalea be hahenamo badana, ani?
Levitiko Bukana amo Ita Dibaia Gaudia
9 Leseni iharuana: Iehova ita laloa bada dainai ia ita hesiai henia. Unai ita dibaia totona, Israela taudia ese tomadiho momokani ai maino karaia totona idia henia boubou gaudia mani ita herevalaia. Levitiko bukana amo ita diba, Israela tauna be “Dirava tanikiu henia totona” maino karaia boubouna do ia henia. (Lev. 7:11-13, 16-18) Ia be taravatu dainai lasi, to mai ena ura ida unai boubou gauna ia henia. Ta be mai ena ura ida unai bamona boubou gauna ia henia diba badina ena Dirava, Iehova ia lalokau henia. Unai boubou gauna ia henia tauna, ena ruma bese, bona hahelaga taudia ese idia bouboulaia animal ena vamu do idia ania hebou. To, idia bouboulaia animal ena kahana haida be Iehova sibona dekenai do idia henia. Edena kahana?
10 Leseni ihatoina: Lalokau dainai Iehova totona iseda nega bona goada ita henia. Iehova ese animal ena digara ia ura henia bada. Danu, ia gwau animal ena kahana ma haida, hegeregere nadinadi (kidney) be mai anina bada. (Levitiko 3:6, 12, 14-16 duahia.) Unai dainai Israela tauna ta be mai ena ura ida animal ena kahana haida bona ena digara be boubou totona ia henia neganai, Iehova ia moale bada. Unai bamona boubou gauna ia henia Israela tauna be mai ura ida Dirava dekenai harihari gauna hereadaena ia henia. Unai hegeregerena, Iesu be mai ena ura ida Iehova ia hesiai henia karana amo ena lalokau Ia dekenai ia hahedinaraia. (Ioa. 14:31) Iesu be mai moale ida Dirava ena ura ia karaia; ia ese Dirava ena taravatu ia ura henidia. (Sal. 40:8) Iehova be ia moale bada badina ia itaia Iesu be mai ena ura ida Ia ia hesiai henia!
11 Maino karaia boubou gaudia hegeregerena, Iehova ita laloa bada dainai mai ura ida Ia ita hesiai henia. Danu, mai iseda kudouna ibounai ida Iehova ita lalokau henia dainai iseda nega bona goada ita henia ia ita hesiai henia totona. Iehova ia moale bada badina ia idia tomadiho henia taudia milioni momo be ia idia lalokau henia bona iena dala idia badinaia dainai, mai ura ida ia idia hesiai henia! Ita moale badina Iehova be ita karaia gaudia ia itaia bona laloa bada sibona lasi, to ita karaia gaudia ena badina ia laloa danu. Hegeregere, bema oi be buruka bona gau momo oi karaia diba lasi, namona be oi abia dae Iehova ese emu goada ena hetoana ia lalopararalaia. Reana do oi mamia oi be gau momo oi karaia lasi, to Iehova ia diba Ia oi lalokau henia dainai oi karaia diba gaudia oi karaia. Ia ese emu goada hegeregerena oi karaia gaudia ia abia dae.
Hakaua Hereva Namodia
Duahia Taudia Edia Henanadai
Salamo torea tauna ta ia gwau: “Iehova ena vairanai ena helaga taudia edia mase be gau hereadaena.” (Sal. 116:15, BHğ) Iehova dekenai iena tomadiho taudia ta ta edia mauri be mai anina bada. To, Salamo 116:15 be tau tamona ena mase ia herevalaia lasi.
Keristani tauna ta ena fineral ai tok ia henia tadikaka ese Salamo 116:15 ia gaukaralaia be maoro lasi. Dahaka dainai? Badina unai siri be tau tamona ena mase ia herevalaia lasi. To, ena anina be Dirava ese iena orea taudia ibounai ia lalokau henidia bada, bona ia ura lasi iena orea taudia do idia mase ore.—Salamo 72:14; 116:8 itaia.
DECEMBER 9-15
BAIBEL ENA HEREVA BADADIA SALAMO 119:1-56
“Edena Dala ai Matamata Tauna Ta Ena Mauri Do ia Goeva Noho?”
w87 11/1-E 18 par. 10
Gau Ibounai Dekenai Umui Goeva Noho, A?
