Baibel Ena Hereva Momokani be Romania Dekenai Lau Dibaia

GOLDIE ROMOCEAN ESE INAI SIVARAI IA GWAURAIA

Lagani 1970 ai, idia hanaia lagani 50 lalonai nega ginigunana Romania dekenai varavara taudia lau vadivadi henia. Taunimanima be Komiunis lohia dalana aukana henunai idia noho, bona nega ibounai idia gwau egu hereva lau naria namonamo be namo. Gabeai emai hanua ena gavamani ena opesi dekenai lau gini neganai, opesi tauna ia gwau maoromaoro Romania do lau rakatania be namo. Ena badina lau do herevalaia lasi neganai, mani Baibel ena hereva momokani be Romania dekenai lau dibaia dalana lau herevalaia guna.

LAU be March 3, 1903 ai, Zalău taoni kahirakahira ia noho Ortelec hanuana dekenai lau vara, Romania ena notwest kahanai. Emai noho gabuna be mai hairaina. Ranu bona hodahoda idia goeva. Sibona emai aniani ai havaraia bona tauanina dalanai ai dabu lasi. Egu mauri lagani ginigunadia lalonai, emai tano dekenai maino ia noho.

Taunimanima ese tomadiho idia goadalaia. Emai famili be tomadiho idaudia toi idia badinaia. Egu tamana ena sinana be Orthodox Catholic hahinena, egu sinana ena sinana be Adventist hahinena, bona egu tamana bona sinana be Baptist taudia. Edia tomadiho ta lau abia dae lasi dainai, egu famili taudia idia gwau Dirava be lasi lalohadaina reana do lau abia dae. Lau laloa, ‘Bema Dirava tamona ia noho, tomadiho tamona ia noho danu be namo​—famili tamona lalonai tomadiho toi idia noho be namo lasi.’

Tomadiho lalonai lau itaia gaudia dainai lau lalo-hekwarahi. Hegeregere, pris tauna be taunimanima edia ruma dekenai ia vadivadi moni gogoa totona. Taunimanima ese moni idia henia diba lasi neganai, ia ese edia wulu bilankesi namodia ia abia. Katolik dubu dekenai, lau itaia egu tubuna hahine be Mary ena laulau vairanai ia tui diho bona ia guriguri henia neganai, lau laloa, ‘Dahaka dainai laulau ia guriguri henia?’

Nega Aukadia

Lagani 1912 ai, egu tamana be United States dekenai ia lao, abitorehai haloua monina ia abia totona. Nega sisina murinai tuari ia matamaia, bona hanua amo tatau be idia lao idia tuari​—hahine, natudia, bona tatau burukadia sibona idia noho. Nega sisina emai hanua be Hungary gavamani ena siahu henunai ia noho, to Romania tuari taudia idia giroa bona hanua idia abia lou. Idia gwau namona be maoromaoro hanua do ai rakatania. To, mai daradara ida karaharaga kohu bona maragidia be boromakau ia veria gauna dekenai idia atoa bona lau idia rakatania. Unai be badina natudia ima amo lau be bada.

Emai dekena tauna, ia noho tau burukana dekenai lau heau, bona ia gwau: “Ruma dekenai do oi giroa. Iduara do oi lokaia, bona tau ta oi abia dae lasi.” Karaharaga ena hereva lau badinaia. Kokoroku vasiahuna bona kabedi, karaharaga idia lao dainai idia laloaboio aniani unai, lau ania murinai, bedi badinai lau tui diho bona lau guriguri. Daudau lasi murinai lau mahuta mase.

Egu matana lau kehoa neganai, ia diari vadaeni, bona lau gwau: “Dirava e, tanikiu bada! Lau mauri noho!” Ruma ena haba dekenai ipidi nadidia edia matu momo idia noho, badina hanuaboi ibounai idia pidia heheni. Kahirakahira hanua dekenai, egu sinana be ia itaia idia ida lau noho lasi neganai, ia ese tau matamata ladana George Romocean ia siaia, ia ese lau ia davaria bona egu bese taudia dekenai ia hakaua lao. Nega sisina murinai emai hanua dekenai ai giroa lou diba bona unuseniai ai noho lou.

