Èske w ap kòmanse yon etid biblik pandan mwa oktòb la?
1. Ki òf nou gen pou mwa oktòb la?
1 Òf nou gen pou mwa oktòb la se peryodik yo, Toudegad ak Réveillez-vous! Pou n ka pousuiv enterè moun yo demontre, yo ankouraje nou pou n ofri yo feyè ki gen tit: Èske w ta renmen konn Verite a?, epi fè efò pou n kòmanse etid biblik avèk yo. Kòman nou ka fè sa lè n retounen vizite moun yo?
2. Kòman nou ka itilize feyè Konn Verite a pou n kòmanse yon etid biblik lè n ap vizite yon moun ki te aksepte peryodik yo?
2 Fason pou nou itilize feyè a: Men sa nou ka di: “Peryodik mwen te kite pou ou yo ankouraje tout kalite moun ak moun ki nan divès relijyon pou yo egzamine Bib la. [Bay moun nan feyè Konn Verite a epi montre l divès kesyon yo poze nan premye paj la.] Nan feyè sa a, nou jwenn kèk kesyon ki vrèman enteresan. Bib la bay repons kesyon sa yo, e se repons ki bay satisfaksyon. Èske w janm poze tèt ou youn nan kesyon sa yo?” Apre moun nan fin reponn, egzamine repons youn nan kesyon li te chwazi yo ansanm ak li nan feyè a, epi li youn nan vèsè yo bay kòm referans yo. Ansuit, esplike l sa ki nan feyè sa a se yon ti avangou sou sa Bib la anseye, apre sa, ba l liv Sa Labib anseye a. Nou ka egzamine avè l kèk paragraf ki nan kòmansman chapit li te chwazi nan lis sijè yo. Oubyen, nou ka chwazi al nan chapit ki bay plis enfòmasyon sou sijè nou te egzamine nan feyè a. Men kèk referans nou ka itilize:
● Èske Bondye sousye de nou toutbonvre? (p. 10-11 § 6-10)
● Èske lagè ak soufrans ap janm fini? (p. 12 § 12-13)
● Ki sa k rive apre nou fin mouri? (p. 59-60 § 7-8)
● Èske gen yon espwa pou moun ki mouri yo? (p. 71 § 13-15)
● Ki jan pou m priye pou Bondye tande m? (p. 166-167 § 5-8)
● Ki sa m ka fè pou m viv ak kè kontan? (p. 9 § 4-5)
3. Selon sitiyasyon an, kòman nou ka varye sa nou prevwa fè ak yon moun nan yon nouvèl vizit?
3 Yon lòt bò, si sitiyasyon an pa pèmèt nou montre moun nan fason nou fè etid biblik nan liv Sa Labib anseye a e pou nou tou kòmanse yon etid ak li nan premye vizit la, nou ka toujou pran yon lòt randevou pou n retounen pou n ka kontinye konvèsasyon an avè l. Anplis de sa, selon enterè moun nan demontre, nou ka menm chwazi egzamine plizyè lòt kesyon nan feyè a ansanm ak li pandan plizyè vizit anvan nou ofri l liv la. Nou swete pou nou byen sèvi ak feyè sa a pandan mwa oktòb la, yon feyè k ap ede nou kòmanse etid biblik ak moun yo e k ap ede moun ki sensè yo “konnen laverite”. —Jan 8:31, 32.