Lagè pote kalamite
Lè yon moun ap fè fas ak lagè se pi move bagay ki te ka rive nan lavi l. Sòlda ak sivil toupatou sou tè a ki fè fas ak lagè konnen tout soufrans sa pote.
SÒLDA
“Ou pa sispann wè moun yo touye oswa ki blese grav toutotou w. Ou pa janm santi w an sekirite.” — Gary, Grann Bretay.
“Mwen te pran bal nan do ak nan figi, e m te wè anpil moun yo touye, sa gen ladan l timoun ak granmoun. Lagè fè w vin gen kè di.” — Wilmar, Kolonbi.
“Lè yo tire yon moun devan w, ou pa janm bliye sa. Ou kontinye tande moun nan k ap kriye e k ap plenn. Ou pap janm bliye moun nan, jamè.” — Zafirah, Etazini.
SIVIL
“Mwen te panse mwen pa t ap janm gen kè kontan ankò. Ou pè pou w pa pèdi lavi w, men sa k pi rèd la, ou pè pou fanmi w ak zanmi w pa pèdi lavi yo.” — Oleksandra, Ikrèn.
“Sa rèd anpil pou w kanpe nan yon liy ap tann manje soti dezè dimaten rive onzè nan aswè, e w pa menm konnen si w pap pran yon bal mawon.” — Daler, Tajikistan.
“Yo te touye paran m yo nan lagè. Lagè fè m pa gen ni manman ni papa pou konsole m oswa pou pran swen m.” — Marie, Wannda.
Malgre tout kalamite lagè pote, moun nou site pi wo yo te rive jwenn lapè. Mete sou sa, yo gen konviksyon, talè konsa, pap gen lagè ak vyolans ankò. Nan nimewo Toudegad sa a, n ap sèvi ak Bib la pou n esplike ki jan sa pral fèt.