Trus Da “Judge Fo All Da Peopo Inside Da World” Who Give Plenny Chance!

1. Wat lesson Jehovah wen teach Abraham dat help all us?

ABRAHAM neva wen foget da time he wen talk story wit God thru one angel. God wen tell He was going wipe out Sodom an Gomorrah towns. Dat wen bodda Abraham plenny. He wen ask, “You goin wipe out da peopo dat stay do da right ting, togedda wit da peopo dat do da bad kine stuff, same time, o wat? . . . No can be! You da Judge fo all da peopo inside da world.” Jehovah was patient wen he had teach his fren Abraham one lesson dat help all us, God neva going wipe out da peopo dat wen do good kine stuff.​—Start 18:23-33.

2. How we know fo shua dat wen Jehovah judge peopo, he always give chance an do wat stay right?

² How we know fo shua dat wen Jehovah judge peopo, he always give chance an do wat stay right? Cuz we know dat Jehovah “look wat stay inside da peopo.” (1 Sam 16:7) In fact, he “know how all dem stay inside.” (1 Ki 8:39; 1 Rec 28:9) Dass unreal. Cuz Jehovah way moa smart den us, wen he judge, no way us guys going undastan eryting. Dass why da aposal Paul wen tell about Jehovah, “No mo nobody undastan how he make up his mind!”​—Rome 11:33.

3-4. Wat we tink about sometimes, an wat we going talk about in dis lesson? (John 5:28, 29, NWT)

³ Even tho we know Jehovah always do wat stay right, maybe we get questions jalike Abraham. Maybe we tink, “Da guys who wen get wipe out, like in Sodom an Gomorrah, dey get chance fo live again o wat? Dey going be part a “da guys dat no do wass right [who] goin come back alive from mahke”?”​—Jesus Guys 24:15.

⁴ We go ova wat we know so far about da mahke guys coming back alive. Not too long ago, we wen get one moa clear way fo undastan wat mean, “goin come back fo live one moa time fo real kine” an “goin come back fo be judged.”a (Read um John 5:28, 29, New World Translation.) Cuz dis stay moa clear now, how we undastan odda tings wen change. We going talk about um in dis lesson an da nex one. Wen come to how Jehovah judge da right way, firs we going talk about wat we donno, an den wat we know.

WAT WE DONNO

5. Wat we wen tell befoa time about da peopo Jehovah wen wipe out in Sodom an Gomorrah?

⁵ Befoa time, oua publications wen talk about wat going happen to da peopo Jehovah wen judge az da guys dat no do wass right. We used to tell dat da guys who wen get wipe out, like in Sodom an Gomorrah, no moa chance fo live again. But afta prayer an study, we no could say dat fo shua. How come?

6. Wat some exampos of how Jehovah wen judge da guys dat no do wass right, an wat we donno?

⁶ Try tink about dese odda questions. Get plenny Bible stories dat tell us about how Jehovah judge da guys dat no do wass right. Like, Jehovah wen wipe out erybody in da Flood except fo Noah an his ohana. O wen he had use da Israel peopo fo wipe out da seven nations a peopo who wen live in da Land Dey Was Going Take Ova. An he wen use one angel fo kill 185,000 army guys inside da Assyria camp in one night. (Start 7:23; Rules 7:1-3; Isa 37:36, 37) In dese stories, we know fo shua dat da Bible wen tell Jehovah had choose fo dem guys be dead foeva, an neva going come back alive? Not even. How come we can tell dat?

7. Wat we donno about da peopo who wen mahke in da Flood o da guys who da Israel peopo wen wipe out in Canaan? (Go look da picha.)

⁷ In da exampos we jus wen talk about, we donno how Jehovah wen judge each one a dose guys. An we donno if da guys who wen mahke had chance fo learn about Jehovah an feel sorry fo wat dey wen do. Wen da Bible talk about da time a da Flood, it tell Noah “was telling da peopo fo do da right ting.” (2 Pet 2:5) But it no tell dat wen Noah was building one big boat, he wen try preach to erybody on earth befoa dey get wipe out in da Flood. Same same, we donno if all da bad kine peopo who wen live in da land of Canaan had one chance fo learn about Jehovah an change da way dey ack.

8. Wat we donno about da peopo a Sodom an Gomorrah?

⁸ Wat about da peopo a Sodom an Gomorrah? One good man named Lot was living ova dea wit dem. Wat you tink, Lot wen preach to all dem? No. Even tho da peopo was real pilau, dey wen know wat was right an wrong? No look like. Try rememba wat da Bible tell about da gang dat wanted fo rape da guys staying wit Lot. (Start 19:4; 2 Pet 2:7) Da gang had “young guys an ol guys”. We know fo shua dat Jehovah wen choose fo no give dem chance an no going bring dem back to life? Jehovah wen tell Abraham neva even have ten guys who wen do wass right in dat town. (Start 18:32) Dose guys no was doing da right ting, so Jehovah wen wipe dem out. But dat mean none a dem going be part a “da guys dat no do wass right [who] goin come back alive from mahke”? No, we donno dat fo shua!

