SIJÈ SOU PAJ KOUVÈTI A
Laverite sou Alowin
Èske yo fete Alowin kote w ap viv la? Alowin se yon fèt ki popilè Ozetazini ak Kanada e yo selebre l chak 31 oktòb. Men, nou jwenn koutim ki gen rapò ak Alowin anpil lòt kote sou tè a. Gen kèk lòt kote yo selebre yon seri fèt ki gen lòt non men, yo ale nan menm sans ak fèt Alowin nan paske yo tout gen rapò ak espri, sa gen ladan l espri mò, sòsyè, e menm dyab la ak demon yo. — Gade kare: “Fèt toupatou sou tè a ki sanble ak Alowin.”
OU MENM, ou ka pa kwè nan espri. Ou ka annik konsidere Alowin ak lòt fèt sa yo kòm yon fason pou w amize w e pou w aprann pitit ou fason pou yo fè imajinasyon yo travay. Men, pou rezon ki annapre yo, gen anpil moun ki konsidere fèt sa yo kòm fèt ki danjere:
Gen yon ansiklopedi (Encyclopedia of American Folklore) ki fè konnen: “Objektif Alowin se fè moun gen kontak ak espri, e anpil nan espri sa yo fè moun yo menas oswa yo fè yo pè.” (Gade kare: “Istwa Alowin”) Menm jan an tou, gen anpil fèt ki tankou Alowin ki soti nan relijyon payen e ki baze sou adorasyon zansèt. Menm jounen jodi a, moun tout kote sou tè a pwofite jou sa yo pou yo pran kontak swadizan ak espri moun pa yo ki mouri.
Byenke anpil moun konsidere Alowin kòm yon fèt ameriken, chak ane, gen plis moun nan diferan peyi ki fete l. Men, anpil nan moun sa yo ki fèk ap fete fèt la pa konnen senbòl, dekorasyon ak koutim Alowin yo soti nan relijyon payen e pifò ladan yo gen rapò ak movèzespri. — Gade kare: “Kote l soti?”
Gen plizyè milye moun nan relijyon yo rele Wika a, yon relijyon ki suiv menm pratik Sèltik ansyen yo, ki toujou rele Alowin nan ansyen non yo te genyen an ki se Samen e yo konsidere l kòm nuit ki pi sakre nan ane a. Gen yon jounal (USA Today) ki te site pawòl yon moun tout moun konnen kòm sòsyè. Men sa l di: “Kretyen yo ‘pa konnen sa, men an reyalite yo fete fèt nou an avèk nou. Nou renmen sa.’”
Fèt tankou Alowin depaman ak sa Bib la anseye. Men pinga Bib la bay: “Piga gen pesonn nan mitan nou k’ap fè divinò, k’ap etidye zetwal nan syèl la pou konnen sa ki gen pou rive, k’ap pran pwen, k’ap fè maji. Piga gen nan mitan nou moun k’ap sèvi ak cham, moun ki pral nan tab tounant, k’ap vizite moun ki konn tire kat, ak moun k’ap rele mò pou pale ak yo.” — Detewonòm 18:10, 11, Bib la; gade tou Levitik 19:31; Galat 5:19-21.
Dapre sa nou sot di la yo, li bon pou w konnen Alowin ak lòt fèt ki menm jan avè l yo soti nan relijyon payen. Lè w byen konprann sa, menm jan ak anpil lòt moun, ou ka chwazi pa fete fèt sa yo.
“Kretyen yo ‘pa konnen sa, men an reyalite yo fete fèt nou an avèk nou. Nou renmen sa.’” — Yon jounal ameriken (USA Today), ki site pawòl yon moun tout moun konnen kòm sòsyè.
a Mo Alowin nan se yon kontraksyon yon ekspresyon anglè, All Hallow even, ki vle di sware tout sen yo e se lavèy jou Latousen.