Jehovah Can Help You Wen You Feel Down

1-2. How Paul wen feel sometimes, an how come we can undastan how he feel? (Fo Da Rome Peopo 7:21-24)

WEN you tink of da aposal Paul, you tink of one guy who wen go all out in his preaching, wuz one good teacha, an wen write plenny books of da Bible? All dat iz right. But Paul wuz jus like us, he wen get sad an feel down sometimes.

² Read um Fo Da Rome Peopo 7:21-24. Wen Paul had write to da Romans, he wen write about his feelings dat plenny of us guys can undastan. Even tho he wuz one solid Christian an wanted fo lissen to Jehovah, sometimes had bad tings dat he still yet wanted fo do. On top of dat, sometimes Paul wen feel guilty about da stuff he wen do in da pas, an he had fo deal wit one problem dat neva go away.

3. Wat we goin go ova in dis lesson? (Go look “Wat dis mean.”)

³ Even tho Paul wen struggle wit all dat, he wen work hahd fo fight agains dose kine feelingsa. In dis lesson, we goin ansa dese questions: Wat wen make Paul feel junk sometimes? How he wen deal wit dose feelings? An wat we can do wen we feel down?

WAT WEN BRING PAUL DOWN SOMETIMES

4. Wat wen bring Paul down?

⁴ Tings he wen do in da pas. Befoa Paul wuz one Christian, he wen do plenny bad tings dat he wen regret. He wen watch guys kill Stephen, an he wen tink wuz good dey had do dat. (Jesus Guys 7:58; 8:1) An he wen do real bad tings to da braddahs an sistahs back den.​—Jesus Guys 8:3; 26:9-11.

5. How da stuff Paul wen do befoa wen affeck him?

⁵ Afta Paul wen come one Christian, had times he probly wen feel bad about da stuff he wen do befoa. Da moa time dat wen go by, da moa bad he wen feel about wat he had do to da braddahs an sistahs. We kno tings wen bodda him, cuz wen he had write his firs letta to da Corinthians in 55 C.E., he wen say, “I not good enuff fo peopo call me one messenja guy fo God.” (1 Cor 15:9) Five years layta wen he had write his letta to da Ephesians, he wen tell, “All da odda peopo dat stay spesho fo God stay mo importan den me.” (Efe 3:8) An den wen he had write to Timoty, he had say dat he “wen talk real stink an bulai bout God, an make his peopo suffa, an bus um up.” (1 Tim 1:13) Try imagine how hahd wuz fo Paul wen he had fo go to da huis an face da guys he wen treat real bad in da pas or dea families?

6. Wat else wen bodda Paul? (Go look da extra info.)

⁶ One sharp thorn inside his body. Paul wen compare da ting dat wuz boddaring him plenny to “one sharp thorn inside [his] body.” (2 Cor 12:7) He neva say exackly wat da ting wuz. But coulda been one physical or emotional problem, or someting else.b

7. How Paul’s mistakes wen affeck him? (Fo Da Rome Peopo 7:18, 19)

⁷ His mistakes. Paul wen struggle wit da mistakes he wen make. (Read um Fo Da Rome Peopo 7:18, 19.) Cuz he wuz imperfeck, he wen mess up sometimes, even tho he wanted fo do wass right. He sed wuz one constant fight inside him fo do da right ting. An he wen work real hahd fo win dat fight. (1 Cor 9:27) But still yet, he wen make mistakes. Imagine how frustrating dat wuz fo him.

WAT WEN HELP PAUL WEN HE WUZ FEELING DOWN

8. From wat Paul wen write in his lettas, wat wen help him make changes?

⁸ From wat Paul wen write in his lettas, we can see dat he wen tink about how God’s spirit wen help him an odda Christians fo fight agains doin wrong an change who dey wuz on da inside. (Rome 8:13; Gal 5:16, 17) Paul wen talk about da acktions an da feelings Christians gotta stay away from fo make Jehovah happy. (Gal 5:19-21, 26) Fo shua Paul wen tink about da stuff he needed fo work on, an he wen use da Bible fo help him make dose changes. Garantee Paul wuzn’t all mout. He wen follow da advice he wen give to oddas.

9-10. Wat wen help Paul fo stay happy? (Fo Da Efesus Peopo 1:7) (Go look da picha.)

⁹ Even tho sometimes Paul had feel down, had plenny tings dat wen help him fo be happy. Like wen he hea good tings dat wuz happening in da huis dat wuz far away. (2 Cor 7:6, 7) He had good frenz. (2 Tim 1:4) An he wuz tight wit Jehovah, an had kno Jehovah wuz happy wit him (2 Tim 1:3) Even wen Paul wuz lock up in Rome, Paul wen tell his braddahs fo “stay good inside erytime, no matta wat happen!” (Php 4:4) Dat no soun like somebody who iz all bum out. So weneva had tings dat wen bring Paul down, fas kine he wen tink about da tings dat wen make him happy.

¹⁰ Anodda ting dat wen help Paul fo stay happy wuz da ransom, cuz he wen kno dat wuz one gif to him an dat Jehovah wen love him plenny. (Gal 2:20, NWT; read um Fo Da Efesus Peopo 1:7.) Cuz of dat, he wen trus Jehovah wuz goin fogive him fo da bad stuff he wen do. (Rome 7:24, 25) So no matta da stuff he wen do in da pas an da mistakes he wen make, Paul wuz still able fo work hahd fo Jehovah an be happy.​—Heb 9:12-14.