9. Wat we donno about Solomon?

⁹ On da odda hand, get Bible stories about peopo who wen start out good but wen end up bad. Like, King Solomon. He wen know who Jehovah was an how fo worship Him, an Jehovah wen bless him plenny. But layta on, Solomon wen start fo worship fake kine gods. Jehovah was real huhu, an all da Israel peopo wen suffa fo long, long time cuz a wat Solomon wen do. Az true, da Bible tell dat Solomon “sleep by his ancesta guys,” like his faddah King David, who wen trus Jehovah plenny. (1 Ki 11:5-9, 43; 2 Ki 23:13) But jus cuz da Bible tell dat, dat mean garans Jehovah going bring Solomon back alive? No, da Bible no tell dat. Some guys might tell, “Afta you mahke, no mo notting dat can make you do bad kine stuff no moa.” (Rome 6:7) Dass true, but dis no mean dat jus cuz somebody mahke, dey going get da right fo live again, az if dey wen earn um. Fo come back alive, dass one gif from Jehovah. He ony give um to da guys he like have chance fo serve him foeva. (Job 14:13, 14; John 6:44) You tink Solomon going get dat gif? Ony Jehovah know da ansa, not us. But we know fo shua Jehovah going do da right ting.

WAT WE KNOW

10. How Jehovah feel about wiping out peopo? (Ezekiel 33:11) (Go look da picha.)

¹⁰ Read um Ezekiel 33:11. Jehovah tell us how he feel wen come to da way he judge peopo. Jalike Ezekiel, da aposal Peter wen tell, “Da One In Charge . . . no like nobody get cut off from him.” (2 Pet 3:9) Dose words make us feel good cuz we know Jehovah no going wipe out nobody unless he feel he gotta. He get plenny pity, an he show um erytime can.

11. Who da ones dat not going come back alive, an how we know dat?

¹¹ Wat we know about da guys who not going come back alive? Da Bible talk ony litto bit about dem.b Jesus wen tell dat Judas Iscariot no going come back alive. (Mar 14:21; go look John 17:12 nwt-E an da study note.) Judas wen know he was going agains Jehovah an His Boy, but he wen do um anyway. (Go look Mar 3:29 nwt-E an da study notes.) Jesus wen tell dat some of da religious leada guys who wen go agains him, was going mahke an dey no moa chance fo come back alive eidda. (Mat 23:33; go look an da study John 19:11 nwt-E note “the man.”) An da aposal Paul wen tell dat apostates who no like change not going come back alive.​—Heb 6:4-8; 10:29.

12. Wat we know about how Jehovah show pity? Try give exampos.

¹² But, wat we know about how Jehovah show pity? How he wen show dat “he no like nobody get cut off from him”? Try tink about how he wen show pity to da guys who wen do really bad kine stuff. King David wen do stuff like fool aroun wit somebody else wife an murda. Still yet, David was really sorry fo wat he wen do, so Jehovah had show pity to him an let um go. (2 Sam 12:1-13) King Manasseh wen do wat was pilau pretty much all his life. But no matta how nutz dat was, Jehovah wen show pity an let Manasseh go cuz he was real sorry fo wat he wen do. (2 Rec 33:9-16) Dese exampos show us dat Jehovah show pity weneva he see get one reason fo do dat. Cuz dey wen know dey had do really bad kine stuff an was sorry fo dat, Jehovah going bring dese guys back to life.

13. (a) How come Jehovah wen show pity to da Nineveh peopo? (b) Wat Jesus wen tell about dem?

¹³ We know too dat Jehovah wen show pity to da Nineveh peopo. God wen tell Jonah, “I know awready all da pilau kine stuff dey stay do.” But wen dey had tell sorry fo da bad kine stuff dey wen do, Jehovah wen let um go. He had way moa pity fo dem den Jonah. Jonah wen come all huhu, an God had fo remind him dat da Nineveh peopo “donno notting bout wass right an wass wrong.” (Jonah 1:1, 2; 3:10; 4:9-11) Layta on, Jesus wen use dat fo teach about how Jehovah show pity an do wass right. Jesus wen tell dat da Nineveh peopo who was sorry “goin stan in front God da Judge.”​—Mat 12:41.

