Keep Looking To Jehovah Fo Help You

1. Jehovah wen make us fo need wat tings? (Matthew 5:3, NWT)

JEHOVAH da one who wen make humans so he kno wat we need. Fo exampo, fo us keep living, we need food, clothes, an shelta. If we no moa any of dese tings, even fo litto while, life come hahd. Jehovah kno dat we need someting else. He wen make us wit da need fo kno him an lissen him. (Read um Matthew 5:3, NWT.) So if we like be happy fo real kine, we gotta be frenz wit him an trus him all da time.

2. How we jus like one beggah?

² Wat mean fo “know” we “need God”? In da original language, dis stay talking about one guy dat beg fo help. Try picha one guy sitting in da street wit boro boro clothes an he no moa food fo eat. He stay out in da hot sun, an at night he come real cold. Peopo no like go by him cuz of wat he look like. Da beggah kno dat fo his life get betta, he goin need help. Same ting, da guys dat kno dey need God beg him fo help an like lissen him.

3. Wat we goin go ova in dis lesson?

³ In dis lesson, we goin go ova wat we learn from da Canaan wahine dat wen beg Jesus fo help. We goin see how we can copy her if we like Jehovah’s help. Den we go talk about da exampo of Peter, Paul, an David an how dey all wen like Jehovah’s help.

WE NEED FO BE HUMBO, KEEP ASKING GOD FO HELP, AN HAVE FAIT

4. Wat da Canaan wahine wen ask Jesus fo do?

⁴ One time, had one Caanan wahine dat wen go up to Jesus. Her girl had one “bad kine spirit dat take ova her an make her suffa plenny.” (Mat 15:21-28) Da maddah wen go on her knees an wen beg Jesus fo help. We go talk about three ways we can copy da way dis wahine wen ask Jesus fo help her.

5. Wat qualities da wahine wen show, an wat Jesus wen do? (Go look da picha.)

⁵ Da Canaan wahine wuz humbo. Why we can say dat? Cuz she neva get hurt wen Jesus had compare her to one dog. He wen use dis word picha of one dog cuz plenny times da guys dat no wuz Jews wen keep um az one pet. If Jesus wen tell you dat, wat you would do? Get mad an stop asking him fo help? Da Canaan wahine neva do dat. She wuz humbo an she wen keep asking fo help. She neva give up. How come? Cuz she had fait in Jesus. He wen help her cuz of her strong fait. Even tho he jus wen tell he wuz dea fo help ony da Israel peopo, Jesus wen hemo da bad spirit from da girl.

6. How we can copy da Canaan wahine?

⁶ If we like Jehovah help us, we gotta copy da wahine. We gotta be humbo, keep asking God fo help, an have strong fait. Ony one humbo guy goin keep begging God fo help him. We gotta have strong fait in Jesus an trus da guys he use fo show us wat fo do. (Mat 24:45-47) Jehovah an Jesus happy fo help us wen we do dese three tings. (Go check out From James 1:5-7.) Now we go look how Jehovah give us spiritual food, clothes, an shelta. An we go see how da exampos of Peter, Paul, an David show us wat we gotta do fo get dese tings from Him.

COPY PETER AN KEEP EATING DA SPIRITUAL FOOD

7. Wat Jesus wen tell Peter, an wat else Peter had fo do? (Fo Da Hebrew Peopo 5:14–6:1)

⁷ Try look da aposal Peter’s exampo. He wuz one of da firs Jews fo kno dat Jesus wuz da Messiah, da one Jehovah wen use fo teach peopo “how fo live to da max foeva.” (John 6:66-68) Befoa Jesus wen go back heaven, he wen tell Peter, “Feed my sheeps.” (John 21:17) Peter wen lissen an had teach da braddahs an sistahs in da hui, an Jehovah wen use him fo write two lettas in da Bible. But Peter had fo grind da spiritual food too. Fo exampo, he wen study da lettas da aposal Paul wen write dat wuz awready paht of da Bible. Peter sed dat some of da tings Paul wen write wuz “hard fo undastan.” (2 Pet 3:15, 16) But Peter neva give up. He had fait dat Jehovah wuz goin help him undastan an use da “solid stuff” he wen study.​—Read um Fo Da Hebrew Peopo 5:14–6:1.

