Yon sòlda ak yon tifi

Te gen yon tifi izrayelit nan peyi Siri ki te lwen lakay li. Se lame peyi Siri a ki te pran l e kounye a, li se yon sèvant lakay madan Naaman, yon chèf nan lame Siri a. Tifi a te konn adore Jewova, malgre moun ki te bò kote l yo pa t konn fè sa.

Naaman te gen yon vye maladi sou po l, e l te toujou ap soufri. Tifi a te vle ede l toutbon. Li te di madan Naaman: ‘Mwen konnen yon moun ki ka ede mari w. Ann Izrayèl, gen yon pwofèt Jewova ki rele Elize. Li kapab geri mari w.’

Madan Naaman te di Naaman sa tifi a te di l la. Naaman te vle eseye tout sa yo di l. Se sa k fè l t al ann Izrayèl, lakay Elize. Naaman te panse Elize t apral byen resevwa l kòm yon moun ki enpòtan. Men, olye Elize te soti al pale ak Naaman, li te voye sèvitè l la al salye Naaman, epi ba l yon mesaj ki di: ‘Al nan Rivyè Jouden an, benyen ladan l sèt fwa. Apre sa, w ap geri.’

Naaman pa t kontan ditou. Li di: ‘Mwen te panse pwofèt sa a t ap rele Bondye l la e l t ap balanse men l sou mwen pou l geri m. Olye de sa, li voye m al nan yon rivyè ann Izrayèl. Nou gen pi bon rivyè nan peyi Siri! Poukisa m pa annik al lòtbò a?’ Naaman te fache anpil, epi l kite kay Elize.

Sèvitè Naaman yo te pale ak Naaman. Yo di l: ‘Èske w pa t ap fè nenpòt bagay pou w geri? Sa pwofèt la di w fè a tou senp, poukisa w pa annik fè sa l di a?’ Naaman te koute yo. L al nan Rivyè Jouden an e l plonje sèt fwa nan dlo a. Sou setyèm fwa a, Naaman sot nan rivyè a tou geri. Li te kontan anpil, e l te retounen al di Elize mèsi. Naaman di: ‘Kounye a, mwen konnen se Jewova ki vrè Dye a.’ Ki jan w panse tifi izrayelit la te santi l lè l wè Naaman retounen tou geri?