¿Janéy jaˈich abal tatáˈ an Tʼokat Dhutslab?
¿Neˈech ka uluw abal jaˈich . . .
... jun i dhutslab kʼal in chalapil an inik?
... jun i tʼilab xi yab tsubax?
... in Káwintal an Okʼoxláb?
XOWAˈ IN ULAL AN TʼOKAT DHUTSLAB
«Ejtal xowaˈ kʼwajat dhutsadh ban Tʼokat Dhutslab, a Dios in chalap.» (2 Timoteo 3:16, Nuevo Testamento Huasteco de Veracruz.)
JANTI TU TOLMIYAL KI CHOˈÓBNAˈ
Neˈech ki elaˈ i lej chalpadh tokʼtsixtaláb kʼal an konowixtaláb xi más exbadh ba ni xeˈchintal (Proverbios 2:1-5).
Neˈech ki koˈoy i alwaˈ tolmixtaláb abal ki choˈóbnaˈ janéy ki tʼajaˈ kʼitsáj ta kʼitsáj (Salmo 119:105).
Neˈech ki koˈoy i alwaˈ aytsixtaláb abal an kʼij xi taˈtál (Romanos 15:4).
¿I EJTOWAL KI BELAˈ XOWAˈ IN ULAL AN TʼOKAT DHUTSLAB?
Anchanˈ, waˈach óx i tsubaxtaláb:
Yab jaykʼij in jalkʼuyal xowaˈ in ulal. An Tʼokat Dhutslab, dhutsan kʼal 40 i iniktsik, tin nakel i 1,600 i tamub. An dhutsumtsik yab exláxin, por xowaˈ in ulal an Tʼokat Dhutslab yab u jalkʼunal, más alwaˈ, in kawnál jun tokot i tʼilab.
In dhutsaˈtsik xowaˈ tsubax. Kʼeˈet i dhutsumtsik in chinál xowaˈ yab in léˈ ka choˈóbná tin kwentaj in bitsówil. Por an iniktsik xin dhutsaˈ an Tʼokat Dhutslab, yab in chinaˈ nin ukˈpintal ni xowaˈ xi yab alwaˈ in tʼajaˈ nin bitsówil (2 Crónicas 36:15, 16; Salmo 51:1-4).
Xowaˈ in ulal echʼekʼij u tʼajnal. Kʼal 200 i tamub an Tʼokat Dhutslab okxin kin uluw janti neˈech ka kʼibedháj an wejéˈ bitsow ti Babilonia (Isaías 13:17-22). Yab tokot in uluw janti neˈechak ka kwajlan an bitsow, ani jeye in olnaˈ in bij jitajak neˈech kin ataˈ (Isaías 45:1-3).
Yan xowaˈ in ulúmal an Tʼokat Dhutslab abal neˈech ka tʼajan, tʼajnékich kidhat. ¿Yab xéˈ jaˈich xowaˈ i aytsal kʼal nin Káwintal an Okʼoxláb? (2 Pedro 1:21.)
KA KONOY TA BAˈ
¿Janti in ejtowal ti kin tolmiy in Káwintal an Okʼoxláb?
Neˈech ka elaˈ an tokʼtsixtaláb xi in pidhnál an Tʼokat Dhutslab ti ISAÍAS 48:17, 18 ani 2 TIMOTEO 3:16, 17.