Henanadai Mauana

◼ Edena bamona ita ese iseda hebou edia namo ita habadaia diba?

Reana haida idia laloa kerere bona idia laloa kongregesen heboudia edia namo habadaia be elda taudia bona hesiai taudia sibona edia gaukara, badina kongregesen hebou iboudiai be idia ese idia naria bona kahana momo be idia ese idia karaia. To, ita ta ta ibounai ese hebou ena moale bona namo ita habadaia diba. Ita ese hebou edia anina namona ita habadaia daladia 10 be inai:

Hegaegae guna. Ita hegaegae namonamo neganai, hebou ese iseda lalona do ia veria. Bema ita ibounai be unai bamona ita karaia neganai, hebou do ia heau namonamo bona hebou amo goada do ita abia. Hebou lao henia hanaihanai. Hebou dekenai taunimanima momo idia lao neganai, unai ese hebou dekenai idia noho taudia ia hagoadaia, bena mai goada ida idia laloa noho hebou lao henia karana be mai anina bada. Nega korikori ai ginidae. Bema program ia do hamatamaia lasi neganai ita helai, ita ese ma haida ita bamoa diba hebou kehoa ane bona guriguri lalonai, unai amo hebou ibounai ena namo bada do ita davaria. Gau ibounai abia hegaegae. Iseda Baibel bona hebou lalonai idia gaukaralaia bukadia ita abia lao, unai amo hereva idia henia neganai ita ese iseda buka ita itaia diba bona idia herevalaia gaudia do ita lalo-pararalaia namonamo. Lalona veria gaudia dadaraia. Hereva ita kamonaia namonamo diba bema vairana kahanai ita helai. Ta ita hereva henia metairametaira bona nega momo ita lao mei rumana ese ita bona ma haida edia kamonai karana idia hadikaia diba. Hebou dekenai oi haere. Bema ita momo ese iseda imana ita abia isi neganai bona ita haere, unai abidadama gwauraia hedinarai haeredia ese momo ia hagoadaia bona durua. Haere kwadogidia henia. Unai ese dala ia kehoa momo idia haere totona. Namona be iseda haere kwadogidia be ita stadilaia herevana sibona amo. Ita idia henia gaukara ita karaia guguru. Bema ita be hereva ta do ita henia Haroro Sikuli lalonai eiava kahana ta do ita karaia Hesiai Hebou dekenai, namona be ita hegaegae namonamo, iseda kahana ita tohoa guna, bona namona be iseda kahana ita reaia lasi. Haere bona hereva idia henia taudia hanamoa. Haida hamaoroa edia hekwarahi oi laloa bada. Unai ese idia ia hagoadaia bona danu unai ese idia do ia doria nega ma ta ai edia kahana do idia karaia namonamo totona. Ta ta hagoadaia heheni. Hebou ia do hamatamaia lasi neganai bona hebou murinai, mai hemataurai ida ta ta ita hanamoa bona hagoadaia dalana ai ita kiki neganai, unai ese iseda hebou lao henia karana ena moale bona ena namo do ia habadaia.