8. Wat Peter wen do wen Jehovah’s angel told him fo change?

⁸ Peter wen show his fait in Jehovah wen he had lissen Him. Like da time he wuz in Joppa, Peter had one vision an one angel told him fo eat animals dat da Rules from Moses sed not fo eat. Peter wuz one Jew all his life, an to him wuz wrong fo do wat da angel wen tell. At firs, Peter sed, “No way I goin do dat! I no eat notting dat stay kapu fo me!” (Jesus Guys 10:9-15) But Peter got da point. How we kno? Right afta he saw da vision, three guys wen come Peter’s house. Dey sed dat dea boss, Cornelius, wanted Peter fo go see him. Befoa, Peter neva would go ova somebody house dat no wuz one Jew, cuz da Jews wen tink dey wuz pilau. (Jesus Guys 10:28, 29) But wen Jehovah had show Peter dat he wanted dem preach to all kine peopo, Peter wuz fas fo change an wen lissen Jehovah. (Smart Guys 4:18) He wen preach to Cornelius an erybody at his house. Dey all wen get fait in Jesus, got da spesho spirit, an had get baptize.​—Jesus Guys 10:44-48.

9. Wat two good tings goin happen wen you study stuff dass moa hahd fo undastan?

⁹ Jus like Peter, we gotta keep eating spiritual food. Not ony da easy kine stuff but even da solid stuff dass moa hahd fo undastan. We gotta make da time fo study da Bible an try hahd fo undastan da tings dass moa deep in um. Goin be wort it cuz, (1) we learn tings about Jehovah dat goin help us love an respeck him moa, (2) an wen we learn someting unreal about Jehovah dat we neva kno befoa, dat goin fiyah us up fo tell oddas about him. (Rome 11:33; Jesus Show 4:11) We learn someting else from Peter’s exampo. Wen get changes to da way we undastan da Bible, we gotta be fas fo change how we tink an ack. Den Jehovah can use us cuz we keep eating da spiritual food he give.

COPY PAUL AN MAKE SHUA YOA SPIRITUAL CLOTHES STAY ON

10. Wat mean fo put on spiritual kine clothes? (Fo Da Colosse Peopo 3:8-10)

¹⁰ Fo make Jehovah happy, we gotta use someting else he give us, spiritual kine clothes. Wat is dat? Da aposal Paul wen write dat we gotta take off “da ol kine way” an put on da “new kine way”, jus like we change oua clothes. (Read um Fo Da Colosse Peopo 3:8-10.) Fo make dis change, goin take time an hahd work. Try tink about Paul. From small kid time he wen work hahd fo make God happy. (Gal 1:14; Php 3:4, 5) But he neva really undastan how fo worship God da right way. Cuz he neva kno da trut about Jesus, he wuz high makamaka, an neva take off da ol kine clothes.​—1 Tim 1:13.

11. Wat change Paul had fo make?

¹¹ Befoa Paul wen come one Christian, he wen get mad fas. Da book Jesus Guys talk about one time Paul wuz so mad wit Jesus followas dat “he tell he goin kill dem.” (Jesus Guys 9:1) So afta Paul wen come one Christian, he had fo work hahd fo control his temper. (Efe 4:22, 31) Even den, had times Paul wen mess up. Wen him an Barnabas neva see eye to eye bout someting, Paul got real mad an dey wen “make argue plenny.” (Jesus Guys 15:37-39) Even tho dat wen happen to Paul, he neva give up. He wen make his “body tough an work um hard” so he can come da kine person dat make Jehovah happy.​—1 Cor 9:27.