10 Paulo be Efeso 5:5 ai, ia gwau: “Bona inai umui diba momokani, matabodaga tauna eiava kara mirodia ia karaia tauna eiava mataganigani tauna, anina be kaivakuku ia tomadiho henia tauna, be ahuna lasi Keriso bona Dirava edia Basileia lalonai.” To, lagani ta ta ai tausen momo be matabodaga karana, ‘sibodia edia tauanina dekenai idia kara dika’ dainai, sisiba aukana idia abia o orea murimurinai idia atodia. (1 Korinto 6:18) Nega momo, unai ia vara badina ‘Dirava ena hereva idia badinaia noho’ lasi. (Salamo 119:9) Hegeregere, tadikaka taihu momo be holidei negadiai, kara maoromaoro taravatudia idia badinaia lasi. Keristani hebamo karana idia dadaraia bona unuseni idia holidei murimuri taudia idia tura henidia. Keristani taudia haida idia gwau, inai be ‘taunimanima namodia momokani,’ bona idia ida moale karadia idia karaia. Unai hegeregerena, haida be edia gaukara turadia idia tura henidia bona bamodia. Keristani elda tauna ta be ofesi dekenai gaukara hahine ia tura henia bona ena ruma bese ia rakatania bona unai hahine ida ia noho hebou! Murimuri ai idia atoa. Baibel ena hereva be momokani, ia gwau: “Hebamo dikadia ese ta ena kara namodia idia hadikaia diba”!—1 Korinto 15:33.
“Oiemu Hadibaia Hereva ese Lau Idia Hamoalea Noho”
IEHOVA ese iena taunimanima dekenai hadibaia herevadia ia henia dainai, idia be inai nega dikana ena hekwakwanai idia haheaukalaia diba. Unai hadibaia herevadia be iseda Baibel duahiduahi amo, bona Keristani heboudia dekenai tadikaka edia tok bona haere amo ita abia. Unai negadiai, ita duahia eiava kamonai herevadia momo be hereva matamata lasi, idia be guna ita kamonaia vadaeni gaudia. To, nega momo ita laloaboio dainai, Iehova ena ura, taravatu bona hadibaia herevadia ita kamonai loulou be namo. Namona be Dirava ena hadibaia herevadia ita laloa bada. Idia ese ita idia hagoadaia, unai amo Iehova ita hesiai henia ena badina maorodia ita laloa noho totona. Unai hegeregerena, salamo torea tauna ese Iehova dekenai inai ane ia abia: “Oiemu hadibaia hereva ese lau idia hamoalea noho.”—Salamo 119:24.
Anina Lasi Gaudia Raraia Lasi!
2 To, ita raraia gaudia haida ese ita idia hadikaia diba. Iseda matana bona harana be idia gaukara hebou dainai, ita itaia gaudia ese iseda kudouna ai ura idauidau ia havaraia diba. Bona ita be Satani ese ia lohiaia matabodaga tanobada lalonai ita noho dainai, herevana laulau o matana veria gaudia be nega sisina sibona lalonai ita itaia, to ita idia hakaua kerere diba. (1 Ioa. 5:19) Unai dainai, salamo torea tauna ese Dirava ia guriguri henia, ia gwau: “Mani lau do oi durua, lau ese anina lasi gaudia do lau [raraia] lasi, to oiemu dala dekenai lau raka dainai, egu mauri do oi hamatamataia.”—Sal. 119:37.
Hakaua Hereva Namodia
Iehova Ena Hereva Abidadama Henia
2 Salamo 119 ese ia hahedinaraia point badana be Dirava ena hereva eiava ena sivarai ena namo. Reana ia laloatao totona, ane lalonai torea tauna be alfabet ia badinaia. Iena siri ibounai 176 be Heberu gado ena alfabet ena leta ta ta idia badinaia. Heberu gado ai, unai salamo ena kahana ibounai 22 idia torea bona edia siri ibounai be 8 bona unai siri ta ta be alfabet ena leta tamona amo idia matamaia. Inai Salamo ese Dirava ena hereva, taravatu, hadibaia hereva, dala, oda, bona hahemaoro herevadia ia gwauraia. Inai stadi bona pura vaira ena stadi lalonai Salamo 119 do ita stadilaia. Guna bona hari inai negai Iehova ena hesiai taudia dekenai idia vara gaudia ita laloa lou neganai, inai salamo do ita lalopararalaia bona Dirava ena Hereva, Baibel do ita abia dae momokani.