Baibel Ena Hereva Momokani Lau Ura Henia

Egu sinana ia ura Baptist dubu dekenai do lau bapatiso, to lau ura lasi badina lau abia dae diba lasi lalokau Diravana ese hanaihanai hel dekenai taunimanima do ia gabua. Egu sinana ese ia herevalaia toho, ia gwau: “Bema idia kara dika neganai.” To lau gwau: “Bema idia kara dika, namona be ia hamasea sibona, to ia hahisihisia be namo lasi. Lau be hegeregere lasi sisia eiava pusikasi lau hahisihisia.”

Lau laloatao, siahu sisina dina namona ta ai, egu lagani be 14 neganai, egu sinana ese lau ia siaia boromakau be edia aniani gabuna dekenai lau hakaudia lao totona. Au momo gabuna be sisina daudau ia noho, sinavai badinai rei dekenai lau hekure neganai, guba lau raraia bona lau gwau: “Dirava e, lau diba oi noho; to inai tomadiho ta lau ura henia lasi. Lau laloa tomadiho namona ta ia noho.”

Lau abia dae momokani Dirava ese egu guriguri ia kamonai, badina unai lagani 1917 ena siahu negana lalonai, Bible Student rua (unai neganai Iehova ena Witness taudia be unai bamona idia gwauraia) be emai hanua dekenai idia mai. Idia be colporteur taudia, eiava ful-taim hesiai taudia, bona Baptist dubuna dekenai ai guriguri negana lalonai, idia mai.

Baibel Ena Hereva Momokani be Ia Bada Ia Lao Romania Ai

Lagani haida gunanai, lagani 1911 ai, Carol Szabo bona Josif Kiss, United States ai Bible Student taudia ai idia lao taudia, be Romania dekenai idia giroa lou, Baibel ena hereva momokanina be unuseniai idia harorolaia totona. Idia be Tîrgu-Mureş dekenai idia noho, kilomita 160 bamona emai hanua amo. Lagani haida lalonai, taunimanima handred momo ese Basileia ena sivarai idia abia dae bona Keristani hesiai gaukarana idia karaia matamaia.​—Mataio 24:14.

Unai Bible Student matamata ruaosi be emai hanua Ortelec ena Baptist dubu dekenai idia mai neganai, George Romocean, ena be ena mauri lagani be 18 sibona, ese guriguri ia hakaua bona Roma 12:1 ena anina ia hahedinaraia toho. Bena, unai colporteur taudia ta ia gini toreisi bona ia gwau: “Tadikaka, turadia e, aposetolo Paulo ese dahaka ia ura hahedinaraia?”

Unai lau kamonai neganai, lau moale bada! Lau laloa, ‘Inai tatau ese Baibel idia gwauraia hedinarai diba.’ To idia noho taudia momo idia boiboi: “Peroveta koikoi taudia! Umui ai diba!” Heiriheiri ia vara. To George ena tamana ia gini toreisi bona ia gwau: “Umui hereva lasi! Edena bamona toana umui hahedinaraia noho​—kekero karana amo ia mai toana, a? Bema inai tatau idia ura gau ta ita dekenai idia herevalaia bona umui ura lasi kamonai, vadaeni lauegu ruma dekenai idia lau boiria. Idia ura mai taudia ibounai be idia mai diba.”

Mai moale ida ruma dekenai lau heau lao bona ia vara gauna be egu sinana dekenai lau herevalaia. Romocean edia ruma dekenai idia lao taudia ta be lau. Unai adorahi ai lau moale bada badina Baibel amo lau dibaia hel be lahi gabuna lasi bona sibona egu Romania gado Baibel lalonai Dirava ena ladana, Iehova, lau itaia! Unai colporteur taudia idia hegaegae Sunday ta ta ibounai Bible Student ta ia mai Romocean edia ruma dekenai ai ia hadibaia totona. Gabeai siahu negana ai, egu mauri lagani be 15 neganai, bapatiso amo egu gwauhamata Iehova dekenai lau hamomokania.

