Boulvèsman politik k ap reyalize pwofesi ki nan Bib la

Jodi a, moun yo gen anpil opinyon diferan sou yon seri sijè politik. Moun yo pa dakò avèk lwa ki gen efè sou lavi y ap mennen chak jou, e lè yo gen opinyon politik ki diferan, yo montre yo pa dakò yon fason ki vyolan, swa nan pawòl yo, swa nan aksyon yo. Byen souvan, moun k ap fè lwa ak ofisyèl nan gouvènman yo gen opinyon ki diferan e yo pa dispoze sede. Diferans sa yo lakòz gwo pwoblèm politik, sa ki konn febli kapasite gouvènman yo genyen pou yo fè travay yo.

Nou plis wè sa toujou lè gen boulvèsman politik Ozetazini ak Grann Bretay (yo konn rele byen souvan Wayòm Ini). Sa k fè sa? Se paske Bib la te gentan fè konnen t ap gen boulvèsman nan toude peyi sa yo e se pandan menm peryòd sa a gouvènman Bondye a, ki nan syèl la, t ap vin pran kontwòl tè a.

Boulvèsman politik nan “nan dènye jou yo”

Bib la gen yon pwofesi estrawòdinè nou jwenn nan liv Dànyèl la. Nan pwofesi sa a, Bondye te fè konnen “sa k pral rive nan dènye jou yo”, e nan epòk Dànyèl t ap ekri pawòl sa yo li t ap fè referans ak yon epòk ki t ap gen pou vini kote t ap gen gwo chanjman nan listwa lèzòm. — Dànyèl 2:28.

Bondye te fè wa Babilòn nan wè yon pwofesi biblik nan yon rèv. Nan rèv sa a, wa a te wè yon gwo estati ki te fèt ak diferan metal. Annapre, pwofèt Dànyèl te fè konnen estati a, soti nan tèt rive nan pye, reprezante diferan pisans mondyal ki t ap parèt e ki t ap sispann egziste pandan istwa lèzòm.a Rive yon lè, t ap gen yon wòch, ki reprezante yon Wayòm oswa yon gouvènman Bondye, mete sou pye ki t ap detwi estati a nèt. — Dànyèl 2:36-45.

Selon pwofesi a, Wayòm Bondye a pral ranplase tout gouvènman lèzòm yo. Wayòm sa se menm wayòm Jezi te anseye disip li yo pou yo priye pou li, lè l te di: “Se pou Wayòm ou an vini.” — Matye 6:10.

Men ki kote nou jwenn pwofesi ki fè konnen t ap gen boulvèsman politik nan Bib la? Note sa a, estati a “te gen pati nan pye l ki te an fè ak pati ki te ann ajil”. (Dànyèl 2:33.) Melanj sa a te diferan parapò ak lòt metal yo ki te solid ki te fè rès pati estati a, sa ki montre t ap gen yon pisans mondyal ki t ap diferan parapò ak lòt yo. Ki jan? Pwofesi Dànyèl la fè konnen:

Selon sa pwofesi a fè konnen, t ap gen boulvèsman politik nan pisans mondyal ki reprezante pye estati a. Pèp la t ap lakòz pisans mondyal sa a pèdi nan pouvwa li genyen.

Pwofesi Dànyèl la ap reyalize jodi a

Pye estati a reprezante pisans mondyal k ap dirije jodi a, nou vle pale de Etazini ak Grann Bretay k ap travay men nan men. Ki jan evènman k ap pase jounen jodi a montre sa?

Pye estati a “gen pati an fè e gen pati ann ajil”, yon melanj ki fè pye estati a fèb (Dànyèl 2:42). Jodi a, pouvwa Etazini ak pouvwa Grann Bretay vin pi fèb akoz divizyon ki gen nan sosyete yo a. Pa egzanp, gen divizyon nan sosyete ki nan toule de peyi sa yo. Moun yo fè manifestasyon ki vyolan pou dwa yo genyen. Souvan, moun pèp la te chwazi yo pa rive antann yo sou anpil sijè. Piske sitwayen anba gouvènman sa yo pa rive antann yo, pafwa toule de gouvènman sa yo pa ka fè sa yo te deside fè.

Ann gade siyifikasyon kèk detay nan pwofesi Dànyèl la pou n wè fason yo reyalize jodi a:

Pwofesi: “Wayòm nan ap divize, men, l ap yon ti jan di tankou fè.”— Dànyèl 2:41.

Sa vle di: Menmsi gouvènman Etazini ak gouvènman Grann Bretay fè fas ak pwoblèm politik anndan gouvènman yo, yo toujou gen lame yo ki pisan. Se sa k fè yo ka aji ak otorite ak pisans tankou fè.

Akonplisman

Nan ane 2023, nan yon lis k ap site konbyen kòb chak peyi te depanse pou lame yo, nou wè gouvènman Etazini ansanm ak Wayòm Ini te depanse plis lajan nan lame yo pase rès 12 peyi ki nan lis la. — Stockholm International Peace Research Institute.