DECEMBER 16-22
BAIBEL ENA HEREVA BADADIA SALAMO 119:57-120
Hekwakwanai Ita Haheaukalaia Dalana
“Oiemu Taravatu Lau Ura Henia”
2 Reana oi sibona oi nanadaia: “Edena dala ai Dirava ena taravatu ese salamo torea tauna ia durua bona ena lalona ia hagoadaia?” Ia lalogoada badina ia diba Iehova ese ia ia laloa bada. Ena be haida ese salamo torea tauna idia dagedage henia, to Dirava ese mai lalokau ida ia henia taravatuna ia badinaia dainai ia moale. Ia diba Iehova ese ia ia kara namo henia. Danu, Dirava ena taravatu be ena mauri lalonai ia badinaia dainai, salamo torea tauna ena aonega ese ena inai taudia edia aonega ia hanaia bona unai ese ia hamauria. Unai taravatu ia badinaia dainai, maino ia davaria bona ena lalomamina be ia goeva.—Salamo 119:1, 9, 65, 93, 98, 165.
Iehova Ena Hadibaia Herevadia Oi Lalokau Henia Bada, A?
3 Salamo torea tauna be Dirava ena hadibaia herevadia ia laloa bada. Inai ane ia abia: “Lau naria kava lasi, to karaharaga oiemu oda hereva lau kamonai henia. Kara dika taudia [“edia varo ese lau idia hagegea,” NW]. To lau ese oiemu taravatu lau laloaboio lasi.” (Salamo 119:60, 61) Iehova ena hadibaia herevadia edia heduru amo dagedage ita haheaukalaia diba, badina ita diba momokani iseda guba Tamana ese ita idia koua varodia, iseda inai taudia idia kwatua gaudia, ia utua diba. Nega korikorina ai, ia ese unai bamona koua gaudia amo ita ia ruhaia, Basileia harorolaia gaukarana ita karaia diba totona.—Mareko 13:10.
Salamo Bukana Ena Kahana Ihaimana Ena Hereva Badadia
119:71—Hisihisi ese edena dala ai namo ia havaraia diba? Hisihisi lalonai ita haheauka neganai, unai ese ita ia hadibaia, Iehova ita guriguri henia, Ia dekenai do ita tabekau, Baibel stadilaia karana ita goadalaia bona ita badinaia totona. Danu, unai hisihisi ita davaria neganai, reana iseda kara ese ia hahedinaraia, iseda lalohadai haida be kerere bona ita hamaoromaoroa be namo. Unai dainai, hisihisi ita haheaukalaia bona lalohadai maorona ita hahedinaraia neganai, iseda kara do ita hanamoa diba.
“Taitai Taudia ida Umui Taitai”
3 Ita abia dae momokani, iseda hebogahisi guba Tamana, Iehova, ese ita dekenai lalogoada do ia henia. (2 Korinto 1:3, 4 duahia.) Hebogahisi karana dekenai Iehova be haheitalai hereadaena, ia ese ena taunimanima ia hamaoroa: “Lau Lohiabada inai, lau ese umui lau hagoadaia noho.”—Isa. 51:12; Sal. 119:50, 52, 76.
5 Ita abia dae momokani Iehova be ita do ia durua. Unai dainai guriguri amo ia dekenai ita mamia hisihisina ita gwauraia hedinarai. Ita moale badina Iehova be iseda hemami ia lalopararalaia bona ita do ia hagoadaia! To edena bamona unai ia karaia?
Hakaua Hereva Namodia
Salamo Bukana Ena Kahana Ihaimana Ena Hereva Badadia
119:96—Inai hereva “tanobada dekenai ia noho gauna ta, be ia namo momokani diba lasi” ena anina be dahaka? Salamo torea tauna ese taunimanima edia lalohadai goevadae karana dekenai ia hahedinaraia. Ia diba taunimanima ese goevadae karana idia lalopararalaia namonamo diba lasi. To, Dirava ena taravatu be goevadae momokani bona iseda mauri ibounai lalonai ita badinaia diba.
DECEMBER 23-29
BAIBEL ENA HEREVA BADADIA SALAMO 119:121-176
Lalohisihisi Ita Dadaraia Dalana
Dirava Ena Taravatu Bona Hakaua Herevadia amo Emu Lalomamina Oi Hadibaia
5 Dirava ena taravatu ese ita idia durua totona, ita duahia eiava diba sibona be hegeregere lasi. To, taravatu ibounai ita ura henia bona matauraia. Baibel ia gwau: “Kara dika umui inai henia, bona kara namo umui ura henia.” (Amo. 5:15 NWT) To edena bamona unai ita karaia diba? Gau badana be Iehova ena laloa dalana ita tohotohoa. Haheitalai ta be inai: Oi be oi mahuta namonamo lasi. Unai dainai, emu doketa ia gwau namona be aniani namodia oi ania, oi eksasais, bona emu mauri ai gau haida oi haidaua. Doketa ena sisiba oi badinaia neganai, namo oi davaria! Reana emu doketa oi tanikiu henia badina oi ia durua, emu mauri oi hanamoa.
