Nou pral distribye fich envitasyon Memoryal la sou tout tè a!
1. Ki kanpay espesyal nou pral fè sou tout tè a avan jou Memoryal la rive?
1 “Kontinye fè sa pou nou montre nou sonje m.” (Lik 22:19). Sèvitè Jewova yo ak moun ki enterese yo pral reyini ansanm jou k ap 30 mas 2010 la pou yo selebre Memoryal lanmò Jezi Kris, konsa y ap montre yo obeyi kòmandman Jezi te bay la. Soti 13 mas pou rive 30 mas, nou pral distribye fich envitasyon Memoryal la sou tout tè a.
2. Ki fason nou ka ofri fich envitasyon an?
2 Fason pou nou ofri fich envitasyon Memoryal la: Nou ka lonje fich envitasyon an bay moun nou rankontre a yon fason pou l ka wè foto ki sou li a, apre sa n ap di moun nan: “Jou 30 mas la apre solèy la fin kouche, toupatou sou tè a, gen plizyè milyon moun ki pral reyini pou yo komemore lanmò Jezi Kris. Mwen pote fich envitasyon sa a pou ou menm ak fanmi w pou nou ka vin asiste Memoryal la ansanm ak nou. Ou ka vini ak zanmi w yo tou, n ap byen kontan akeyi yo. Memoryal la ap fèt [di moun nan ki kote Memoryal la ap fèt e a ki lè].” Selon sikonstans lan, nou ka chwazi li Lik 22:19 ak moun nan nan Bib la pou nou ka atire atansyon l sou fondman biblik kòmandman an. Sepandan, nou bezwen sonje tan nou genyen pou nou kouvri tèritwa a limite, li pi bon si nou pa pran anpil tan.
3. Kiyès nou ka envite nan Memoryal la?
3 Si kongregasyon nou an gen anpil tèritwa, ansyen yo ka mande nou pou nou kite fich envitasyon yo nan kay kote nou pa jwenn moun yo depi premye fwa nou pase a. Lè sa apwopriye, nou ka ofri moun yo peryodik ansanm avèk fich envitasyon an. Asire nou nou envite moun nou retounen vizite yo, etidyan nou yo, kòlèg travay nou, kamarad lekòl nou, fanmi nou, vwazin nou yo, ak lòt moun nou konnen.
4. Rekonesans nou gen anvè Jewova pou lanmou li demontre lè li te bay ranson an ap pouse nou fè ki sa?
4 Prepare nou pou nou patisipe afon nan kanpay la: Epòk Memoryal la se yon bon okazyon pou nou ogmante aktivite nou nan ministè a. Èske w ka ranje pwogram ou pou w pran sèvis pyonye oksilyè? Èske w gen pitit oubyen èske w gen etidyan k ap fè bon pwogrè espirityèlman? Si repons lan se wi, pale ak ansyen yo pou yo ka wè si nouvo sa yo kalifye pou yo patisipe nan konpay espesyal la antanke pwoklamatè ki poko batize. Rekonesans nou genyen anvè Jewova pou lanmou li demontre lè li te bay ranson an ap pouse nou fè tout sa nou kapab nonsèlman pou nou la nan Memoryal la men tou pou nou envite plis moun posib pou yo vin asiste Memoryal la ansanm ak nou. —Jan 3:16.