14. Fo “come back fo be judged”, wat dat mean fo da Nineveh peopo?

¹⁴ Wat dat mean, dat da Nineveh peopo “goin stan in front God da Judge”? Jesus wen teach, “da peopo dat wen do bad kine stuff going come back fo be judged” bumbye. (John 5:29, NWT) He was talking about da Time He Going Rule Fo Tousand Years, wea both da guys dat stay do da right tings an da guys dat no do wass right going come back alive from mahke. (Jesus Guys 24:15) Fo da guys dat no do wass right, dis going be one time fo dem “come back fo be judged.” Dis mean afta dese guys come back alive, Jehovah an Jesus going see if dey lissen an do da tings dey learn. If one Nineveh guy who come back alive no like worship Jehovah, Jehovah no going let um live anymoa. (Isa 65:20) But fo all da guys who choose fo keep worshipping Jehovah, dey going get chance fo live foeva!​—Dan 12:2.

15. (a) How come betta fo no tell dat da guys who wen get wipe out from Sodom an Gomorrah not going come back alive? (b) How we can undastan wat Jude 7 tell? (Go look da box “Wat Jude Wen Mean?”)

¹⁵ Jesus wen tell da peopo a Sodom an Gomorrah was going have one moa easier time wen dey “stan in front God da Judge” den da peopo who neva like him an wat he teach. (Mat 10:14, 15; 11:23, 24; Luk 10:12) You tink Jesus was ony exaggerating fo show dat da peopo his time was moa worse den da guys from Sodom an Gomorrah? No look like. Cuz wen Jesus sed da Nineveh peopo was “goin stan in front God da Judge,” he had mean dey was going do dat fo real. So da time “wen dey stan in front God da Judge” gotta be da same fo both. Jalike da Nineveh peopo, da peopo a Sodom an Gomorrah wen do bad kine stuff. But da Nineveh peopo had chance fo feel sorry fo wat dey wen do. An rememba wat Jesus had tell about who was going “come back fo be judged.” Going get “da peopo dat wen do bad kine stuff.” (John 5:29, NWT) So get chance fo some a dose guys come back alive again, an maybe we da ones going teach dem about Jehovah an Jesus Christ!

16. Wat we know about how Jehovah going pick who going come back alive? (Jeremiah 17:10)

¹⁶ Read um Jeremiah 17:10. Dat verse help us wrap up wat we know: Jehovah always “know wat erybody tink . . . how dey feel inside an wat dey like.” Wen come to da time wen peopo come back alive, “dis wat dey goin get from [Jehovah] fo wat dey do: Good if dey do good kine, o bad if dey do bad kine.” Jehovah going be strict wen he gotta, but going give chance weneva can. So we no can tell somebody no moa hope fo come back alive unless we know dat fo shua!

“DA JUDGE FO ALL DA PEOPO INSIDE DA WORLD” GOING DO DA RIGHT TING

17. Fo da peopo who wen mahke, wat going happen to dem bumbye?

¹⁷ Eva since Adam an Eve wen join Satan fo go agains Jehovah God, uku billion peopo had mahke. Fo mahke, dass “anodda ting dat stay agains us.” (1 Cor 15:26) Wat going happen to all dose peopo? Some of Christ’s faithful followas, 144,000 of um, going come back alive an live foeva in heaven. (Jesus Show 14:1) Going get plenny odda faithful braddahs an sistahs dat wen love Jehovah who going be part a “da guys dat stay do da right tings an . . . goin come back alive from mahke.” Dey going live foeva on earth if dey stay pono during da Time Christ Going Rule Fo Tousan Years an during da las tes. (Dan 12:13; Heb 12:1) An same time, “da guys dat no do wass right”, even da guys who neva serve Jehovah an “da peopo dat wen do bad kine stuff”, get chance fo change an serve Him. (Luk 23:42, 43) But cuz some guys was so pilau, neva like change, an go agains Jehovah an wat He like do, Jehovah awready wen choose fo no bring dem back alive.​—Luk 12:4, 5, NWT.

18-19. (a) Why we no need worry about how Jehovah going judge da guys who wen mahke? (Isaiah 55:8, 9) (b) Wat we going talk about in da nex lesson?

¹⁸ So wat, we know fo shua dat wen Jehovah judge peopo, he always going do da right ting? Of course! Jalike Abraham wen know, Jehovah da perfeck an akamai “Judge fo all da peopo inside da world” who give chance. He wen teach his Boy an give um da kuleana fo judge erybody. (John 5:22) Da two a dem know how erybody on top da earth tink an feel. (Mat 9:4) Dey going do da right ting erytime!

¹⁹ Eh, we go make shua fo trus in Jehovah an wat he choose fo do. We know dat we no can be da judge, but he can! (Read um Isaiah 55:8, 9.) Az why we trus Jehovah an his Boy fo do all da judging. We know dat oua King, Jesus, going copy da way his Faddah give chance an do wat stay right. (Isa 11:3, 4) But wat about how Jehovah an Jesus going judge peopo da time a da big trouble? Wat we donno? An wat we know? Oua nex lesson going ansa dat.