“Alyans ki gen ant Wayòm Ini ak Etazini pou yo pwoteje e defann enterè peyi yo [...] vin alyans ki gen plis pouvwa ant de peyi k ap itilize dènye teknoloji ak yon seri ide. [...] N ap travay ansanm, n ap soutni youn lòt e n ap goumen youn pou lòt.” — Strategic Command, U.K. Ministry of Defence, Avril 2024.

Pwofesi: “E menm jan zòtèy ki nan pye l yo gen pati an fè e gen pati ann ajil, se konsa tou, yon pati nan wayòm nan ap djanm e yon pati ap fèb.” — Dànyèl 2:42.

Sa vle di: Menmsi Etazini ak Grann Bretay gen lame ki pisan, yo pa ka fè tout sa yo vle akoz fason gouvènman demokratik nan peyi sa yo òganize. Si pifò moun pa dakò ak yon desizyon, li difisil pou gouvènman sa yo ta aji jan yo vle.

Akonplisman

“Gen kèk espesyalis nan domèn politik ki fè konnen divizyon ki genyen anndan gouvènman Etazini a fè l difisil pou l reyalize sa l di l ap fè nan domèn sekirite ak nan biznis.” — “The Wall Street Journal.”

“Nan gouvènman Grann Bretay la, vin gen boulvèsman politik nan yon nivo ki potko janm fèt anvan sa, sa ki detounen atansyon politisyen yo. Kòm rezilta, moun k ap fè sèvis sivil pou gouvènman anb pa ka fè chanjman ki nesesè pou ede sitwayen yo.”— Institute for Government.

Pwofesi: “Yo [moun nan wayòm yo] pral mele ak pèp yo. Men, youn pap kole ak lòt.” — Dànyèl 2:43, nòt.

Sa vle di: Nan gouvènman demokratik yo, menm moun ki pa politisyen ka gen kèk kontwòl sou sa k ap pase nan gouvènman an, men, rezilta yo pa vrèman satisfè ni politisyen yo ni moun k ap vote pou yo.

Akonplisman

“Jounen jodi a, pifò ameriken yo gen yon pwennvi ki vrèman negatif sou politik e sou politisyen yo.” — Pew Research Center.

“Jodi a, moun k ap viv anba gouvènman Grann Bretay pa fè gouvènman ak politisyen yo konfyans e se premye fwa nan senkant ane ki pase yo yo manke fè yo konfyans konsa.” — “National Centre for Social Research.”

Akonplisman pwofesi Dànyèl la

Selon pwofesi Dànyèl la, se Pisans mondyal anglo-ameriken an k ap domine lè Wayòm Bondye a pral ranplase tout gouvènman lèzòm yo. — Dànyèl 2:44.

Nan yon lòt pwofesi nou jwenn nan liv Revelasyon an, Bib la fè n konnen “wa latè yo” pral rasanble kont Jewovac Dye pou lage Amagedon, “lagè ki gen pou fèt nan gran jou Bondye a, li menm ki Toupisan an” (Revelasyon 16:14, 16; 19:19-21). Nan gè sa a, Jewova pral detwi tout gouvènman lèzòm yo, e lè sa fèt pap rete okenn pati nan estati nan pwofesi Dànyèl la, anpalan de pisans mondyal yo.

Pou w aprann plis toujou, gade atik: “Ki sa lagè Amagedon an ye?”

Byen pwofite sa pwofesi Dànyèl la di konsènan boulvèsman politik

Bib la te di egzakteman t ap gen boulvèsman politik Ozetazini ak nan Grann Bretay, e lefètke nou konn sa, sa ede n wè evènman k ap pase jodi a yon lòt jan.

• W ap vin konprann poukisa Jezi pa t vle pou disip li yo mele nan zafè politik (Jan 17:16). Anplis de sa, w ap vin konprann poukisa Jezi, antanke dirijan Bondye te chwazi pou dirije Wayòm li a, te di: “Wayòm mwen an pa fè pati monn sa a.” — Jan 18:36.

• W ap jwenn bonjan espwa talè konsa Wayòm Bondye a pral aji e tout benediksyon ak tout pwomès Bondye fè konnen lèzòm pral benefisye anba dominasyon Wayòm li a pral reyalize. — Revelasyon 21:3, 4.

• W ap vin gen bonjan konfyans konsènan lavni, e ou pap pè pou pwoblèm ki genyen ant nasyon yo ta vin lakòz tè a vin detwi. — Sòm 37:11, 29.

Pwofesi Dànyèl la montre Pisans mondyal anglo-ameriken an, ki reprezante pye estati a, pral dènye pisans mondyal k ap domine lèzòm. Apre pisans mondyal sa a fin detwi, se Wayòm Bondye a, yon gouvènman ki nan syèl la, ki pafè ki pral ranplase l!

Pou w aprann plis sou byenfè Wayòm Bondye a ap pote pou lèzòm, gade videyo Ki sa Wayòm Bondye a ye?