11. How Paul’s exampo can encourage us?

¹¹ Same like Paul, we might feel dat we gotta try supa hahd not fo say or do anyting dat goin make Jehovah sad. Sometimes we might feel frustrated, like we neva goin make Jehovah happy. One sistah name Elizac wen tell, “Tinking about wat Paul wen go tru wen really help me out cuz I kno I not da ony one dat feel lidis. It remind me dat Jehovah see wat his peopo stay goin tru.” So wat can we do fo copy Paul so dat we can be happy an no stay bum out?

WAT WE CAN DO WEN WE FEEL DOWN

12. Wat we gotta do fo be happy?

¹² Do tings dat help us come moa close to Jehovah. Wen we do tings dat help us come closa to Jehovah, we goin be happy. Try tink bout dis: wen we eat good food, exercise an get plenny sleep, we feel good. Same lidat, we feel good wen we read da Bible, go out in field service, an make ready fo, go, an ansa at da meetings. All dis kine stuff help us fo be happy an no focus on all da stuff dat bring us down.​—Rome 12:11, 12.

13-14. How some braddahs an sistahs had feel wen dey had keep doin da tings dat help dem stay close to Jehovah?

¹³ Try look da exampo of John. Wen he wuz 39 years old, he wen find out dat he had one rare cancer. At firs, he wuz sked an had worry plenny. He wen tink, “Ho! I so young, how come I get sick lidis?” An at da time, he had one boy dat wuz ony 3 years old. Wat wen help build up John? He tell, “Even tho I wuz supa tired, I wen make shua dat oua ohana wen go all da meetings, went field service, an had ohana worship ery week. We wen stick to all dese tings even wen wuz hahd sometimes.” Tinking back, John tell, “Wen goin tru one hahd time, at firs we might be shock an even feel supa sad. But I wen learn dat Jehovah goin give us da strength we need, an we goin feel how much he love us. Jehovah goin help you jalike how he wen help me.”

¹⁴ Eliza, who we wen talk about befoa tell, “Erytime I go meeting an do my personal study, Jehovah remind me how much he love me an dat he hear me. Dat make me happy.” Nolan, one circuit ovaseah wen tell wat had help him an his wife Diane, “Even wen we feel down, we try real hahd fo pray, study da Bible, go meetings, an preach. Den Jehovah always help us feel betta. We try fo rememba dat Jehovah goin help us an bless us. We donno how, but garanz he will.”

15. Wat else we can do wen we feel down? Try give one exampo.

¹⁵ If we still feeling down, get some odda stuffs dat we might gotta do. Fo exampo, imagine you get back pain. Fo get rid of um, you gotta do moa den jus try walk um off eryday. Maybe we gotta go do some research an even go talk to one docta fo figga out wass goin on. Same same, we might gotta do research in da Bible an publications fo learn how fo hando wen we keep feeling down. An we could even talk to one braddah or sistah fo some good advice. We go talk about some odda tings dat can help.

16. Wat can help you figga out how come you stay feeling down? (Songs Fo God 139:1-4, 23, 24)

¹⁶ Pray an tink hahd bout wat you really need. Cuz King David wen kno dat Jehovah had kno him real good, he had ask Jehovah fo help him figga out wat stay boddaring him. (Read um Songs Fo God 139:1-4, 23, 24.) You can do da same ting an ask Jehovah fo help you figga out how come you stay feeling down an wat you can do fo feel betta. Try ask yoaself some questions like, ‘Wass really boddaring me? Get tings dat trigga my tinking dat make me start fo feel down? Do I keep tinking about wass boddaring me, radda den jus let um go?’

17. Wat kine stuffs you can study about fo help you? (Go look da picha.)

¹⁷ Try study someting dat goin help you wit wat you stay goin tru. Sometimes iz good fo study about one of Jehovah’s qualities, cuz dat can help you. Fo exampo, da aposal Paul had tink bout da ransom an how Jehovah stay ready fo fogive. You can do da same ting. Try look up articles on jw.org dat talk about Jehovah’s love an how he fogive. Afta you find da articles, make one lis of um an put da lis wea you can see um. Weneva you start fo feel down, try study dose articles an use um fo help you deal wit wat you stay goin tru.​—Php 4:8.

18. Wat tings odda braddahs an sistahs wen study?

¹⁸ Eliza wen do one study projeck about Job. She tell, “I wen go tru plenny jalike Job. One ting afta anodda wen happen to him. But even wen he had hit rock bottom an neva kno how come all dat wuz happening to him, he still yet wen trus Jehovah.” (Job 42:1-6) Diane wen tell, “Me an my husban wen study da book Draw Close to Jehovah. We so tankful dat Jehovah helping us come moa like him. So even wen we feel down cuz of all oua mistakes, we rememba dat Jehovah stay helping us fo be betta peopo. An dat makes us come moa close to him.”​—Isa 64:8.

KNO DAT JEHOVAH GOIN HELP US AN BLESS US

19. How we goin feel sometimes, but wat we kno fo shua?

¹⁹ Even if we try fo do eryting inside dis lesson, still goin get times wea we goin feel junk. But wit Jehovah backing us up, we can fight dose kine feelings. Garanz mos of da time we can be happy cuz we kno we good wit Jehovah an we doin da stuff he like us do.

20. Wat you like keep doin?

²⁰ We go keep doin oua bes fo no let tings we wen do in da pas, da problems we go tru now, an oua mistakes bum us out. Wit Jehovah’s help, we can feel betta. (Songs 143:10) We no can wait fo da time wea we ony goin tink about tings dat make us happy. We goin wake up eryday serving Jehovah wit no worries!