Gabeai, Prodan bese kahirakahira ibounai bona Romocean bese ese Baibel ena hereva momokani idia abia dae bona edia mauri idia gwauhamatalaia Iehova dekenai. Emai hanua taudia momo be unai bamona idia karaia. Idia rua be tau matamata ta mai ena adavana ida, guna edia ruma lalonai Baptist taudia idia hebou. Gabeai Bible Student taudia edia stadi gabuna ai idia halaoa. Baibel ena hereva momokani be kahirakahira hanuadia ai idia abia dae haraga, bona lagani 1920 ai Romania ai Basileia idia harorolaia taudia 1,800 idia noho!

United States Dekenai

Ai ura bada ai dibaia gaudia be emai tamana, Peter Prodan, dekenai ai hadibaia. To, hoa gauna be inai, ia dekenai revareva ai do torea lasi neganai, revareva ta be ia amo ai abia bona ia gwau ia be Iehova ena bapatiso hesiai tauna ai ia lao. Ia be Akron, Ohio dekenai Bible Student taudia ida ia stadi, bona ia ura ai ibounai do ai lao United States dekenai, ia ida ai noho totona. To, emai sinana ia ura lasi Romania ia rakatania. Unai dainai, lagani 1921 ai, emai tamana ese ia siaia monina lau gaukaralaia, bona lau lao Akron, ia ida lau noho totona. George Romocean bona ena kakana be lagani gunanai States dekenai idia lao vadaeni.

Bouti amo Ellis Island, New York, dekenai lau ginidae neganai, gwaumaoro pepadia idia sekea tauna ta ia diba lasi edena bamona egu ladana, Aurelia, be English gado ai idia gwauraia dainai, ia gwau: “Oi be Goldie.” Unai negana amo ema bona hari unai be egu ladana. Nega sisina murinai, May 1, 1921 ai, George Romocean bona lau ai headava. Lagani tamona bamona murinai, egu tamana be Romania dekenai ia giroa bona lagani 1925 ai, egu tadina, Mary ia mailaia Akron dekenai. Gabeai egu tamana be Romania dekenai ia giroa egu sinana bona famili orena ida do ia noho totona.

Emai Haroro Negadia Gunadia States Dekenai

George be Iehova ia badinaia namonamo tauna ta. Lagani 1922 ia lao 1932 lalonai, aiemai hahenamo be kekeni namodia hani ai abia​—Esther, Anne, Goldie Elizabeth, bona Irene. Akron dekenai Romania gado kongregesen idia haginia bona ia matamaia neganai emai ruma dekenai ai hebou. Gabeai, hua 6 6 ibounai Bible Student taudia edia hedikwota Brooklyn, New York, amo tadikaka ta idia siaia emai kongregesen dekenai ia vadivadi totona bona ia be ai danu ia noho.

Sunday momo be dina ibounai lalonai haroro gaukara ai karaia. Emai buka baege bona aniani ai hegaegaelaia, kekeni be emai Model T Ford dekenai ai atoa, bena dina ibounai siti murimuriai ai haroro. Bena adorahi ai, Gima Kohorona Stadi dekenai ai lao. Emai kekeni be haroro gaukara idia ura henia bada. Lagani 1931 ai, Columbus, Ohio, dekenai Bible Student taudia ese ladana Iehova ena Witness taudia idia abia dae neganai, unuseniai lau noho danu.

Anina Bada Sisibana Lau Abia

Lagani haida murinai, Joseph F. Rutherford, unai neganai ia be Watch Tower Bible and Tract Society ena presiden tauna, lau badu henia. Witness matamata ta ia laloa Tadikaka Rutherford ese ia kara namo henia lasi, badina ena hekwakwanai ia kamonai namonamo lasi. Lau laloa Tadikaka Rutherford be ia kerere. Sunday ta ai, egu tadina Mary bona ena adavana, Dan Pestrui, be ai idia vadivadi henia. Aniani murinai Dan ia gwau: “Vadaeni, hebou totona ita hegaegae be namo.”

