AJUMTALÁB 58
Ki kʼwajay echʼekʼij lujat kʼal na Jehová
Nin tsubax aykólil na Kristo in léˈ kin tʼójontsi ani kin kʼakʼnaˈ na Jehová abal echʼekʼij ani yab in jiláltsik abal ni jun xataˈ kin tʼajaˈ abal ka ówmédhátsik kʼal jajáˈ. I belál abal tatáˈ teye a léˈ ka tʼójontsi na Jehová abal echʼekʼij ani jajáˈ u kulbél (ka ajay 1 Crónicas 28:9). ¿Por jantʼom kʼibataláb a ejtowal ka watʼnaˈ abal yab ki kʼwajay lujat kʼal na Jehová? ¿Ani janéy a ejtowal ka tʼajaˈ?
1. ¿Janéy in ejtowal kin tʼajaˈ xi kʼeˈettsik xi kin tʼajaˈ abal ki achʼaˈ tʼojláb ku kʼwajay lujat kʼal na Jehová?
Waˈach i atiklábtsik xi yab in léˈ abal ki tʼójontsi na Jehová. Jachanˈ i atiklábtsik jaˈich an apóstatas, jajáˈtsik in jilámal an tsubaxtaláb ani xoˈ in ulal in kʼambixtaláb tin kwentaj nin bitsówil na Jehová abal tu palmédhantsi ni belomtal. Ani jeye waˈach i okʼlek belomtsik xin ulal i kʼambixtaláb tin kwentaj an óltsixtsik kʼal a Jehová. Jaˈich lej kʼakʼadh ku tʼilmách kʼal i atiklábtsik xin atʼál nin bitsówil na Jehová, ani jeye yab alwaˈ ki ajay xowaˈ jajáˈtsik in ólnál nibal ki chuˈuw xowaˈ in kʼadhbál ti internet. Kʼal tin kwentaj an atiklábtsik xin léˈ kin tʼajaˈ abal ki jilaˈ ki tʼójontsi na Jehová, na Jesús in uluw: «Jilaˈ kʼwajat, pos in junwal i jokʼoltsik xi kʼwajat in lotʼokʼnál in at jokʼol. Ani max jun i jokʼol kin lotʼokʼnaˈ in at jokʼol, chablam ti éb neˈech ka kwajlan ban jól» (Mateo 15:14).
2. ¿Janéy koˈol ki tʼajaˈ abal ku kʼwajay lujat kʼal na Jehová?
Kom i kʼanidhál tʼajat na Jehová, yab i léˈ abal ni tʼojlábil o kʼeˈet xanéy ka kʼwajay junkudh kʼal an belomtalábtsik xi yab tsubax. Na Jehová in pidhámal jechéˈ i takʼixtaláb nin bitsówil: «Ki kaletsik ba jachanˈ an bitsow», an yejcheˈ bitsow Babilonia (Apokalipsis 18:2, 4).
ABAL KI EXÓBNAˈ MÁS
Ka exóbnaˈ janéy a ejtowal ka tʼajaˈ abal ki kʼwajay echʼekʼij lujat kʼal na Jehová. Ani ka chuˈuw jantʼó ti lej exbadh ki kale ban belomtalábtsik xi yab tsubax.
3.Ka koˈoy i kwentaj kʼal an kʼambixtsik
¿Janéy koˈol ki tʼajaˈ max ku tʼiltsin i atʼax tʼilab tin kwentaj nin bitsówil na Jehová? Ka ajaytsik Proverbios 14:15 ani ki tʼilmáchtsik kʼal tin kwentaj jechéˈ:
¿Jantʼó ti koˈol ki kóˈoy ti kwentaj ani yab ki belaˈ ejtal xowaˈ ku utsan?
Ka ajaytsik 2 Juan 9-11 ani ki tʼilmáchtsik kʼal tin kwentaj jechéˈ:
¿In tomnál ku tʼilmách kʼal an apóstatas?
Awich yab ku tʼilmách kʼal jun i apóstata; por, ¿janti in ejtowal tu jalkʼuntsi ni chalápil kʼal xowaˈ in ólnál?
Max ki tʼajaˈ ti kwentaj an atʼax tʼilab xu ulwáb tin kwentaj na Jehová ani nin bitsówil, ¿janti neˈech kin achʼaˈ jajáˈ?
