Chèche vin pi maton nan travay predikasyon an: Preche nan tèritwa ki gen biznis yo

Rezon ki fè sa enpòtan: Piske anpil moun fè plizyè èdtan ap travay, byen souvan, pi bon kote nou ka jwenn yo pou nou ba yo mesaj Wayòm nan se nan travay yo. Preche nan tèritwa ki gen biznis yo ka enteresan e sa ka bay bon rezilta, paske afè pou n pa jwenn moun lakay yo a pa egziste epi moun k ap travay nan biznis yo gen tandans pou yo janti ak moun yo konsidere kòm kliyan yo. Pou pwoklamatè yo jwenn bon rezilta yo bezwen sèvi ak bon jijman e yo dwe bay bon egzanp nan fason yo abiye ak nan aparans yo (2 Kor. 6:3). Se sa k fè siveyan sèvis la dwe verifye kiyès ki preche nan tèritwa ki gen biznis yo epi konbyen fwa yo preche nan zòn sa yo.

Fason pou nou fè l:

Prepare yon prezantasyon byen kout. Si nou pase twòp tan ap pale ak moun k ap travay la, nou gendwa pa gen posiblite pale avè l alavni.
Vizite biznis yo lè pa gen twòp aktivite tankou lè yo apèn ouvri.
Fè efò pou w pale ak moun ki responsab la an premye. Se pou nou janti e se pou n amikal. Ou ka di l: “Nou pase vizite moun ki nan travay yo pou yon ti tan paske li pa fasil pou nou jwenn yo lakay yo.” Fè yon prezantasyon ki tou kout epi ofri l yon feyè, peryodik yo oswa nenpòt lòt piblikasyon. Pou moun pa panse nou se moun k ap vann, byen souvan li pi bon pou nou pa mande ofrann, sof si moun nan mande nou kote nou jwenn kòb pou nou fè travay n ap fè a oubyen si l mande nou konbyen kòb pou l peye.
Si moun ki responsab la montre li amikal, mande l pèmisyon pou nou fè yon ti pale tou kout ak lòt moun k ap travay yo. Nan kèk travay, li ka bon pou nou mande si nou ka kite kèk piblikasyon kote anplwaye yo konn pran poz.
Sèvi ak bon jijman epi montre w fleksib. Pa egzanp, si yon anplwaye ap pale ak yon kliyan oubyen si l okipe, ret tann jiskaske l fin pale anvan w pwoche bò kote l.

Eseye sa a pandan mwa a:

Pandan pwochen sware adorasyon an fanmi an, fè yon prezantasyon tou kout nou ka itilize si n ap preche nan yon tèritwa ki gen biznis.