Lau gwau: “Ai be hebou karana ai hadokoa vadaeni. Tadikaka Rutherford ai badu henia.”

Dan be ena imana be ena murinai ia dogoatao bona ia raka lao raka mai, bena ia gwau: “Oi bapatiso neganai Tadikaka Rutherford oi diba, a?”

Lau haere: “Lasi. Oi diba Romania dekenai lau bapatiso.”

Ia henanadai: “Dahaka dainai oi bapatiso?”

Lau haere: “Badina lau diba Iehova be Dirava momokani, bona lau ura egu mauri lau gwauhamatalaia iena hesiai gaukara karaia totona.”

Ia gwau: “Unai oi laloaboio lasi! Bema Tadikaka Rutherford ese hereva momokani do ia rakatania, oi danu do oi rakatania, a?”

Lau gwau: “Lasi, lasi momokani!” Unai ese lau ia durua bena lau laloa maoro bona lau gwau: “Ibounai, hebou totona umui hegaegae.” Bona unai murinai unai kara ai rakatania lasi. Egu nakimi ese sisiba ia henia mai lalokau ida dainai Iehova lau tanikiu henia bada!

Nega Aukana Ai Haheaukalaia

Lagani 1930 murina laganidia edia Nega Aukana lalonai, mauri ia auka momokani. Dina ta ai George be gaukara amo ia giroa neganai ia lalohisihisi bada, lau ia hadibaia raba faktori amo ia idia hadokoa. Lau gwau: “Oi lalohisihisi lasi, iseda guba tamana ena kohu be bada, bona ia ese ita do ia rakatania lasi.”

Unai dina tamona ai George ese turana ta ia davaria, ena bosea badana dekenai mushroom idia noho. George ese mushroom ia abia gabuna ia dibaia murinai, ruma dekenai ia giroa neganai, mushroom momo ia mailaia. Bena ia ese emai moni orena, dola toi, amo bosea maragidia ia hoia. Lau henanadai: “Dahaka dainai unai bamona oi karaia, iseda kekeni maragidia be rata idia abia be gau badana?”

Ia gwau: “Oi laloa lasi, egu hereva oi badinaia sibona.” Bena wiki haida lalonai, faktori maragina be emai ruma dekenai ai karaia, mushroom ai hagoevaia bona bosea dekenai ai udaia. Aniani gabudia namodia dekenai ai hoihoilaia bona dina ta ta ai dola 30 ia lao 40 ai abia, bona unai neganai unai be moni bada herea ai dekenai. Biru tauna, ena tano amo mushroom ai abia totona gwaumaoro ia henia tauna unai, ia gwau lagani 25 lalonai unai gabu ai ia noho to mushroom ena momo unai bamona be guna ia itaia lasi. Nega daudau lasi murinai raba faktori be George ia boiria lou do ia gaukara totona.

Ai Abidadama Noho

Lagani 1943 ai, Los Angeles, California dekenai ai noho, bona lagani hani murinai Elsinore dekenai ai lao. Unuseniai aniani sitoa ta ai kehoa, bona ai famili taudia ibounai be ta ta ena nega ai unuseniai ai gaukara. Unai neganai, Elsinore be taoni maragina sibona bona taunimanima 2,000 bamona idia noho, bona ai be kilomita 30 taoni ma ta dekenai Keristani heboudia totona ai lao. Lau moale bada lagani 1950 ai lau itaia kongregesen maragina ta be Elsinore dekenai idia haginia neganai! Hari kongregesen 13 be unai gabu dekenai idia noho.

Lagani 1950 ai, emai kekeni Goldie Elizabeth (hari iboudiai ese idia gwauraia Beth) be Watchtower Bible School of Gilead, South Lansing, New York ai ia haorea, bona Venezuela dekenai misinari gaukara totona idia siaia. Lagani 1955 ai, emai kekeni ginigabena, Irene, ia moale ena adavana be sekit gaukara totona idia boiria dainai. Bena lagani 1961 ai, Basileia Haroro Sikuli, South Lansing, New York ai, idia haorea murinai, Thailand dekenai idia siaia. Nega haida egu kekeni lau lalodia bada dainai lau tai, to gabeai lau laloa, ‘Vadaeni, lau ura gaukarana idia karaia.’ Unai neganai egu buka baege lau abia bona haroro gaukara dekenai lau lao. Nega ibounai ruma dekenai lau giroa neganai lau moale.

