“Naria Tauna Namona Bona Tura Lalokauna”

JOHN (JACK) BARR, be Iehova ena Witnes taudia edia Hakaua Oreana ena memba ta, bona Saturday dabai, December 4, 2010 ai ia mase bona ena guba helarona ia abia. Iena mauri lagani be 97. Momo idia gwau ia be “naria tauna namona bona tura lalokauna.”

Tadikaka Jack Barr be Aberdeen, Scotland ai ia vara, bona iena kakadia be rua. Iena tama sina be horoa taudia danu. Tadikaka Barr be nega momo iena famili edia kara namodia ia herevalaia bona ena tama sina edia haheitalai namona ia laloa bada.

Ia be mero matamata neganai, ia diba lasi taudia ia hereva henia be auka. To, ia gaukara goada unai ia hanaia totona, bona lagani 1927 ai iena mauri lagani be 14 neganai, Sunday adorahi ta ai iena tamana ia hamaoroa, ia ura ruma-ta-ruma-ta haroro gaukara totona do ia bamoa. Unai be iena hesiai gaukara ia hamatamaia negana ginigunana. Unai dina amo ela bona iena mase, Tadikaka Barr be sivarai namona harorolaia goadagoada tauna.

Ia be do mero matamata neganai, aksiden ta ia vara bona kahirakahira iena sinana ia mase. Unai dainai tadikaka Jack be mauri ena badina ia laloa momo, bona lagani 1929 ai Iehova dekenai ena mauri ia gwauhamatalaia bona lagani 1934 ai ia bapatiso. Lagani 1939 ai, ia be London, England ena Betele dekenai ia vareai. Unai nega amo ema bona ia mase, ia be lagani 71 lalodiai ful-taim hesiai gaukara ia karaia.

October 29, 1960 ai, Tadikaka Barr be “tura namo hereana ta” ia davaria. Ia ese taihu Mildred Willett ia adavaia, ia be nega daudau lalonai painia bona misinari gaukara ia karaia. Tadikaka bona Taihu Barr be haheitalai namodia, badina edia headava lalonai ta ta idia badinaia bona lalokau heheni ela bona taihu Mildred be October 2004 ai ia mase bona ena guba helarona ia abia. Tadikaka bona Taihu Barr be edia headava maurina ibounai lalonai, dina ta ta ai Baibel idia duahia hebou.

Tadikaka Jack Barr idia diba namonamo taudia idia laloatao ia be mai laloa maoromaoro, bona mai manau ida sisiba ia henia bona Baibel ia gaukaralaia. Ia be gaukara goadagoada tauna, ia henunai idia gaukara taudia ia laloa bada bona ia be tura lalokauna. Iena haere, tok bona guriguri ese idia hahedinaraia, ia be hereva momokani ia laloa bada bona ia be Iehova ena turana namona.

Ena be Tadikaka Barr ia mase dainai ita lalohisihisi, to ita moale badina ia be ena guba helarona​—⁠mase diba lasi maurina​—⁠ia abia vadaeni. Ia ese unai helaro ia laloa bada bona ia herevalaia momo, bona iena mauri ibounai lalonai iena hetura karana Iehova ida ia laloa bada.​—⁠1 Kor. 15:​53, 54.a

[Footnote]