Soti 20 oktòb pou rive 16 novanm nou pral fè yon kanpay espesyal pou nou distribye yon feyè !
1 Soti lendi 20 oktòb, e pandan kat semèn okonplè, nou pral patisipe nan yon kanpay espesyal pou nou distribye yon nouvo feyè ki rele Èske w ta renmen konn verite a ? Nou espere kanpay sa a ki pral fèt sou tout tè a pral fè plis moun enterese nan sèl sous verite a. — Jan 17:17.
2 Feyè sa a bay repons ki soti nan Bib la, repons tou kout, pou sis kesyon enpòtan : “ Èske Bondye sousye de nou toutbonvre ? ” “ Èske lagè ak soufrans ap janm fini ? ” “ Ki sa k rive apre nou fin mouri ? ”, “ Èske gen yon espwa pou moun ki mouri yo ? ” “ Ki jan pou m priye pou Bondye tande m ? ” “ Ki sa m ka fè pou m viv ak kè kontan ? ” Legliz lakretyente yo pa janm bay repons ki satisfezan pou kesyon sa yo. Menm moun ki pa kretyen konn poze tèt yo kesyon sou sijè sa yo. Men, yo ka pa konnen si Bib la bay repons klè pou kesyon sa yo. Se sa k fè mesaj ki nan feyè sa a ka enterese anpil moun.
3 Kouvri tèritwa a : Fè tout sa nou kapab pou nou kouvri tout tèritwa kongregasyon an si sa posib. Si tèritwa nou an gran anpil, ansyen yo ka ankouraje nou kite feyè a nan kay kote moun yo pa la depi premye fwa nou pase nan kay sa yo. Li ta bon pou nou sonje bay kèk moun feyè a tankou vwazen nou, fanmi nou, moun nan travay nou, oswa moun nan lekòl nou, ak moun nou abitye pale. Petèt nou ka aranje nou pou nou pran sèvis pyonye oksilyè pandan mwa oktòb la ak mwa novanm nan. Èske nou gen yon pitit nou oswa yon etidyan nou k ap fè bonjan pwogrè nan domèn espirityèl e ki kalifye pou l patisipe nan kanpay sa a avèk nou antanke pwoklamatè ki poko batize ? Si repons lan se wi, nou ka fè ansyen yo konn sa.
4 Ki sa nou ka di ? : Pou nou ka rive atenn plis moun ak mesaj ki nan feyè a, l ap pi bon pou nou fè yon prezantasyon ki kout. Nou ka annik poze moun nou rankontre a youn nan sis kesyon ki nan kòmansman feyè a epi nou ka montre l ki kote l ap jwenn repons lan nan feyè a. Metòd sa a ap pèmèt tout pwoklamatè yo adapte prezantasyon yo selon bezwen moun nan tèritwa a. Si yon moun montre li enterese, pran nòt sou sa epi retounen al vizite l. Nan wikenn yo nou ka ofri peryodik yo ansanm ak feyè a. Lè kanpay la fini 16 novanm, n ap ofri liv Sa Labib anseye a. Si gen rès feyè ki rete n ap ofri yo menm jan nou abitye ofri lòt feyè yo.
5 Kòmanse etid biblik : Yo fè feyè sa a espesyalman pou ede nou kòmanse etid biblik. Lè nou retounen vizite yon moun ki te montre li enterese, nou ka mande l ki verite biblik ki te rekonfòte l oswa ki te soulaje l ? Atire atansyon moun nan sou dènye paj feyè a kote yo pale sou dispozisyon pou nou etidye Labib ak moun yo epi bay moun nan yon liv Sa Labib anseye. Si sa posib egzamine youn oubyen de paragraf nan chapit ki bay plis enfòmasyon sou sijè li chwazi a.
6 Jewova ap chèche moun k ap vin adore l “ avèk lespri e laverite ”. (Jan 4:23.) Nou swete pou nou tout patisipe nan kanpay espesyal sa a, dekwa pou nou ede moun yo konn verite a !