Entwodiksyon pou seksyon 9

Nan seksyon sa a, nou pral aprann ki jan kèk moun ki te jèn, kèk pwofèt ak kèk wa te montre yo gen yon gwo lafwa nan Jewova. Te gen yon tifi izrayelit nan peyi Siri ki te kwè pwofèt Jewova a te kapab geri Naaman. Pwofèt Elize te gen konfyans total Jewova t ap pwoteje l kont yon lame ènmi. Jewoyada, yon gran prèt, te riske lavi l pou l pwoteje ti Jewowas pou Atali, granmè l ki te mechan, pa touye l. Wa Ezekyas te gen konfyans Jewova t ap delivre Jerizalèm. Se sa k fè, li pa t kite menas moun peyi Asiri yo fè l fè bak. Wa Jozyas te elimine idolatri nan peyi a, li te fè reparasyon nan tanp lan e l te fè nasyon an retounen nan vrè adorasyon an.