Lagani 1966 ai, egu lalokau adavana, George, ena tauanina ena kahana ta ia mase. Unai neganai Beth be Venezuela amo gorere dainai ia giroa vadaeni, bona ia ese lau ia durua George lau naria lalonai. Lagani tamona murinai George ia mase, bona lau ia durua gauna be ia ese Iehova ia badinaia ela bona dokona bona ena ahuna guba dekenai ia abia. Gabeai Beth be Spain dekenai ia lao, unuseniai gaukara be bada dainai Basileia harorolaia taudia idia abia be namo. Egu vara guna kekenina, Esther, be kensa gorerena ia abia bona lagani 1977 ai ia mase, bona lagani 1984 ai, Anne be leukemia gorerena dainai ia mase. Idia ruaosi be edia mauri ibounai lalonai Iehova ena hesiai gaukara idia karaia mai abidadama ida.

Anne ena mase neganai, Beth bona Irene be idau tanodia amo idia giroa vadaeni. Idia be edia kakadia naria lalonai idia durua, bona ai ibounai ai lalohisihisi bada. Nega sisina murinai egu kekeni dekenai lau gwau: “Vadaeni! Ma haida be Baibel ena gwauhamata namodia amo ita durua. Hari ita sibona be heduru ita abia dae be namo. Satani ese eda moale Iehova ena hesiai gaukara lalonai ia ura kokia, to ia ita koua be gau badana.”

Abidadama Famili Taudia Romania Ai

Lagani 1970 ai, egu tadina Mary bona lau be lau gwauraia vadaeni laolaona ai karaia, Romania ai idia noho famili taudia ai itaia totona. Emai tadina ta ia mase vadaeni, to emai taihuna John bona emai tadina Lodovica ai vadivadi henidia, bona idia be Ortelec dekenai idia do noho. Ai vadivadi neganai, emai tamana bona sinana idia mase vadaeni. Idia be Iehova idia badinaia ela bona dokona. Momo be ai idia hamaoroa kongregesen lalonai egu tamana be goada momokani. Hari ena tubudia edia natudia haida danu be Witness taudia Romania ai. Egu adavana ena varavara taudia momo, Baibel ena hereva momokani idia dogoatao auka taudia unai, ai vadivadi henia danu.

Lagani 1970 ai, Romania be Nicolae Ceauşescu ena Komiunis siahuna aukana henunai ia noho, bona Iehova ena Witness taudia idia dagedage henia dikadika. Egu taihuna John ena natuna mero, Flore, bona egu varavara ma haida, be lagani momo lalonai, edia Keristani abidadama dainai dibura kamepa dekenai idia noho, bona egu adavana ena tamana ta ena natuna mero, Gábor Romocean, be unuseniai ia noho danu. Unai dainai emai tadikaka Romania dekenai edia hereva ai hoalaia lasi. Idia ese ai idia noia Iehova ena Witness taudia edia hedikwota New York dekenai revareva do ai abia lao, bona idia gwau do idia lalo-hekwarahi ela bona do idia diba kerere ta ia vara lasi bona Romania ai rakatania!

Ai itaia emai visa edia nega ia hanaia vadaeni neganai, Ortelec ai gavamani ena opesi dekenai ai lao. Unai be Friday adorahi ai, bona gaukara tauna tamona sibona ia noho. Ia diba daidia ai vadivadi henia bona ia diba emai taihuna ena natuna mero be dibura kamepa dekenai ia noho neganai, ia gwau: “Namona be karaharaga inai gabu do umui rakatania!”

Egu tadina ia gwau: “To hari trein ta do ia lao lasi.”

Ia hereva haraga ia gwau: “Basi umui abia. Trein umui abia. Taksi umui abia. Umui raka. Herevana, to inai gabu do umui rakatania haraga be gau badana!”

