¿Janéy jaˈich nin Takʼixtal an Okʼoxláb?

XOWAˈ IN ULAL AN TʼOKAT DHUTSLAB

«An Okʼoxláb xi kʼwajat tuwaˈ walkʼiˈ neˈech kin kʼwajbaˈ jun i takʼix xi yab jaykʼij neˈech ka wixkʼá.» (Daniel 2:44, Traducción del Nuevo Mundo.)

In Chakámil an Okʼoxláb «neˈech ka kʼwajbá kʼal na Dios ti Pulek Takʼix [...] ani nin takʼixtal yab jaykʼij neˈech kin koˈoy in okʼontal.» (Lucas 1:32, 33.)

JANTI TU TOLMIYAL KI CHOˈÓBNAˈ

• Neˈech ti takʼix alwaˈ ani neˈech tu tolmiy jun ani jun ti éb (Isaías 48:17, 18).

• Weˈich i kʼij u kʼibel abal kin tʼajaˈ ku kʼwajay kulbél ban ít chabál xonti yabich neˈech ku yawlách (Apokalipsis 21:3, 4).

¿I EJTOWAL KI BELAˈ XOWAˈ IN ULAL AN TʼOKAT DHUTSLAB?

Anchanʼ, waˈach cháb i tsubaxtaláb:

• Na Jesús in xalkʼaˈ xowaˈ neˈech kin tʼajaˈ nin Takʼixtal an Okʼoxláb. Jajáˈ in okʼtsi nin exóbaltsik abal kin konoy ban oláb ka tsích nin takʼixtal an Okʼoxláb, ani ka tʼajan techéˈ ti chabál xowaˈ in léˈ an Okʼoxláb (Mateo 6:9, 10). Ani jeye in olnaˈ janti neˈech ka tʼajan.

  Tam ti kʼwajay ti chabál, na Jesús in kʼapundhaˈ i atiklábtsik, in jeldhaˈ i yaˈultsik ani in witsbantsi tin xeˈchintal juntsik i atiklábtsik xi chemnekich (Mateo 15:29-38; Juan 11:38-44). Kom jajáˈ neˈech ti takʼix, jaxtám in ejto kin olnaˈ an alwaˈtalábtsik xi neˈech kin tʼajaˈ nin Takʼixtal an Okʼoxláb abal an atiklábtsik (Apokalipsis 11:15).

• Xowaˈ kʼwajat ti watʼel in xalkʼál abal kʼwajatich kʼunat nin Takʼixtal an Okʼoxláb. Na Jesús in uluw abal tam weˈich ka ulich nin Takʼixtal an Okʼoxláb, putálkʼi neˈech ka waˈchin i pejextaláb ani kʼaˈínab ani neˈech ka nikwin an chabál; ani tayíl jechéˈ, neˈech ka ulich an kʼijidhtaláb putálkʼi an chabál (Mateo 24:3, 7).

  Xóˈ ta kʼitsáj, exomich i chuˈtal ejtal jechéˈ i yajtsiktaláb. Jaxtám, i ejtowal ki belaˈ abal nin Takʼixtal an Okʼoxláb weˈich neˈech kin lejkiy.