6 Unai hegeregerena, iseda Dirava be taravatu ia henia badina ia ura kara dikadia ita dadaraia bona iseda mauri ita hanamoa. Momokani, Baibel ia taravatua karadia haida be inai: Koikoi, palani dikadia, henaohenao, matabodaga, dagedage, bona meamea karadia. (Aonega Herevadia 6:16-19 duahia; Apok. 21:8) Iehova ita badinaia dainai namo bada ita davaria neganai, ita ese Iehova bona ena taravatu ita lalokau henidia bada.
Memero Kekeni E—Dahaka Umui Tahua Noho?
12 Gau badana be, kara dika oi inai henia, oi dadaraia momokani bona oi badulaia momokani. (Salamo 97:10) Edena bamona moale havaraia diba gauna do oi inai henia diba? Namona be unai kara amo dahaka do ia vara diba oi lalohadailaia! “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai ia be mase do ia abia.” (Galatia 6:7, 8) Bema tauanina ena ura hegeregerena oi ura karaia, namona be dahaka be gau badana oi laloa guna—bema tauanina ena ura oi karaia unai be Iehova Dirava do ia hahisia. (Salamo 78:41 itaia danu.) Ma danu, inai oi laloa, ena be oi ura lasi to reana do oi rogorogo eiava AIDS gorere do oi abia diba. Inai oi laloa, kara dika be lalo-metau, hemarai, bona oi sibona do oi lalo-namo henia lasi karadia ia havaraia. Reana gabeai emu kara dainai hekwakwanai do ia vara danu. Keristen hahine ta ia gwau: “Lau bona egu tau ai do headava lasi neganai taunimanima idaudia dekenai ai sihari kava. Ena be hari ai be Keristen ena kara ai karaia, to aiemai headava dekenai hepapahuahu bona mama ia do noho badina guna unai sihari kava karadia ai karaia dainai.” Ma danu, oi laloa, emu kara dainai emu tiokratik gaukara do idia koua eiava Keristen kongregesen murimurinai oi idia atoa! (1 Korinto 5:9-13) Unai emu kerere ena davana be bada herea, nega kwadogina ai oi abia moalena ia hanaia momokani, ani?
Hakaua Hereva Namodia
Oi Abia Dae Diba Dirava Ena “Hereva be Momokani”
2 Ita be Iehova ena hesiai taudia dainai, ita abia dae ia be “kara momokani Diravana” bona hanaihanai iseda namo ia laloa bada. (Sal. 31:5; Isa. 48:17) Ita abia dae Baibel lalonai ita duahia hereva ita abidadama henidia diba, badina “[Dirava ena] hereva ibounai be momokani.” (Salamo 119:160 duahia.) Baibel ia diba bada tauna ta, ia gwau: “Dirava ese ia gwauraia herevadia be idia koikoi lasi bona do idia guguru. Dirava ena taunimanima ese unai diba bada tauna ese ia gwauraia hereva idia abia dae diba, badina unai hereva ia gwauraia Diravana idia abidadama henia.”
DECEMBER 30–JANUARY 5
BAIBEL ENA HEREVA BADADIA SALAMO 120-126
Mai Tai ida Uhe Idia Hadoa, To mai Moale ida Anina Idia Gogoa
Dirava Idia Hanamoa Taudia ese Hahenamo Do Idia Abia
10 Hahediba taudia edia huaia auna ita abia dae neganai, ita be Satani ida ita tuari noho. Iamesi 4:7 ia gwauhamata: “Satani do umui tuari henia, vadaeni umui dekena amo do ia heau boio.” To ita gwau lasi unai ita karaia totona be do ia auka lasi. Dirava ita hesiai henia lalonai ita hekwarahi be namo. (Luka 13:24) To Baibel be Salamo 126:5 ai inai gwauhamata ia henia: “Idia hadohado neganai, madi edia matana ena ranu ia diho taudia, be gabeai mai edia moale danu, anina do idia gogoa.” Oibe, ita be ita ia laloa bada Diravana ita tomadiho henia. “Dirava idia tahua taudia ibounai, be davana namona Dirava ese do ia henidia,” bona Ia idia hanamoa taudia be Ia ese ia hanamodia.—Heberu 11:6.
