Repons kesyon w yo

◼ Èske li bon pou nou mete adrès e-mail nou sou piblikasyon n ap ofri yo ?

Gen kèk pwoklamatè ki enprime adrès e-mail yo sou etikèt epi yo kole l sou peryodik oswa sou depliyan yo bay nan predikasyon. Konsa, moun ki aksepte piblikasyon sa yo kapab kontakte yo pou yo mande yo lòt enfòmasyon. Pwoklamatè ki pran inisyativ sa a, se nan bon entansyon yo fè l. Sepandan, nan dènye paj peryodik yo e nan fen depliyan yo, nou deja bay adrès sit wèb ofisyèl òganizasyon an. Donk, li pi bon si nou pa mete adrès e-mail pa nou sou piblikasyon yo.

Si yon pwoklamatè bay moun ki nan tèritwa a enfòmasyon li ekri sou yon fèy papye, enfòmasyon k ap pèmèt moun yo kontakte l, sitou lè l pral fè nouvèl vizit, sa se yon desizyon pèsonèl. Se nou ki dwe pran inisyativ pou nou retounen vizite moun ki enterese yo olye nou annik kite pou se moun yo ki kontakte nou pou yo kapab jwenn lòt enfòmasyon. Lè nou pale ak moun yo fasafas, li pi fasil pou nou demontre enterè sensè nou genyen pou yo.