Èske operasyon pou kenbe lapè k ap fèt yo kapab mete lapè nan monn nan vre?

Se toutan lagè ak lòt zak vyolans ap fè raj nan monn nan. Se sa k fè, Nasyonzini ak lòt òganizasyon fè yon seri operasyon yo rele operasyon pou kenbe lapèa kote yo asire yo yo prezan nan zòn ki gen latwoublay. Yo espere y ap kapab fè gen lapè nan zòn sa yo. Sekretè jeneral Nasyonzini an, António Guterres, di: “Operasyon pou kenbe lapè yo se fason ki pi enpòtan n ap travay pou mete lapè nan monn nan.”

Pandan ane ki pase yo, operasyon pou kenbe lapè yo te reyisi kèk fwa. Pa egzanp, yo pwoteje sivil, pèmèt refijye tounen nan peyi yo, bay èd imanitè e yo pèmèt sèvis nan kominote yo rekòmanse fonksyone pou ede sitwayen yo. Men, gen anpil bagay ki fè l difisil pou operasyon sa yo reyisi san pousan. Èske lèzòm ap rive jwenn bonjan solisyon pou mete lapè nan monn nan? Ki sa Bib la di sou sa?

Difikilte ki genyen pou kenbe lapè ak solisyon Bib la bay

Difikilte: Mank kowoperasyon. Li pa toujou fasil pou òganizasyon militè ak sivil nan diferan peyi rive travay ansanm. Pafwa, òganizasyon sa yo konn gen difikilte pou yo travay ansanm akoz youn pa konprann lòt e youn pa toujou ap travay nan enterè lòt.

Solisyon Bib la bay: ‘Bondye nan syèl la pral tabli yon wayòm. L ap kraze tout wayòm sa yo [wayòm lèzòm], […] se li menm sèl k ap rete pou toutan.” — Dànyèl 2:44.

Difikilte: Resous ak kapasite limite. Operasyon pou kenbe lapè yo pa toujou gen kantite moun, kantite lajan oswa lòt resous nesesè pou yo fonksyone, sa ki anpeche yo rive byen fè travay yo. Epitou, ekip yo oblije travay nan zòn kote sitiyasyon an pi konplike e pi danjere de jou an jou.

Solisyon Bib la bay: “Sila a ki Bondye Jezi Kris, Seyè nou an […] fè [Jezi] chita adwat li nan syèl la, nan yon pozisyon ki pi wo lontan pase tout gouvènman, tout otorite, tout pisans.” — Efezyen 1:17, 20, 21.

Jewovab, Bondye ki gen tout pouvwa a, mete Jezi Wa nan Wayòm Bondye a e li ba l yon kantite resous san limit (Dànyèl 7:13, 14c). Bondye bay Jezi plis pisans, plis konesans, plis sajès ak plis bon konprann lontan pase sa okenn gouvènman oswa òganizasyon sou tè a ka genyen (Ezayi 11:2). Epitou, Jezi gen yon lame zanj ki pisan ki anba pouvwa l (Revelasyon 19:14). Pa gen okenn sitiyasyon ki twò konplike oswa twò difisil pou l rezoud.

Difikilte: Restriksyon lalwa mete. Pafwa, òganizasyon k ap travay pou kenbe lapè yo pa rive fè tout sa pou yo fè paske enstriksyon yo jwenn yo pa fin klè oswa yo limite yo nan aksyon yo. Sa ka lakòz yo pa gen posiblite pwoteje moun jan yo ta vle oswa reyalize tout sa yo ta vle.

Solisyon Bib la bay: “[Jezi] resevwa tout pouvwa ni nan syèl la ni sou tè a.” — Matye 28:18.

Bondye bay Jezi yon misyon ki klè e l ba l tout otorite pou l reyalize l. Misyon an se mete lapè sou tè a (Jan 5:22). Jezi pap janm aji avèk enjistis nitou li pap janm tonbe nan koripsyon (Ezayi 11:3-5). Se avèk rezon Bib la rele Jezi “Prens lapè”, e l fè konnen Wayòm li an tabli “grasa sa ki jis ak sa ki dwat.” — Ezayi 9:6, 7.

Wayòm Bondye a pral pote lapè toutbon

Efò lèzòm ap fè yo kapab pote yon ti stabilite e petèt rive mete fen nan yon gè nan yon zòn. Men, yo pa ka elimine sa ki lakòz vyolans sou tè a, anpalan de lahèn anpil moun gen nan kè yo pou lòt moun.

“Pi gwo pwoblèm nan sèke pa gen lapè pou n kenbe.” — Dennis Jett, ansyen anbasadè ameriken.

Men, Wayòm Bondye a se yon fòs pou lapè toutbon paske li ede moun retire lahèn nan kè yo. Pa egzanp, lè Jezi te sou tè a, li te anseye disip li yo pou yo fè lapè e pou yo demontre lanmou pou lòt moun, li te fè sa ni nan sa l te di ni nan sa l te fè.

Jezi te di tou moun Wayòm Bondye a ap dirije yo t ap gen lanmou youn pou lòt e se sa k t ap moun rekonèt yo. Bib la fè konnen aklè Wayòm Bondye pap tolere moun ki rayi lòt moun:

Se Jewova Dye ki te kreye diferan ras moun, donk li konnen pi bon e sèl fason pou gen lapè sou tè a. Wayòm li an pral fè sa lèzòm ak fòs pou kenbe lapè yo pa rive fè.