Chèche konnen laverite

Pwoblèm nan

Souvan, prejije baze sou move enfòmasyon. Ann gade egzanp ki vin apre yo:

• Gen kèk patwon ki fè erè lè yo kwè medam yo pa kalifye pou fè travay syantifik oubyen travay teknik.

• Ann Ewòp, nan epòk Mwayennaj la, yo te akize Juif yo e yo te fè konnen yo te anpwazonnen pi yo e yo t ap gaye maladi. Pandan rejim Nazi an, yo te lage vèni sou Juif yo ankò. Men fwa sa a, yo te di se yo ki lakoz kriz ekonomik la ann Almay. Nan toude ka sa yo, Juif yo te viktim gwo prejije, gen kèk nan prejije sa yo ki toujou la jodi a.

• Anpil moun mal panse lè yo kwè tout moun ki gen yon andikap fizik se yon moun ki tris oubyen ki fristre.

Anpil moun ki kwè nan manti sa yo kapab ap chèche egzanp oswa prèv ki pa chita sou anyen pou kore prejije yo genyen. E yo panse nenpòt moun ki pa dakò avèk yo se yon moun sòt.

Prensip Bib la bay

“Li pa bon pou yon moun pa gen konesans.” — PWOVÈB 19:2.

Sa sa vle di? Lè nou pa konn laverite sou yon bagay, nou pran move desizyon. Si n kwè nan manti olye n kwè nan sa ki verite, nou pral mal jije moun yo.

Poukisa l itil pou n konnen laverite sou lòt moun?

Si n konnen laverite sou lòt moun, petèt nou pap kouri kwè move bagay y ap di sou yo. Yonfwa nou aprann yo pa t di nou laverite konsènan yon gwoup moun an patikilye, nou ka pa kouri kwè sa nou tande konsènan yon lòt gwoup moun.

Men sa w ka fè

• Sonje sa, se pa tout sa yo di sou yon gwoup moun ki pou chak moun nan gwoup sa a.

• Rekonèt ou ka pa gen ase enfòmasyon sou yon gwoup moun.

• Eseye chèche laverite nan sous ou ka fè konfyans.