Emu Abidadama Ia Goada, A?
17 Emu lalokau tauna ta ia mase dainai oi taitai noho, a? Toreisi lou helarona dekenai emu abidadama oi hagoadaia totona, Baibel ai idia noho toreisi lou sivarai idauidau oi duahia. Emu famili ta be orea amo idia atoa siri dainai oi lalohisihisi, a? Baibel oi stadilaia unai amo oi diba momokani, Dirava ese ia henia matahakani be dala namo hereana. Hekwakwanai oi davaria neganai, unai ese dala ia kehoa emu abidadama oi hagoadaia totona. Iehova dekenai emu hemami ibounai oi gwauraia. Sibona oi noho lasi be namo, to nega ibounai emu tadikaka taihu kahirakahira oi noho. (Aon. 18:1) Ena be oi davaria hekwakwanai dainai oi taitai noho, to emu abidadama hagoadaia gaudia oi karaia noho, unai ese oi do ia durua oi haheauka noho totona. (Sal. 126:5, 6) Emu kongrigeisen heboudia, haroro gaukara bona Baibel duahiduahi oi hadokoa lasi. Bona Iehova ena gwauhamata namodia vaira nega totona oi lalodia loulou. Iehova ese oi ia durua dalana oi itaia neganai, emu abidadama do ia goada ia lao.
Anina Haboua Gaukarana Oi Karaia Noho!
13 Salamo 126:5, 6 ena hereva ese Dirava ena gaukara, anina haboua gaukarana, idia karaia taudia ia hagoadaia, bona dagedage idia davaria taudia ia hagoadaia bada, ia gwau: “Idia hadohado neganai, madi edia matana ena ranu ia diho taudia, be gabeai mai edia moale danu, anina do idia gogoa. Io, momokani, uhe idia abia lao neganai idia tai noho taudia, be mai moale danu do idia giroa mai, bona anina idia mailaia neganai ane do idia abia.” Salamo torea tauna ese hadohado bona anina haboua gaukarana ia herevalaia bona unai be Iehova ese idaunegai Babulonia ena igui hesiai amo idia giroa lou orena taudia ia naria bona ia hanamoa karana ia laulaulaia. Idia ruhadia neganai idia moale bada, to lagani 70 lalonai ta ese ia naria lasi gabuna dekenai uhe idia hadoa neganai, reana idia tai. To, edia hadohado bona haginia gaukarana idia karaia noho taudia ese edia gaukara ia havaraia anina dainai moale idia abia.
14 Reana ita tai, bema hahetoho ita davaria eiava kara maoromaoro ita badinaia dainai hisihisi ita davaria, eiava bema iseda tadikaka dekenai unai ia vara. (1 Petero 3:14) Reana anina ita haboua lalonai nega aukana ita davaria, bema haroro gaukara lalonai ita hekwarahi to toana be anina ita havaraia lasi. To bema uhe ita hadoa bona ita dairia noho, Dirava ese unai hadoa gauna do ia hatubua, nega momo guna ita laloa diba lasi dalanai unai ia karaia. (1 Korinto 3:6) Baibel bona Baibel idia herevalaia buka bona magasin ita hariharilaia karana amo ia vara anina ese unai ia hahedinaraia namonamo.
Hakaua Hereva Namodia
Gimaia Siahuna—“Dirava be Iseda Heau Mauri Gabuna”
15 Gau ginigunana be inai, tauanina dalanai Iehova ese ita ia gimaia dalana mani ita laloa. Ita be Iehova tomadiho henia taudia dainai, Iehova ese orea ta bamona ita ia gimaia diba. Bema lasi, Satani ese ita do ia hadikaia haraga diba. Mani inai oi laloa: Satani, “inai tanobada ena lohia,” ia ura bada tomadiho momokani ia hadikaia ore. (Ioane 12:31; Apokalupo 12:17) Tanobada dekenai mai edia siahu bada gavamani haida ese iseda haroro gaukara idia taravatua bona idia ura ita idia hadikaia ore momokani. To, Iehova ena taunimanima idia gini goada bona hesiku lasi ida idia haroro noho! Dahaka dainai bese goadadia ese inai Keristani orea maragina, sibodia idia gimaia diba lasi taudia unai, edia gaukara idia hadokoa lasi? Badina Iehova ese iena hanina goadana amo ita ia gimaia!—Salamo 17:7, 8.