Opesi ai rakatania gwauraia neganai, ai idia boiria lou bona idia hadibaia sediual ia gwauraia lasi to ami ena trein ta be adorahi 6:00 do ia mai. Unai be kara badana! Hanaihanai idia lao trein dekenai, emai pepadia be nega momo do idia sekea, to badina inai trein dekenai ami taudia idia gui bona ai ruaosi sibona be ami lasi taudia, emai paspot idia sekea lasi. Reana idia laloa ai be unai ofesa taudia haida edia tubuna hahinedia.

Kerukeru dabai Timisoara dekenai ai ginidae, bona varavara ta ena turana ta ena heduru dainai, emai visa matamatadia ai abia diba. Dina ta murinai Romania ai rakatania. Ai giroa neganai, emai abidadama Keristani tadikaka bona taihu Romania dekenai ai laloa mai moale ida, idia ai laloaboio diba lasi.

Romania ai vadivadi henia ena murina laganidia lalonai, unai kahanai idia haroro ena sivarai ai kamonai momo lasi. To, ai diba emai Keristani tadikaka bona taihu be iseda Dirava do idia badinaia noho​—herevana dahaka ia vara. Bona Ia idia badinaia momokani! April 1990 ai, ai kamonai Romania ena gavamani ese Iehova ena Witness taudia ia abia dae idia be tomadiho oreana ta neganai, ai moalelaia bada! Gabeai siahu negana ai Romania dekenai idia karaia hebouhebou edia ripoti ai moalelaia bada. Siti 8 dekenai kamonai taudia 34,000 idia hebou bona 2,260 idia bapatiso! Hari Romania dekenai haroro gaukara idia karaia taudia edia namba be 35,000 ia hanaia, bona lagani gunanai 86,034 idia lao Keriso ena mase ena Memorial hebouna dekenai.

Hereva Momokani Lau Do Laloa Bada

Lagani haida lalonai, Memorial dekenai paraoa lau ania lasi bona uaina lau inua lasi. Lau itaia lo tadikaka momo ese idia abia lasi, bona lau laloa: ‘Dahaka dainai Iehova ese hahenamo badana, ena Natuna ida guba dekenai do lau lohia diba ena hahenamo unai, be lau dekenai ia henia ena be hereva namo taudia momo idia noho?’ To paraoa bona uaina lau abia lasi neganai, lau lalo-hekwarahi bada. Egu mamina be gau ta lau dadaraia noho. Lau stadi bona guriguri goadagoada murinai, paraoa lau ania bona uaina lau inua lou. Maino bona moale lau abia lou, bona idia do noho.

Ena be egu matana idia dika dainai lau duahiduahi diba lasi, to dina ta ta Baibel ena kaset teipi bona Watchtower bona Awake! edia kaset teipi lau kamonai henia. Lau haroro noho danu. Hua ta ta magasin 60 ia lao 100 lau hariharilaia, to April gunanai Awake! magasin ai hariharilaia goadagoada neganai, 323 lau hariharilaia. Egu natuna kekenidia edia heduru dainai, Haroro Sikuli dekenai hereva lau henia diba danu. Lau moale badina ma haida lau hagoadaia diba. Kingdom Hall ai kahirakahira iboudiai be lau idia gwauraia bubu hahine.

Iehova ena hesiai gaukara lau karaia laganidia 79 lau laloa neganai, dina ta ta ia lau tanikiu henia badina ena hahenamo dainai ena hereva momokani lau diba bona egu mauri be ena hesiai gaukarana lalonai lau gaukaralaia diba. Lau moale bada lau mauri noho bona lau itaia diba Baibel ena peroveta herevadia, dokona dinadia ai Dirava ena mamoe bamona taudia idia gogoa herevadia unai, idia guguru.​—Isaia 60:22; Sekaraia 8:​23.

[Picture on page 23]

Egu tadina Mary bona Tamana idia gini, bona lau, George, bona emai kekeni Esther bona Anne

[Picture on page 24]