Yon teni ki byen ranje montre nou gen respè pou Bondye
1. Ki jan nou ka montre nou gen Jewova rekonesans pou kongrè distri li envite nou an ?
1 Talè konsa nou pral asiste kongrè distri pou ane sèvis 2003 a ki gen tèm “ Bay Bondye glwa ”. Annefè, se yon gwo privilèj nou genyen pou nou jwenn yon envitasyon konsa nan men Jewova pou n al nan gwo festen espirityèl sa a. Èske nou pa gen Jewova rekonesans pou sa ? Nou ka demontre respè nou gen pou li ak rekonesans nou gen pou dispozisyon espirityèl li pran yo nan abiman nou ak nan aparans nou. — Sòm 116:12, 17.
2. Sa k fè li enpòtan pou nou pwòp e pou nou byen prezante ?
2 Yon teni ki pwòp e ki byen ranje : Jewova se yon Bondye ki pwòp e ki gen lòd, sa fè nou dwe gen yon prezantasyon ki ann amoni avèk prensip li yo (1 Kor. 14:33 ; 2 Kor. 7:1). Kò nou, cheve nou, zong nou dwe pwòp. Nou dwe toujou byen prezante. Sèjousi, gen anpil moun ki gen teni debraye. Sepandan, se pa paske gen vedèt sinema oubyen gran jwè ki gen teni lage ki fè yon kretyen dwe abiye konsa tou. Si n ap suiv mòd, l ap difisil pou moun yo wè diferans ki genyen ant moun k ap sèvi vrè Bondye a ak moun ki pap sèvi l yo. — Mal. 3:18.
3. Ki jan nou ka asire nou teni nou ann amoni avèk 1 Timote 2:9, 10 ?
3 Yon teni ki konvnab pou yon kretyen : Nan yon lèt apot Pòl te ekri Timote, ki te yon siveyan kretyen, li te ankouraje ‘ medam yo pou yo fè bèbèl ak tèt yo nan yon teni ki byen ranje, ak modesti e ak bonsans [...] yon fason ki ale ak medam ki di yo gen respè pou Bondye, sa vle di grasa bèl travay yo fè ’. (1 Tim. 2:9, 10.) Pou nou ka asire nou rad nou met sou nou byen kòrèk, sa mande pou nou byen chwazi yo. Yo dwe byen ranje, yo dwe pwòp, yo dwe modès. Yo pa ta dwe rad ki atire atansyon sou kò nou. — 1 Pyè 3:3.
4, 5. Ki prekosyon kretyen yo dwe pran ?
4 Pòl te di tou medam yo ta dwe pran prekosyon pou yo pa tonbe nan ekstrèm pou sa ki gen rapò ak ‘ trese cheve, mete lò oubyen pèl ak rad ki koute chè ’. (1 Tim. 2:9.) Kretyèn yo ap montre yo gen sajès si yo gen ekilib nan fason y ap met bijou sou yo, nan fason y ap makiye ak lòt bèbèl y ap fè ak tèt yo. — Pwo. 11:2.
5 Konsèy Pòl te bay la pa konsène sè yo sèlman, men li konsène frè yo tou. Frè yo dwe evite mòd ki reflete tandans monn nan (1 Jan 2:16). Pa egzanp, gen peyi kote li alamòd pou moun mete rad k ap vale yo. Men, yon mòd konsa pa ale ak aparans yon minis Bondye dwe genyen.
6. Poukisa nou dwe fè efò pou nou kenbe yon wo nivo nan teni nou lè n ap vwayaje pou n al nan kongrè ak pou n sot nan kongrè, lè nou nan kongrè a ak lè sesyon yo fini ?
6 Lè n ap pran yon ti detant : Lè frè ak sè yo ap asiste kongrè, pifò ladan yo bay bon egzanp nan fason yo abiye ak nan aparans yo. Sepandan, gen rapò ki montre gen nan frè ak sè yo ki twò rilaks lè y ap vwayaje pou y al nan kongrè ak pou yo sot nan kongrè lè y ap pran yon ti detant apre kongrè a. An reyalite, teni nou, kit se pandan kongrè a ap dewoule kit se apre, enfliyanse opinyon moun yo ap genyen sou pèp Bondye a. Piske nou mete ensiy kongrè a sou nou, antanke minis kretyen, nou dwe toujou abiye yon fason ki konvnab. Souvan, sa konn fè moun konplimante nou e sa konn tou bay okazyon pou nou bay mesaj la. — 1 Kor. 10:31-33.
7. Si nou gen yon teni ki byen ranje ak yon aparans ki konvnab, ki efè sa ka fè sou lòt moun ?
7 Menm jan yon bèl ti souri fè figi yon moun briye, se menm jan an tou yon teni ki byen ranje ak yon aparans ki konvnab bay mesaj n ap preche a ak òganizasyon nou reprezante a plis diyite. Gen moun ki pral gade nou nan peryòd kongrè distri ane sa a, kongrè ki gen tèm “ Bay Bondye glwa ” a. Gen ladan yo ki ka chèche konnen poukisa nou diferan e yo ka rive menm di : “ Nou vle ale ansanm avèk nou, paske nou te tande yo di [e nou te wè] Bondye ansanm avèk nou. ” (Zek. 8:23). Se pou nou tout montre respè nou gen pou Jewova nan abiman nou ak nan aparans n ap bay.
[Kare nan paj 5]
Se pou nou gen yon aparans ki diy
▪ Lè n ap vwayaje.
▪ Pandan nou nan kongrè a.
▪ Lè n ap pran yon ti detant.