12. Wat wen help Paul fo change da way he wuz?

¹² Cuz he wuz humbo, Paul could change da way he wuz. (Php 4:13, NWT) Jus like Peter, Paul wen trus Jehovah fo give him da powa fo change. (1 Pet 4:11) Still yet, had times Paul wen feel like one loser. But wen he wuz all bum out, he wen rememba all da good tings Jehovah wen do fo him, an dat had help him fo keep trying.​—Rome 7:21-25.

13. How we can copy Paul?

¹³ Even if we been serving Jehovah long time, we can copy Paul an keep working hahd fo put on da spiritual clothes dat Jehovah give us. Wen we mess up, like if we snap or say mean tings to somebody, we no like tink we neva goin make Jehovah happy. Radda, we gotta keep trying fo make changes. (Rome 12:1, 2; Efe 4:24) We gotta rememba dat we can alta regula clothes fo make um fit us, but wit spiritual clothes, we gotta change how we stay fo fit inside um. Wen we do dat, we measure up to wat Jehovah like.

COPY DAVID AN STAY INSIDE DA SPIRITUAL SHELTA

14-15. How Jehovah put up one spiritual shelta fo his peopo? (Songs Fo God 27:5) (Go look da picha.)

¹⁴ Fo be happy fo real kine, need moa den spiritual food an spiritual clothes. We need spiritual shelta too. Wat iz dat an how we can make shua we stay inside um?

¹⁵ King David wen talk about da spiritual shelta dat Jehovah put up fo us. (Read um Songs Fo God 27:5.) How Jehovah proteck his peopo in one spiritual shelta today? Jehovah proteck us from anybody or anyting dat can wipe out oua fait in him. He promise dat anybody dat fight agains us no goin win. (Songs 34:7; Isa 54:17) Satan an da guys on his side stay strong, but Jehovah iz stronga den dem. Even if dey kill us, Jehovah can bring us back to life. (1 Cor 15:55-57; Jesus Show 21:3, 4) An wen tings bodda us inside real plenny, Jehovah help us so we no stop serving him. (Smart Guys 12:25; Mat 6:27-29) Oua Faddah give us one spiritual ohana of braddahs an sistahs dass dea fo us. An he give eldas dat teach us an help us fo keep oua fait solid. (Isa 32:1, 2) Wen we go meetings, we learn about odda ways Jehovah help an proteck us.​—Heb 10:24, 25.

16. Wass some ways Jehovah wen proteck David?

¹⁶ Wen David had lissen to Jehovah, he wuz safe from da stuff dat happen to da guys dat no like lissen. (Go check out Smart Guys 5:1, 2.) But wen David neva lissen, Jehovah neva proteck him from da bad tings dat wuz goin happen. (2 Sam 12:9, 10) Wat about da times David wen suffa cuz oddas wen treat him bad? David wen pray hahd to Jehovah, an He wen tell David He love him an wen promise fo take kea him.​—Songs 23:1-6.

17. How we can copy David?

¹⁷ We copy David wen we ask Jehovah fo his help so we can figga out wat fo do. We gotta rememba dat sometimes we suffa cuz we neva lissen to Jehovah, not cuz he no can proteck us. (Gal 6:7, 8) But even if we lissen Jehovah, bad tings can happen. Wen we get hahd times, we can pray to Jehovah bout eryting dat bodda us an ask fo his help. Den we goin see his love an dat goin make us feel betta.​—Php 4:6, 7.

KEEP LOOKING TO JEHOVAH FO HELP YOU

18. Wat plenny peopo aroun us tink, an wat we gotta keep doin fo get Jehovah’s help? (Go look da pichas.)

¹⁸ Da main scripcha fo 2026 iz, “Da guys dat know dey need God stay happy.” Dass tru now moa den eva befoa. How come? Cuz plenny peopo today no tink dey need God or try fo worship him dea own way. An oddas trus peopo fo tell dem how fo tink. Dat no make dem happy. We gotta watch out dat we no tink like dem. How? By eating up da spiritual food Jehovah give, by putting on da spiritual clothes dat help us live da new kine way, an by goin in da spiritual shelta Jehovah give fo proteck us.