‘Gau Badana be Gaukara Ibounai be Ma Haida Hagoadaia Totona’
1 Iseda tadikaka ita kara henia neganai, namona be kara namodia ita karaia idia ita hagoadaia totona. Unai ena anina be edia lauma gaudia ita laloa. Bema moni gaukara ta ita karaia, bona unai gaukara be gau ta ita hoihoilaia, namona be ita naria namonamo, gau ta ese iseda tadikaka do idia hahekwakwanaia lasi.—2 Kor. 6:3; Fil. 1:9, 10.
2 Haida ese bisinesi karadia idauidau idia karaia, bona edia Keristani bamodia idia itaia edia hoihoi taudia bamona. Hoihoi orea haida ese idia totona idia gaukara taudia idia hagoadaia taunimanima ibounai idia itaia hoihoi taudia bamona—edia tomadiho tamona taudia danu. Haida ese edia bisinesi idia habadaia dalana ta be, ena be edia tadikaka ese idia noia lasi to idia dekenai edia bisinesi herevadia idia gwauraia. Keristani tauna ta ese Dirava ena orea taudia edia hebamo ia gaukaralaia ena bisinesi habadaia totona be maoro, a? Lasi!—1 Kor. 10:23, 24, 31-33.
3 Namona be Tadikaka Idia Naria Namonamo: Ita gwau lasi unai ena anina be Keristani tauna ta ese tadikaka ta ida bisinesi ia karaia diba lasi. Unai be ta ta ena ura hegeregerena. To, haida ese idia matamaia bisinesi daladia ese mataganigani karana idia hagoadaia, bona edia tadikaka idia veria edia bisinesi turadia ai idia lao eiava idia amo moni idia noia, gabeai unai bisinesi amo ma moni idia abia totona. Unai bisinesi karadia momo idia moru, bona unai bisinesi idia durua taudia edia moni bada idia haboioa. Ena be unai bisinesi lalonai idia vareai taudia be reana moni idia ura abia haraga dainai unai idia karaia, to bema unai bisinesi ia moru, bisinesi ia naria tauna ia laloa diba lasi ia be kerere lasi. Namona be ia tahua namonamo guna, ena tadikaka edia namo lauma bona tauanina dalanai be do edena bamona bema bisinesi ia moru. Namona be Dirava ena orea lalonai maduna idia abia taudia be edia moni gaukara dainai idia naria namonamo, badina reana haida ese idia do idia matauraia bona idia abidadama henia bada. Namo lasi unai abidadama karana idia gaukaralaia kerere. Tadikaka ta ese ena hesiai gaukara helagana lalonai ia abia hahenamo ia haboioa diba, bema ma haida ese edia matauraia karana ia dekenai idia haboioa.
4 Namona be iseda tahua gauna be, ‘gaukara ibounai be ma haida hagoadaia totona’ ita karaia. (1 Kor. 14:26) Kongregesen lalonai bisinesi idia hamatamaia eiava idia hagoadaia karadia ita karaia lasi be namo. Unai bamona gaudia be idau bona Baibel ese ita ia hagania ita hebou ena badina be idau.—Heb. 10:24, 25.