4.Ki kʼwajay lujat kʼal na Jehová tam jun i kidhábláb ka walbin
Max i choˈób abal jun i kidhábláb ban junkuntaláb in tʼajámal jun i walastaláb, ¿janéy in tomnál ki tʼajaˈ? Ki exóbnaˈ jun i takʼixtaláb xi na Jehová in pidhaˈ an wejeˈ bitsow ti Israel. Ka ajaytsik Levítico 5:1.
Anchanˈ xanti in ólnál jechéˈ i pejats, max i choˈób abal jun i kidhábláb walbinék koˈol ki tʼiltsi an okʼnomtsik xowaˈ i choˈób. Por okʼox ki tʼajaˈ jechéˈ, yejat ki utsaˈ an atikláb xi walbinék abal jajáˈ koˈol ka kʼale ti tʼilom kʼal an okʼnomtsik. Por max yab kin tʼajaˈ wawáˈ tam neˈech ki utsaˈ, kom i léˈ ku kʼwajay lujat kʼal na Jehová. ¿Jantʼó ti belál abal max ki tʼajaˈ anchanˈ i xalkʼál abal i kʼanidhál ani i léˈ ku kʼwajay lujat...
... kʼal na Jehová?
... kʼal an kidhábláb xi walbinék?
... ani an junkuntaláb?
Max jun i kidhábláb in tʼajámal jun i walastaláb, ¡ka tolmiy!
5.Ki kale ban belomtalábtsik xi yab tsubax
Ka ajaytsik Lukas 4:8 ani Apokalipsis 18:4, 5, ani ka chuˈutsik jechéˈ i konowixtaláb:
¿Dhutsadh bélkʼi nu bij ba jun i belomtaláb xi yab tsubax?
¿In junkunal kʼal kʼeˈet i atiklábtsik xin tolmiyal jun i belomtaláb xi yab tsubax?
¿Xonti in tʼojnal in tolmiyal kʼeˈet i belomtalábtsik xi yab tsubax?
¿U yejentsal ku tʼajaˈ i jalkʼuxtalábtsik abal yabich kin kʼwajay kʼal an belomtalábtsik xi yab tsubax?
Max a tokʼoy abal «anchanáˈ», ¿jantʼom jalkʼuxtalábtsik koˈol ka tʼajaˈ?
Kʼal xowaˈ ka tʼajaˈ, ka tʼajaˈ ti kwentaj abal ki jilkʼon tsububudh a itsích ani ka xalkʼaˈ abal a kʼanidhál na Jehová.
¿Janéy neˈech ka tʼajaˈ max ki kontsin ti tolmixtaláb abal ka tolmiy jun i belomtaláb?
XOWAˈ JUNTSIK IN ULAL: «U yejentsal ku choˈóbnaˈ xowaˈ in ólnál an apóstatas abal ku ólnaˈ an tsubaxtaláb».
¿Jantʼó ti yab alwaˈ ka tʼajaˈ jechéˈ?
XOWAˈ I EXOBNÁMICH
Max i léˈ ki tʼójontsi na Jehová echʼekʼij ani ku kʼwajay lujat kʼal jajáˈ, yab koˈol ku junkun kʼal i atiklábtsik xi yab in kʼanidhál na Jehová.
Ki chalpay xowaˈ i exobnámal
¿Jantʼó ti yab alwaˈ ki achʼaˈ xowaˈ in ólnál an apóstatas?
¿Janéy koʼol ki tʼajaʼ tam ki choʼóbnaʼ abal jun i kidháb in tʼajámal jun i púlek walastaláb?
¿Janéy koˈol ki tʼajaˈ abal ku tʼaj kale ban belomtalábtsik xi yab tsubax?
KA EXLAˈ JUN XATAˈ MÁS
Ka chuˈuw janéy a ejtowal ka tʼajaˈ tam an atiklábtsik kin uluw i kʼambixtaláb tin kwentaj an óltsixtsik kʼal a Jehová.
«¿A exlál ejtal xowaˈ watʼenek?» (La Atalaya, agosto de 2018)
¿Janti a ejtowal ka exlaˈ max jun i tʼojláb in tolmiyal an belomtalábtsik xi yab tsubax?
¿Janéy in tʼajámal juntsik i atikláb xin pojkál an tsubaxtaláb abal tu palmédhantsi ti belomtal?
Ka chuˈuw ban biografía «Desde tin chipíl u léˈak ku exlaˈ an Okʼoxláb», janti jun i inik xu paleˈ wiˈik in jilaˈ an belomtaláb xi yab tsubax.