Koua Gaudia ese Emu Lalona Idia Hametaua A?
KOUA GAUDIA! Taunimanima ese idia ura henidia lasi; to ita ibounai ita haheaukalaidia be namo. Nega haida koua gaudia dainai emu lalona ia metau, a? Emu lalohadai unai koua gaudia dekenai bema oi haidaua, emu lalona ena mamina do ia namo reana. Namona be oi karaia diba lasi karadia oi lalohisihisilaidia lasi, to oi karaia diba karadia oi moalelaidia be namo, ani?
Hegeregere, ogogami taudia momo idia ura do idia taga. To, ena be moni be lasi dainai kara momo ita karaia diba lasi, to ita ibounai be mai eda dala, mai anina bada karadia do ita karaia. Taga taudia bona ogogami taudia danu idia headava, edia bese idia havaradia, bona haida idia tura henidia. Unai ia hanaia karana be, Iehova idia dibaia bona ia gwauhamatalaia tanobadana matamatana idia naria mai edia moale ida. Dirava ena amo idia mai aonegana bona dibana, taga idia hanaia gaudia, be idia abidia. (Hereva Lada-isidia 2:1-9; Kohelete 7:12) Taga taudia bona ogogami taudia be mai edia dala, ladana namona do idia abia Iehova vairanai. (Kohelete 7:1) Paulo ena negai Keristen kongregesen taudia momo be ladana maragi taudia, haida be hesiai taudia; edia noho hegeregeredia edia ura-kwalimu be aonega dalanai idia gaukaralaia.—1 Korinto 1:26-29.
Baibel ese Ia Gwauraia Kwara Dagina
Keristen headavana lalonai, hahine be tau ena siahu henunai ia noho—Dirava ese unai taravatu ia atoa, ruma bese taudia iboudiai hanamodia totona. (Efeso 5:22-24) Namona be hahine ia laloa unai ese ia hadikaia, a? Lasi. Tau bona hahine be gaukara hebou taudia. Tau ese Keriso ena kara be ena kwara dagina ai ia tohotohoa neganai, ena adavana ia koua momo lasi, bena ia be mai ena dala momo, sibona ena diba hegeregerena gaukara haida do ia karadia. (Efeso 5:25, 31) Hereva Lada-isidia karoa 31 ese ia gwauraia ‘hahinena namona’ ese ena diba bona ena goada hegeregeredia gaukara idauidau ia karadia. Momokani, ena be ena adavana ena siahu henunai ia noho, to unai ese ena lalona ia hahekwarahia lasi.—Hereva Lada-isidia 31:10-29.
Unai hegeregerena, Keristen kongregesen lalonai hahine ese tatau idia gunalaidia be taravatu. (1 Korinto 14:34; 1 Timoteo 2:11, 12) Unai taravatu dainai Keristen hahinena ena lalona ia hisihisi be maoro a? Lasi. Hahine momo idia moale, badina be Dirava ena taravatu hegeregerena tatau ese unai Keristen gaukarana idia naria. Lauma ese ia duanaidia elda taudia edia henari bona edia hahediba dainai idia abia heduruna be idia moalelaia, bona idia ese taunimanima haroro henidia bona hahediba taudia ai halaodia gaukarana, mai anina bada gaukarana unai, idia goadalaia. (Mataio 24:14; 28:19, 20) Keristen hahinedia be unai gaukara amo anina bada idia havaraia, bona unai dainai Iehova Dirava ese ia hanamodia.—Salamo 68:11; Hereva Lada-isidia 3:35.
Memero Kekeni Koudia Gaudia
Edia tamadia sinadia edia siahu henunai idia noho memerodia bona kekenidia be nega haida idia maumau, idia gwau idia ese idia koudia momo. To unai be Baibel ena taravatu. (Efeso 6:1) Keristen memerodia bona kekenidia mai edia aonega ese edia tamadia sinadia edia taravatu idia maumauraidia lasi, to idia henidia ura-kwalimuna idia moalelaia—unai ura-kwalimu dainai maduna metaudia idia huadia lasi. Unai dainai edia goada bona edia ura-kwalimu amo do idia hegaegae diba, tau bona hahine edia maduna do idia huadia.
Sekit naria gaukarana be guna ia karaia tauna ta ese lagani 12 merona ta ia laloa lou; unai mero, grup maragina ai ia noho, ena diba be bada lasi. Faila pepadia naridia tauna be ena moni gaukarana ai ia bisi dainai, grup ia naria namonamo diba lasi, to dala ia karaia, hari mero ese do ia durua totona. Mero ese pepa iboudiai edia gabu ia dibaia bena nega ibounai ia durua. Ena kara ese tadikaka ia hagoadaia, bona haroro gaukarana ai ia bamoa loulou. Hari, unai tauhau be kongregesen ena elda tauna ta.
Gau momo ese taunimanima edia ura-kwalimu idia koua sisina. Haida be gorere ese ia koudia. Haida be edia adavadia, murimuri taudia, edia ura ese ia koudia. Ena be koua gaudia idia haheaukalaidia taudia be reana idia ura edia noho do ia idau, to edia mauri lalonai moale idia davaria diba. Gima Kohorona magasin gunadia lalodiai unai bamona taudia momo edia sivarai idia noho. Idia ese ma haida idia hagoadadia, badina be Iehova dekenai idia tabekau bona idia haheauka.
Aposetolo Paulo ese haida ia tore henidia, ia gwau: “Dirava ese oi ia boiria neganai oi be hesiai tauna mai guia danu, a? Oi laloa lasi. To bema oi idia ruhaia dalana oi davaria neganai, do oi abia dae. Unai be namo.” (1 Korinto 7:21) Lalohadai namona unai! Gau haida idia senisi. Memero kekeni idia tubu daekau. Hereva momokani idia dadaraia taudia haida ese gabeai idia abia dae. Nega haida ogogami be ia maragi ia lao. Gorere taudia be reana do idia namo lou. To gau haida do idia senisi lasi ela bona tanobada matamatana do ia vara. To bema ita lalohisihisi noho badina be haida idia karaia diba karadia be ita karaia diba lasi, unai ena namo be dahaka?
Guba padanai idia roho manudia be nega ta oi raraidia bona edia hairai bona edia roho dalana mai koua gauna lasi be oi hoalaia, a? Reana oi ura oi danu be unai bamona do oi roho. To dala be lasi, lasi vaitani! Unai oi maumauraia lasi reana, to Dirava ese ia henimu dibana oi moalelaia. Tano ena kopina latanai oi raka mai emu kwalimu ida. Unai hegeregerena, herevana iseda noho be edena bamona, to ita karaia diba karadia bema ita lalodia bona ita karaia diba lasi karadia bema ita lalohisihisilaidia lasi, iseda lalona do idia hegeregere, bona Iehova ena hesiai lao henia gaukarana ai moale do ita davaria.—Salamo 126:5, 6.
[Picture on page 28]
Oi laloa emu tamana sinana ese oi idia koua momo, a?