Gè k ap fèt nan Mwayenn oryan an — Sa Bib la di?

Moun toupatou nan monn nan ap enkyete lè y ap suiv gè ki genyen ant Etazini, Izrayèl ak Iran an. Èske sitiyasyon an ap debouche sou yon pi gwo gè? Èske gouvènman yo ka anpeche sa fèt epi pou yo mete bonjan lapè?

Moun ki konn kèk bagay sou pwofesi ki nan Bib la ka ap mande tèt yo èske gè sa a k ap fèt nan Mwayenn oryan an se pa li menm k ap mennen nan batay Amagedon liv Revelasyon an pale de li a.

Ki sa Bib la di?

Èske gouvènman yo ap rive mete yon fen nan gè k ap fèt nan Mwayenn oryan an?

Bib la di: “Pinga nou mete konfyans nou nan chèf yo ni nan okenn lòt moun, paske yo pa ka bay delivrans.” — Sòm 146:3.

Nou pa konnen si gouvènman yo ap kapab rive fè sitiyasyon nan zòn sa a vin yon ti jan pezib. Men, Bib la di aklè pa gen okenn lidè politik, okenn gouvènman lèzòm oswa gwoup moun ki kapab mete fen nan lagè epi fè gen bonjan lapè pou toutan. Se sèl Bondye ki kapab “fè pa gen lagè ankò sou tout kò tè a”. — Sòm 46:9.

• Pou w aprann plis, li Toudegad ki gen tit “Pap gen lagè ankò — Ki jan?”

Èske lagè k ap fèt nan Mwayenn oryan an se yon pwofesi k ap reyalize?

Bib la di: “Nou pral tande bri lagè k ap fèt ak nouvèl sou lagè. […] Nasyon pral leve kont nasyon, e wayòm pral leve kont wayòm.” — Matye 24:6, 7.

Gè k ap fèt nan Mwayenn oryan kounye a se yon lòt prèv n ap viv nan “fen sistèm nan”, yon epòk Bib la rele tou “dènye jou yo”. (Matye 24:3; 2 Timote 3:1.) Gè k ap fèt jodi yo montre talè konsa Bondye pral mete fen nan lagè ak lòt pwoblèm ki lakòz lèzòm soufri.

• Pou w aprann plis, li atik “Ki sa ki siy ‘dènye jou yo’ oswa ‘tan lafen an’?”

Èske Amagedon ap kòmanse nan Mwayenn oryan?

Bib la di: “Yo rasanble wa yo nan yon zòn yo rele ann ebre: Amagedon.” — Revelasyon 16:16.

Gè Amagedon an se pa yon gè ki pral fèt ant gouvènman lèzòm yo e k ap kòmanse nan Mwayenn oryan. Se yon gè ki pral fèt sou tout tè a ant Bondye ak tout gouvènman lèzòm yo.

• Pou w aprann plis, li atik “Ki sa lagè Amagedon an ye?”

Ki sa k ap ede n rete kalm nan moman difisil yo?

Bib la di: “Pa enkyete nou pou anyen, men fè Bondye konnen demann nou yo nan tout bagay, pa mwayen lapriyè ak siplikasyon toutpandan n ap di l mèsi.” — Filipyen 4:6.

Jewovaa Dye vle pou nou priye l. Paske Bondye gen sousi pou nou, l ap koute priyè nou yo e l ap ede nou fè fas ak sa k ap enkyete nou yo (1 Pyè 5:7). Youn nan fason li fè sa se lè l ede nou konprann rezon ki fè gen lagè ak fason lagè pral fini. Li fè nou konnen tou, sa l pral fè pou n pa soufri ankò. — Revelasyon 21:3, 4.

• Pou w aprann plis sou fason Bondye ede nou, li atik “Èske m ka jwenn pawòl pou konsole m nan Bib la?”