Kerisendom bona Igui Hesiai Taudia Hoihoilaia Karana
LAGANI 1800-1899 neganai, Katolik bona Protestan misinari taudia idia lalo-tamona igui hesiai taudia hoihoilaia karana idia inai henia totona. To, guna be unai bamona lasi. Lagani sinahu gunadiai, ena be unai kara ese hisihisi bada ia havaraia, to idia laloa igui hesiai taudia hoihoilaia karana ia namo, bona idia karaia.
Lagani 1400-1499 neganai, Cape of Good Hope dekenai hoihoi totona davara hanaia dalana idia davaria neganai, misinari taudia be Africa ena lauri bona mairiveina konedia ai idia mai diba. To lagani sinahu toi murinai, misinari gaukara Africa dekenai be kahirakahira ia doko. Africa taudia haida sibona idia veria edia tomadiho dekenai. Edia gaukara ia namo lasi ena badina ta be Kerisendom ese igui hesiai taudia idia hoihoilaidia. C. P. Groves be The Planting of Christianity in Africa bukana lalonai ia gwau:
“Keristen misini taudia be igui hesiai taudia idia hoihoilaidia bona idia laloa lasi unai be kerere. Momokani, misini oreadia be mai edia igui hesiai taudia danu; Loanda dekenai, [hari Luanda, Angola ena siti badana], Jesuit edia dubu gabunai igui hesiai taudia be 12,000. Angola dekena amo igui hesiai taudia be Brazil dekenai idia hoihoilaidia neganai, Loanda ena bisop tauna be bouti kamokau gabuna badinai iena nadi helai gauna dekenai ia helai, bona igui hesiai taudia be bouti dekenai idia siaidia lao neganai dubu ena hahenamo idia dekenai ia gwauraia, ia hamaorodia mauri ena hetoho dikadia idia ore neganai idia be namo do idia davaria ela bona hanaihanai.”
Africa From Early Times to 1800 bukana dekenai, C. R. Boxer ia gwau Jesuit misinari taudia be “Negro igui hesiai taudia hoihoilaidia karana idia koua lasi.” Luanda dekenai, igui hesiai taudia be bouti idia do guia lasi Spain bona Portugal ese idia lohiadia idau tanodia ai idia do lao lasi neganai, Boxer ia gwau “kahirakahira ia noho dubu ta ai idia abidia lao . . . bona nega tamona tamona ai dubu ena pris ese idia handred handred ia baptiso henidia.” Bena, “ranu helagana” amo idia dairidia murinai, igui hesiai taudia dekenai idia hereva, idia gwau: “Umui be Dirava ena natudia ai umui lao vadaeni; umui be Spain taudia edia gabu dekenai umui lao, unuseniai Katolik tomadiho dekenai diba do umui abia. Emui gabu korikori umui laloa lasi . . . Umui lao mai moale ida.”
Momokani, Kerisendom misinari taudia sibona lasi, to haida danu be igui hesiai taudia hoihoilaidia karana idia gwauraia namo. Geoffrey Moorhouse be iena buka The Missionaries lalonai, ia gwau: “Ia mai ema bona 1900 kahirakahira neganai, unai be taunimanima momo edia lalohadai dalana.” Hegeregere, Moorhouse ese 1700-1799 neganai ia noho Protestan misinari tauna, Thomas Thompson, ia herevalaia, ia ese pepapepa ta ia torea, ladana be The African Trade for Negro Slaves Shown to Be Consistent With the Principles of Humanity and With the Laws of Revealed Religion. [Negro Igui Hesiai Taudia Hoihoilaia Karana be Taunimanima Durua Kara bona Tomadiho Ena Taravatu Dekenai Ia Maoro.]
To, Africa igui hesiai taudia milion momo edia hisihisi dainai Kerisendom ena kerere be bada. The Encyclopædia Britannica ia gwau: “Africa idia do rakatania lasi neganai idia mase igui hesiai taudia sibodia lasi, to West Indies dekenai idia lao neganai, bouti dekenai idia gui taudia 100 100 amo 12 12 bamona idia mase; Jamaica dekenai, bouti kamokau gabunai idia naria noho bona biagudia matamatadia ese idia do hoia lasi neganai idia 100 100 amo 4 4 bamona idia mase, bona igui hesiai taudia namodia ai idia lao totona idia ‘hamandalaia’ neganai, Africa idia rakatania igui hesiai taudia edia kahana toi toi amo kahana tamona tamona idia mase.”
Nega sisina murinai, idia be rara bubua karadia idia durua bona idia hanamoa dainai Iehova Dirava ese Kerisendom bona ma tomadiho koikoi oreadia danu do ia hahemaoro henidia.—Apokalupo 18:8, 24.
[Diagram on page 8]
(For fully formatted text, see publication.)
Idia guidia bouti lalonai igui hesiai taudia idia helai dalana
[Credit Line]
Schomburg Center for Research in Black Culture / The New York Public Library / Astor, Lenox and Tilden Foundations