**Chèche vin pi maton nan travay predikasyon an: Sèvi ak liv Sa Labib anseye a pou n montre fason nou fè yon etid biblik**

Rezon ki fè sa enpòtan: Anpil moun gendwa pa konprann sa nou vle di lè n di yo nou ofri yo yon etid biblik gratis lakay yo. Yo ka panse pou yo fè etid la yo dwe fè pati yon gwoup oswa yo dwe pran yon kou pa korespondans. Olye nou jis ofri yo yon etid, poukisa nou pa montre yo fason nou fè yon etid? Menmsi se nan papòt kay la, nan sèlman kèk minit, nou ka montre moun nan jan sa fasil pou l etidye Labib e jan se yon bèl eksperyans sa ye.

Fason pou nou fè l:

Apre w fin fè konesans ak moun nan, mande l si l ta renmen konnen sa demen sere pou nou.
Fè moun nan konnen gen anpil moun ki ta renmen konn sa tou, epi montre l lis sijè ki nan liv Sa Labib anseye a. Esplike moun nan liv sa a gen yon pakèt leson ki fasil pou moun konprann ki montre sa Bib la anseye sou lavni e li pale sou yon pakèt lòt sijè ankò. Apre sa, mande moun nan ki chapit ki enterese l.
Bay moun nan yon liv, epi ale nan chapit li chwazi a. Fè l konnen yo reponn kesyon ki nan kòmansman chapit la nan paragraf ki vin apre yo.
Mande moun nan pou l li premye paragraf la si l santi l alèz pou l fè sa. Apre sa, li kesyon yo poze pou paragraf la epi egzamine repons lan avè l. Chèche vèsè yo bay kòm referans ki soutni repons lan, epi pale sou yo ak moun nan. Montre l fason ou souliye repons lan nan liv ou a.
Egzamine paragraf ki vin apre a, men fwa sa a, mande moun nan pou l eseye reponn kesyon an ak mo pa l.
Felisite moun nan, epi pran randevou pou w tounen vin fè rès chapit la avè l.
Si sa apwopriye, atire atansyon moun nan sou videyo Ki jan yo fè yon etid biblik? ki sou jw.org/ht a.

Eseye sa a pandan mwa a:

Priye Jewova pou l beni efò w fè pou w kòmanse yon etid biblik. — Flp. 2:13.
Pandan w ap patisipe nan ministè a, sèvi ak liv Sa Labib anseye a oubyen ak videyo Ki jan yo fè yon etid biblik? la pou w montre omwen yon moun fason nou fè yon etid biblik.